រាជធានីភ្នំពេញ ៖ ធនាគារRHB INDOCHINAបានសម្ពោធបើកសាខាថ្មីបន្ថែមរបស់ខ្លួនស្ថិតនៅតាមបណ្តោយមហាវិថីម៉ៅសេទុង កាលពីព្រឹកថ្ងៃទី១៨ មីនា ដោយមានការចូលរួមជាកិត្តិយសពីលោក លីម លូងសេង អគ្គនាយកនៃធនាគារ RHB INDOCHINAនិងថ្នាក់ដឹកនាំក្រោមឱវាទជាច្រើនរូបទៀត ។
លោក លីម លូងសេង អគ្គនាយកនៃធនាគារRHB INDOCHINAមានប្រសាសន៍ថា ធនាគារនឹងបន្តពង្រីកសាខាបន្ថែមទៀតដើម្បីឲ្យស្របទៅនឹងមហិច្ឆតារបស់សម្ព័ន្ធធនាគារក្នុងការប្រែក្លាយជាធនាគារឈានមុខមួយនៅក្នុងតំបន់ ។ ធនាគារមានបំណងពង្រីកខ្លួនក្នុងប្រទេសកម្ពុជា និងប្រើប្រាស់នូវបទពិសោធន៍និងជំនាញដើម្បីផ្តល់ជូនអតិថិជននូវផលិតផល និងសេវាកម្មហិរញ្ញវត្ថុពាក់ព័ន្ធនៅក្នុងការវិវត្តទីផ្សារ និងអាជីវកម្មនាពេលបច្ចុប្បន្ននេះ ។ លោកបន្តថា សាខាម៉ៅសេទុងនេះនឹងផ្តល់ជូនអតិថិជននូវផលិតផល និងសេវាកម្មទូលំទូលាយរាប់ទាំងការប្រើប្រាស់និងធ្វើពាណិជ្ជកម្ម ដែលរួមមានប្រតិបត្តិការផ្ទាល់ជាមួយបេឡាករសម្រាប់ប្រភេទគណនីចរន្ត គណនីសន្សំ និងគណនីបញ្ញើមានកាលកំណត់ សេវាប្តូរប្រាក់ សេវាហិរញ្ញប្បទានពាណិជ្ជកម្ម និងសម្បទានប្រាក់កម្ចី ។ សាខានេះក៏មានបំពាក់នូវបច្ចេកវិទ្យាចុងក្រោយនៃម៉ាស៊ីនអេធីអឹម
ដំបូងបង្អស់ដែលមានមុខងារបម្រើជូនអតិថិជន២៤ម៉ោងរួមមានការទទួលប្រាក់បញ្ញើ ដកប្រាក់បញ្ញើ ដាក់មូលប្បទានបត្រ និងដកទៅវិញទៅមករូបិយប័ណ្ណជាប្រាក់រៀល និងដុល្លារផងដែរ ។
RHB INDOCHINA Bank នៅមានកម្មវិធីលើកទឹកចិត្តសម្រាប់អតិថិជនថ្មីផងដែរដូចជា រាល់អតិថិជនបើកគណនីបញ្ញើ-សន្សំថ្មីជាមួយប្រាក់បញ្ញើអប្បបរមា៥០ដុល្លារ ឬការបើកគណនីចរន្តថ្មីជាមួយប្រាក់បញ្ញើអប្បបរមា២៥០ដុល្លារនឹងទទួលបានកាដូពិសេសក្នុងឱកាសបើកសម្ពោធសាខាថ្មីនេះ ។ លើសពីនេះ សម្រាប់អតិថិជនបើកគណនីមានកាលកំណត់ចាប់ពី៥.០០០ដុល្លារនឹងទទួលបានអត្រាការប្រាក់បន្ថែម០,៤៥ភាគរយលើអត្រាការប្រាក់ធម្មតាសម្រាប់ការតម្កល់ចាប់ពី៣ខែឡើងទៅ ៕
ចែករំលែកព័តមាននេះ