និស្សិតប្រមាណ៥០០នាក់ នៃសកលវិទ្យាល័យភូមិន្ទភ្នំពេញ សហការជាមួយមជ្ឈមណ្ឌលជាតិផ្តល់ឈាម ក្រោមការសហការឧបត្ថម្ភធំដោយក្រុមហ៊ុន វីតាល់ បានប្រារព្ធពិធីបរិច្ចាគឈាមដោយស្ម័គ្រចិត្តប្រចាំឆ្នាំ ក្រោមប្រធានបទ «ឈាមខ្ញុំ បេះដូងខ្ញុំ ជាតិខ្ញុំ» ដែលនឹងប្រារព្ធឡើងរយៈពេលពីរថ្ងៃ គឺចាប់ពីថ្ងៃទី១៧ ដល់ថ្ងៃទី១៨ មីនា ២០១៦ នៅក្នុងសាលដំបូលទូកនៃសកលវិទ្យាល័យ។
កម្មវិធីបរិច្ចាគឈាមលើកនេះ បានប្រព្រឹត្តទៅអមជាមួយនឹងការសម្តែងសិល្បៈរបស់ក្រុមនិស្សិត ដើម្បីញ៉ាំងកម្មវិធីឲ្យមានភាពរីករាយព្រមទាំងការលើកទឹកចិត្តចំពោះអ្នកផ្តល់ឈាមឲ្យមានចំនួនកាន់តែច្រើនកុះករផងដែរ។ ឈ្លៀតក្នុងឱកាសនោះផងដែរ លោក នៅ សុណ្ណារិទ្ធ ជាតំណាងលោក ជេត ជាលី សកលវិទ្យាធិការ នៃសកលវិទ្យាល័យភូមិន្ទភ្នំពេញ បានសម្តែងនូវការស្វាគមន៍យ៉ាងកក់ក្តៅចំពោះមជ្ឈមណ្ឌលជាតិផ្តល់ឈាម ក្រុមចលនាយុវជនកម្ពុជា ក៏ដូចជាក្រុមហ៊ុនវីតាល់ដែលបានចូលរួមចំណែក ក្នុងការរៀបចំកម្មវិធីសប្បុរសនេះឡើងម្តងទៀតក្នុងបរិយាណសកលវិទ្យាល័យភូមិន្ទភ្នំពេញ ហើយលោកស្រីពិតជាមានចិត្តសប្បាយរីករាយនៅពេលដែលឃើញប្អូនៗនិស្សិតយ៉ាងច្រើនកុះករ មានសណ្តានចិត្តសប្បុរសក្នុងការបរិច្ចាគឈាម ដែលទង្វើរបានបង្ហាញយ៉ាងច្បាស់ នូវឆន្ទៈសាមគ្គីភាពរបស់យុវជនខ្មែរជំនាន់ថ្មី។
សកលវិទ្យាល័យភូមិន្ទភ្នំពេញគឺតែងតែឈរនៅលំដាប់ទី១ ក្នុងនាមជាស្ថាប័នដែលមានចំនួនអ្នកផ្តល់ឈាមច្រើនជាងគេសម្រាប់មជ្ឈមណ្ឌលជាតិផ្តល់ឈាមប្រចាំឆ្នាំ។ កម្មវិធីលើកនេះក៏ដូចគ្នា យើងសង្ឃឹមថា សកលវិទ្យាលភូមិន្ទភ្នំពេញនៅតែរក្សាតំណែងរបស់ខ្លួនបានយ៉ាងល្អ។ នេះជាលើកទី៧ ហើយដែលសកលវិទ្យាល័យភូមិន្ទភ្នំពេញ បានអនុញ្ញាតឲ្យមជ្ឈមណ្ឌលជាតិផ្តល់ឈាមក្នុងការចុះទៅទទួលយកអំណោយឈាមសប្បុរសពីសិស្សនិស្សិតមកពីគ្រប់ដេប៉ាតាម៉ង់ ហើយកម្មវិធីលើកនេះក៏រំពឹងថា នឹងទទួលបានកំណត់ត្រាថ្មី ដោយអាចទទួលបានឈាម១០០០ប្លោក ដើម្បីប្រគល់ជូនដល់មជ្ឈមណ្ឌលជាតិផ្តល់ឈាមក្នុងការយកទៅផ្គត់ផ្គង់ដល់កង្វះខាតឈាមទូទាំងប្រទេស។ ចំពោះបងប្អូនជនរួមជាតិដែលមិនមែនជានិស្សិតសកលវិទ្យាល័យក៏ត្រូវបានស្វាគមន៍ និងលើកទឹកចិត្តឲ្យមកចូលរួមផ្តល់ឈាមផងដែរ។
លោកវេជ្ជបណ្ឌិត ហុក គឹមចេង ប្រធានមជ្ឈមណ្ឌលជាតិផ្តល់ឈាមបានធ្វើការថ្លែងអំណរគុណដល់និស្សិតនៃសាកលវិទ្យាល័យភូមិន្ទភ្នំពេញ ក៏ដូចជាសាកលវិទ្យាល័យជាតិ និងឯកជនដទៃទៀត ដែលបានធ្វើការបរិច្ចាគឈាមយ៉ាងច្រើនកុះករជូនដល់មជ្ឈមណ្ឌលក្នុងកំឡុងប៉ុន្មានខែចុងក្រោយនេះ។ លោកវេជ្ជបណ្ឌិត មានប្រសាសន៍បញ្ជាក់ថា ការបរិច្ចាគឈាម គឺការប៉ះពាល់ដល់សុខភាពនោះទេ ផ្ទុយវិញ វាជាសកម្មភាព អាចគឺអាចធ្វើឲ្យយើងក្លាយជាវីរបុរសម្នាក់ដែលអាចជួយសង្គ្រោះជីវិតមនុស្សបានដល់ទៅ៣នាក់ ក្នុងឈាមដែលបូមបានមួយប្លោក។ លោកវេជ្ជបណ្ឌិត ក៏បានរំលឹកដល់និស្សិតទាំងឡាយឲ្យពិសាទឹកឲ្យបានច្រើន បន្ទាប់ពីពួកគេបានបរិច្ចាគឈាមរួចលោកថា ទឹកវីតាល់ គឺជាទឹកពិសាដែលមានគុណភាពខ្ពស់ដែលស័ក្តិសមបំផុតការបន្ថែមជាតិទឹកសម្រាប់រាងកាយ ដើម្បីជំនួយដល់ការផលិតគ្រាប់ឈាមឡើងវិញរបស់រាងកាយ។
លោក អ៊ុំ វណ្ណៈ មន្ត្រីទំនាក់ទំនងសាធារណៈក៏ជាតំណាងក្រុមហ៊ុន វីតាល់ បាននិយាយថា ការឧបត្ថម្ភថ្ងៃនេះ អាចធ្វើទៅបានដោយមានការ ចូលរួមពីអតិថិជនរបស់វីតាល់ ក៏ដូចជាប្អូនៗទាំងអស់ដែលបានគាំទ្រដល់ផលិតផលគុណភាពខ្ពស់របស់ជាតិយើង និងការគាំទ្ររបស់អ្នកទាំងអស់គ្នាបានធ្វើឲ្យមូលនិធិ២៥៛ របស់យើងកាន់តែរីកធំ ទើបអាចឲ្យវីតាល់មានលទ្ធភាពឧបត្ថម្ភ និងគាំទ្រដល់កម្មវិធីមនុស្សធម៌នានា យ៉ាងសកម្មដូចសព្វថ្ងៃនេះ។
ទាក់ទងនឹងការឧបត្ថម្ភគាំទ្រនេះផងដែរលោក ជុង ហៀង ថាវសិទ្ធ នាយកផ្នែកទីផ្សារនៃក្រុមហ៊ុនវីអិនស៊ីខបភើរេសិន វីតាល់ បានមានប្រសាសន៍ថា វីតាល់ បានសហការ និងឧបត្ថម្ភដល់មជ្ឈមណ្ឌលជាតិផ្តល់ឈាមជាច្រើនឆ្នាំមកហើយ ព្រោះវីតាល់ គឺជាក្រុមហ៊ុនដែលឲ្យតម្លៃលើអំពើសប្បុរសធម៌ ជាពិសេសនៃការបរិច្ចាគឈាម ព្រោះមកទល់នឹងសម័យនេះ បើទោះជាវិជ្ជសាស្ត្រមានការរីកចម្រើនខ្លាំងយ៉ាងណាក៏ដោយ ក៏យើងមិនអាចផលិតគ្រាប់ឈាម ដើម្បីប្រើប្រាស់នៅឡើយ ដូច្នេះហើយមានមនុស្សច្រើននាក់ បាននឹងកំពុងរង់ចាំអំណោយឈាមរបស់យើង។
ក្រុមហ៊ុម វីតាល់ ត្រូវបានមើលឃើញថា បាននិងកំពុងចូលរួមយ៉ាងសកម្មក្នុងកម្មសប្បុរសធម៌នានា ក្នុងសង្គមដែលថ្មីនេះ ទាំងការផ្តល់ជំនួយ និងថវិកាដល់ស្ថាប័នសង្គមមួយចំនួន និងចំពោះបុគ្គលគំរូ និងខ្វះខាតក្នុងសង្គមផងដែរ។ វីតាល់ពិតជារីករាយនៅពេលដែលឃើញ ការសន្ទុះនៃការចូលរួមក្នុងសកម្មភាពមនុស្សធម៌ក្នុងសង្គមរបស់ប្រជាពលរដ្ឋខ្មែរទូទៅ ជាពិសេសប្អូនៗនិស្សិត ដូច្នេះហើយ វីតាល់ បេ្តជ្ញាថា នឹងនៅតែបន្តគាំទ្រយ៉ាងពេញទំហឹង ចំពោះកម្មវិធីសប្បុរសធម៌គ្រប់រូបភាពបន្ថែមទៀត ដើម្បីជាសក្ខីភាពនៃការចូលរួមរបស់អតិថិជនវីតាល់ក្នុងមូលនិធិ ២៥៛ ពីការលក់ទឹកមួយដប។
ចែករំលែកព័តមាននេះ