ការពិសោធលើអ្នកស្ម័គ្រចិត្តប្រមាណ៧៨៣នាក់ពីសំណាក់ក្រុមអ្នកស្រាវជ្រាវសាកលវិទ្យាល័យ Johns Hopkins University សហរដ្ឋអាមេរិកបានរកឃើញថា Resveratrol ជាសមាសធាតុប្រឆាំងអុកស៊ីដកម្មមានក្នុងស្រាក្រហម
ការពិសោធលើអ្នកស្ម័គ្រចិត្តប្រមាណ៧៨៣នាក់ពីសំណាក់ក្រុមអ្នកស្រាវជ្រាវសាកលវិទ្យាល័យ Johns Hopkins University សហរដ្ឋអាមេរិកបានរកឃើញថា Resveratrol ជាសមាសធាតុប្រឆាំងអុកស៊ីដកម្មមានក្នុងស្រាក្រហម សូកូឡា និងទំពាំងបាយជូរមិនជាប់ពាក់ព័ន្ធនឹងការធ្វើឱ្យមានអាយុយឺនយូរ ឬក៏ធ្វើឱ្យកើតមានជំងឺបេះដូង ជំងឺមហារីក និងការរលាកនោះទេ ។
អំឡុងការពិសោធដែលមានរយៈពេល៩ឆ្នាំបានបង្ហាញថា ២៧ភាគរយនៃក្រុមអ្នកស្ម័គ្រចិត្តដែលគ្មានជំងឺបេះដូងនៅពេលចាប់ផ្តើមការពិសោធបានកើតមានជំងឺនេះខណៈ៥ភាគរយក្នុងចំណោមអ្នកគ្មានជំងឺមហារីកបានកើតមានជំងឺមហារីកបើទោះជាពួកគេទាំងនោះបានទទួលទានអាហារដែលមានផ្ទុកសមាសធាតុResveratrol ច្រើនយ៉ាងណាក្តី ។ ចំណែក៣៤ភាគរយងទៀតបានស្លាប់បាត់បង់ជីវិត ។
ទំនោរដែលបណ្តាលឱ្យស្លាប់អំឡុងរយៈពេលពិសោធគឺវាដូចគ្នាបេះបិទទៅនឹងបណ្តាជនដែលមានផ្ទុកសមាសធាតុ Resveratrol កម្រិតទាបបំផុតនិងខ្ពស់បំផុត ។ នេះមានន័យថា បណ្តាជនដែលប្រើប្រាស់សមាសធាតុ Resveratrol ច្រើនទំនងនឹងកើតមានជំងឺមហារីក ឬជំងឺបេះដូងគ្នានឹងបណ្តាជនដែលប្រើប្រាស់សារធាតុនេះតិចតួចបំផុតដែរ ។
សរុបសេចក្តីមក សមាសធាតុ Resveratrol ហាក់មិនផ្តល់អត្ថប្រយោជន៍អ្វីសូម្បីបន្តិចដល់សុខភាពអ្នកប្រើប្រាស់នោះឡើយ ។ ទោះជាយ៉ាងណា ការរកឃើញលើកនេះមិនបានទាត់ចោលនូវលទ្ធភាពដែលថា ស្រានិងប្រភពអាហារមានផ្ទុក Resveratrol ដទៃទៀតផ្តល់នូវអត្ថប្រយោជន៍ចំពោះសុខភាពនោះដែរ ប៉ុន្តែបានគូសបញ្ជាក់ថា អត្ថប្រយោជន៍សុខភាពនៃស្រាក្រហមនិងអាហារផ្សេងទៀតអាចបានមកពីសមាសធាតុផ្សេងដែលមិនមែនជា Resveratrol ៕
ចែករំលែកព័តមាននេះ