ខេត្តកំពង់ចាម ៖ ក្នុងតំបន់ព្រៃអភិរក្ស ដែលជាជម្រកត្រីពងដ៏មានសារសំខាន់ ស្ថិតនៅភូមិយាយស ឃុំទន្លេបិទ ជាប់ព្រំប្រទល់ឃុំជីរោទ៍ទី២ ស្រុកត្បូងឃ្មុំ ត្រូវបានភ្លើងឆេះយ៉ាងសន្ធោសន្ធៅ ដែលគេសង្ស័យថា អាចមានមនុស្សលួចដុតបំផ្លាញ ដើម្បីវាតយកដីដាំ
ខេត្តកំពង់ចាម ៖ ក្នុងតំបន់ព្រៃអភិរក្ស ដែលជាជម្រកត្រីពងដ៏មានសារសំខាន់ ស្ថិតនៅភូមិយាយស ឃុំទន្លេបិទ ជាប់ព្រំប្រទល់ឃុំជីរោទ៍ទី២ ស្រុកត្បូងឃ្មុំ ត្រូវបានភ្លើងឆេះយ៉ាងសន្ធោសន្ធៅ ដែលគេសង្ស័យថា អាចមានមនុស្សលួចដុតបំផ្លាញ ដើម្បីវាតយកដីដាំដំណាំផ្សេងៗ ។ តែខាងស្ថាប័នជំនាញបរិស្ថានខេត្តវិញ បានអះអាងកាលពីព្រឹកថ្ងៃទី២១ មីនា ២០១៦ ថា ភ្លើងឆេះនោះ គឺបណ្តាលមកពីក្មេងៗយកឃ្មុំទៅវិញ ។
លោកម៉ា យ៉ុងរី នាយខណ្ឌរដ្ឋបាលជលផលខេត្តបានប្រាប់ថា ដីព្រៃលិចទឹកនៅតំបន់ស្ពានមាត់ឃ្មង់ ស្រុកត្បូងឃ្មុំ ដែលមានទំហំប្រមាណជិត១.០០០ហិកតា ត្រូវគ្រប់គ្រងដោយមន្ទីរបរិស្ថានខេត្តតាំងពីមិនទាន់បំបែកខេត្តកំពង់ចាមម្ល៉េះ ។ លោកម៉ា យ៉ុងរី បន្ត ថា មិនមែនជលផលអ្នកគ្រប់គ្រងនោះទេ ហើយអាជ្ញាធរខេត្តអនុញ្ញាតឱ្យប្រជាពលរដ្ឋណា ដែលមានលទ្ធភាពចាក់ដីសំរាប់សាងសង់លំនៅឋានបានចាប់ពីផ្លូវជាតិលេខ៧ ចម្ងាយ៦០ម៉ែត្រ ។ ចំពោះហេតុការណ៍ ដែលមានភ្លើងឆេះព្រៃលិចទឹកជាបន្តបន្ទាប់នេះ សូមសួរនាំទៅមន្ទីរបរិស្ថានខេត្ត ដែលជាអ្នកគ្រប់គ្រងវិញ ។
លោកហួរ ពិសិដ្ឋ ប្រធានមន្ទីរបរិស្ថានខេត្តបានប្រាប់ដែរថា ចំពោះហេតុការណ៍ភ្លើងឆេះព្រៃតំបន់មាត់ឃ្មង់ខាងលើ បានកើតមានឡើងជាហូរហែ៤ ទៅ៥លើកមកហើយ មានពេលខ្លះដោយសារតែភ្លើងឆេះខ្លាំងពេកនោះ រហូតដល់មានការស្នើសុំអន្តរាគមន៍រថយន្តពន្លត់អគ្គិភ័យរបស់ស្នងការដ្ឋាននគរបាលខេត្តមកបាញ់ទឹកពន្លត់ ដើម្បីការពារកុំឲ្យភ្លើងឆេះរាលដាលទៅដល់ផ្ទះរបស់ប្រជាពលរដ្ឋ ។ ចំពោះភ្លើងដែលឆេះព្រៃ ត្រូវរូបលោកវាយតម្លៃថា បណ្តាលមកពីក្មេងយកឃ្មុំ មានការធ្វេសប្រហែស ទើបបណ្តាលឲ្យមានអគ្គិភ័យកើតឡើងយ៉ាងដូច្នេះ ។ រូបលោកក៏បានធ្វើរបាយការណ៍ទៅអភិបាលខេត្ត និងស្ថាប័នជំនាញរបស់លោកផងដែរ ។
ចំណែកលោកចាប សៀកហេង នាយអធិកាដ្ឋានរដ្ឋបាលជលផលមេគង្គវិញប្រាប់ឱ្យដឹងដែរថា លោកមិនដឹងថា តើត្រង់ចំណុចដែលកើតមានគ្រោះអគ្គិភ័យឆេះព្រៃលិចទឹក ស្ថិតនៅតំបន់ដែលគ្រប់គ្រងដោយជលផលខេត្ត ឬក៏បរិស្ថានខេត្ត មិនទាន់ដឹងនោះទេ ដូច្នេះនឹងចាត់ឱ្យមន្ត្រីក្រោមឱវាទ ចុះទៅពិនិត្យមើលនៅរសៀលថ្ងៃទី២១ មីនា ២០១៦ ។
សូមបញ្ជាក់ថា កាលពីល្ងាចថ្ងៃទី១៩ មីនា ២០១៦ មានភ្លើងឆេះព្រៃលិចទឹកនៅភូមិយាយស ឃុំទន្លេបិទ ស្រុកត្បូងឃ្មុំ ជាប់ព្រំប្រទល់ជាមួយនឹងឃុំជីរោទ៍ទី២ ដោយមានអណ្តាតភ្លើងសន្ធោរសន្ធៅ គេសង្កេតឃើញលោកអភិបាលស្រុកត្បូងឃ្មុំម្នាក់ ដែលមានផ្ទះនៅភូមិយាយស បានមកមើលហេតុការណ៍ភ្លើងឆេះនោះដែរ ព្រោះខ្លាចក្រែងភ្លើងបានឆេះរាលដាលទៅដល់ផ្ទះរបស់គាត់ ទោះជាយ៉ាងណាក្តី ភ្លើងមិនបានឆេះឆ្លងទៅដល់ផ្ទះរបស់អ្នកស្រុកនោះទេ ។
ចែករំលែកព័តមាននេះ