ថ្ងៃទី១៧ វិច្ឆិកា ឆ្នាំ២០១២ J.Alvarenga នៅភូមិCosta ភាគខាងត្បូងប្រទេសមុិចសុិក សម្រេចចិត្តទៅស្ទូចត្រីចុងសប្ដាហ៍ ។ មុនពេលចេញដំណើរ J.Alvarenga ជួលអ្នកនេសាទម្នាក់ឈ្មោះEzequiel Cordoba
ថ្ងៃទី១៧ វិច្ឆិកា ឆ្នាំ២០១២ J.Alvarenga នៅភូមិCosta ភាគខាងត្បូងប្រទេសម៉ិចស៊ិក សម្រេចចិត្តទៅស្ទូចត្រីចុងសប្ដាហ៍ ។ មុនពេលចេញដំណើរ J.Alvarenga ជួលអ្នកនេសាទម្នាក់ឈ្មោះEzequiel Cordoba ជាជនជាតិអែលសាល់វ៉ាឌ័រ អាយុ២២ឆ្នាំ ក្នុងតម្លៃប្រហាក់ប្រហែល៥០ដុល្លារអាមេរិកឱ្យជួយការងារស្ទូចត្រីរបស់ខ្លួនពេញមួយថ្ងៃ ។ ទូកនេសាទដ៏តូចរបស់ពួកគេពេលចេញពីច្រាំងសមុទ្របានបន្ដិចស្រាប់តែជួបព្យុះធំកើតឡើងដោយចៃដន្យធ្វើឱ្យក្រឡាប់ចាក់ចោលអាហារប្រចាំថ្ងៃ និងទឹកផឹកចូលសមុទ្រអស់រលីង… ។ តាំងពីពេលនោះមក គ្រួសាររបស់អ្នកទាំងពីរលែងទទួលបានដំណឹងអ្វីសូម្បីបន្ដិចពីពួកគេ ម្ល៉ោះហើយ ម្នាក់ៗគិតថាអ្នកទាំងពីរបាត់ខ្លួនកណ្ដាលផ្ទៃមេឃខ្មៅងងឹតនោះទៅហើយ ។
ស្រាប់តែ១៤ខែក្រោយ នាថ្ងៃទី៣០ មករា ឆ្នាំ២០១៤ គ្រួសារនេសាទមួយនៅប្រជុំកោះ Marshall ក្នុងសមុទ្រប៉ាស៊ីហ្វិក ប្រទះ J.Alvarenga ស្ថិតក្នុងស្ថានភាពស្ទើរស្លាប់ស្ទើររស់ តោងទូកតូចអណ្ដែតចូលច្រាំងមួយដែលនៅឃ្លាតពីកន្លែងចេញដំណើរដំបូង៩.០០០គីឡូម៉ែត្រ ។ ក្រោយព្យាបាលខ្លួនមួយរយៈក្នុងមន្ទីរពេទ្យ Majuro នៅកោះនោះ J.Alvarenga ក៏ត្រឡប់ទៅស្រុកកំណើតវិញ ក្រោមការអបអរសាទរយ៉ាងរំពងពីអ្នកស្រុក ។ មិនត្រឹមតែអបអរសាទរខ្ញៀវខ្ញារប៉ុណ្ណោះទេ គេនាំគ្នាផ្ដល់រហស្សនាមថា «នាយRobinson Crusoe សម័យទំនើប» ទៀត ។
ដំណើររឿងរបស់លោកJ.Alvarenga «ដ៏ពិបាកជឿ តែមានពិត» នេះល្បីសុសសាយស្ទើរពេញពិភពលោករហូតត្រូវសៀវភៅកំណត់ត្រាពិភពលោក Guinness ចាត់ទុកថា «អ្នករស់ឯកោកណ្ដាលមហាសាគររយៈពេលយូរបំផុតរហូតដល់៤៣៨ថ្ងៃ» ។
ពេលJ.Alvarenga ទៅប្រទេសអែលសាលវ៉ាឌ័រ ដើម្បីជួបម្ដាយរបស់Cordoba អ្នកកាសែតឈ្មោះ Jonathan Franklin របស់កាសែតប្រចាំថ្ងៃ The Guardina នៅអាមេរិកឡាទីន បានស្កាត់ជួបគាត់ សុំសម្ភាសគាត់ទាល់តែបាន រួចហើយសរសេរសៀវភៅពណ៌នាពីជីវិតរងគ្រោះរបស់គាត់ ដោយដាក់ចំណងជើងថា «៤៣៨ Days» ។
សៀវភៅនោះបោះពុម្ភជា២ភាសា គឺភាសាអេស្ប៉ាញ និងអង់គ្លេស ដោយគ្រឹះស្ថានបោះពុម្ភ EL Diario De Hoy កាលពីចុងខែតុលា ២០១៥ ក្លាយជារឿងផ្សងព្រេងលក់ដាច់បំផុតក្នុងឱកាសបុណ្យណូអែលចុងឆ្នាំ២០១៥ និងដើមឆ្នាំ២០១៦ នេះ នៅទ្វីបអាមេរិក និងអឺរ៉ុប ។ ឃើញសៀវភៅលក់ដាច់ពេក ហើយJ.Alvarenga ក៏បានទទួលកម្រៃយ៉ាងច្រើនតាមចំនួនសៀវភៅលក់ដាច់នោះ លោកមេធាវីរបស់គ្រួសារJ.Alvarenga ឈ្មោះDanilo Barrera បន្លុយពាក្យទារប្រាក់១លានដុល្លារអាមេរិក ព្រោះមុនពេលអ្នកកាសែតសុំសម្ភាសដើម្បីសរសេរសៀវភៅនោះ ខ្លួនមានគុណបំណាច់ប្រាប់របៀបផ្ដល់សម្ភាសន៍យ៉ាងណាឱ្យមានក្បាលកន្ទុយជុំវិញគ្រោះថ្នាក់១៤ខែ ឯកោកណ្ដាលមហាសមុទ្រប៉ាស៊ីហ្វិក ត្រូវស៊ីត្រីឆៅជាអាហារ និងហុតឈាមត្រីជំនួសទឹក ដើម្បីរក្សាជីវិតពីមួយថ្ងៃទៅមួយថ្ងៃ ។ បើកុំតែបានខ្លួនបង្រៀនរបៀបនិយាយឱ្យគេស្រួលស្ដាប់ ងាយសរសេរចេញជាសៀវភៅទេ សៀវភៅនោះក៏មិនមានខ្លឹមសារល្អលក់ដាច់ ម្លឹងៗដែរ ។
ខណៈ J.Alvarenga កំពុងខ្វាយខ្វល់ចំពោះការគម្រាមរបស់មេធាវីប្រចាំគ្រួសារខ្លួន ស្រាប់តែមុនថ្ងៃបុណ្យណូអែលចុងឆ្នាំ២០១៥ សាច់ញាតិរបស់Ezequiel Cordoba អ្នកដែលខ្លួនជួលឱ្យជួយការងារពេលទៅស្ទូចត្រីកម្សាន្ដនោះ ដាក់បណ្ដឹងឡើងតុលាការកំពូលប្រទេសអែលសាល់វ៉ាឌ័រ ទារជំងឺចិត្តចំនួន១លានដុល្លារអាមេរិកដែរ ដោយចោទJ.Alvarenga ថាគ្មានក្ដីមេត្ដា ដាច់ចិត្តស៊ីសាច់មិត្តរួមដំណើរទើបអាចទ្រាំរស់បានយូរដល់ម្ល៉ឹងនៅកណ្ដាលមហាសាគរ ។
យោងលើការពណ៌នាក្នុងសៀវភៅ «៤៣៨ Day» ថា ក្រោយពីនាំគ្នាបាចទឹកទូកបានជិះវិញបន្ទាប់ពីស្ងប់ព្យុះនោះ ៤ថ្ងៃក្រោយ Cordoba ក៏ស្លាប់បាត់បង់ជីវិត ព្រោះគេមិនអាច «ស៊ីត្រីឆៅ និងផឹកឈាមត្រី» ដូចJ.Alarsengaបាន ។ មុនពេលស្លាប់ Cordoba និយាយ ខ្សាវៗផ្ដាំផ្ញើច្រើនរឿង ក្នុងនោះសុំឱ្យJ.Alvarenga បើនៅរស់សូមទៅជួបសួរសុខទុក្ខម្ដាយជរារបស់ខ្លួននៅប្រទេសអែលសាល់វ៉ាឌ័រ និងកុំស៊ីសាច់ខ្លួនឱ្យសោះ ។ ដោយមានឃ្លានេះ ទើបសាច់ញាតិរបស់Cordoba នាំគ្នាសន្និដ្ឋានទៅJ.Alvarenga ពិតជាស៊ីសាច់Cordoba ទើបអាចរស់នៅបានយូរដល់ម្ល៉ឹង មិនមែនរស់ដោយសារសីុត្រីឆៅ និងផឹកឈាមត្រីជំនួសទឹកតែមួយមុខទេ ។
ចំពោះបណ្ដឹងទាំងនេះ លោកមេធាវី Ricardo Cucalon ដែលស្ម័គ្រចិត្តការពារក្ដីឱ្យJ.Alvarenga និយាយប្រាប់អ្នកកាសែតថា «ប្រសិនបើតុលាកាត់ក្ដីឱ្យដើមបណ្ដឹងឈ្នះមែននោះ កូនក្ដីរបស់ខ្ញុំទោះលក់អស់កេរអាករដែលម្ដាយឪពុកចែកឱ្យ និងមូលដ្ឋានអាជីវកម្មដែលកំពុងដំណើរការសព្វថ្ងៃទៀត យ៉ាងច្រើនសងបានត្រឹម១ភាគ១០នៃចំនួនទឹកប្រាក់ដែលគេទាមទារប៉ុណ្ណោះ» ។
ចំណែកបណ្ដឹងរបស់សាច់ញាតិ Cordoba ខាងប្រទេសអែលសាល់វ៉ាឌ័រវិញ លោកសាស្ដ្រាចារ្យSamantha Pegg ប្រធានផ្នែកច្បាប់នៅមហាវិទ្យាល័យ Notting Ham ប្រទេសអង់គ្លេស បកស្រាយដូចតទៅ ទោះបីជា J.Alvarenga ស៊ីសាច់មិត្តរួមដំណើរមែនក៏គ្មានទោសដែរ ទាល់តែលោកសម្លាប់មនុស្សទាំងរស់ដើម្បីស៊ីសាច់ទើបមានទោសពីបទមនុស្សឃាត ព្រោះការស៊ីនោះ គឺស៊ីដោយបង្ខំចិត្តខានមិនបានដើម្បីបន្ដជីវិតតែប៉ុណ្ណោះ ។ លោកសាស្ដ្រាចារ្យL.Pagg លើកឧទាហរណ៍រឿងលេចធ្លោក្នុងប្រវត្តិសាស្ដ្រ ដូចជារឿងគ្រោះថ្នាក់យន្ដហោះ នៅជួរភ្នំ Andes ខាងអាមេរិកឡាទីន នាឆ្នាំ១៩៧២ ។ គ្រោះថ្នាក់នោះបណ្ដាលឱ្យអ្នកដំណើរស្លាប់អស់ជាច្រើន ចំណែកអ្នកនៅរស់បង្ខំចិត្តស៊ីសាច់អ្នកស្លាប់ ដើម្បីបន្ដជីវិតបាន៧២ថ្ងៃ កណ្ដាលព្រិលដ៏ត្រជាក់ទម្រាំក្រុមសង្គ្រោះរកឃើញ ។
ករណីពលរដ្ឋប្រទេសដែនកោះដូមីនិចជិះនាវាធ្វើអន្ដោប្រវេសន៍ខុសច្បាប់ទៅសហរដ្ឋអាមេរិក កាលពីឆ្នាំ២០០ ពេលនោះអ្នកនៅរស់បានស៊ីសាច់សពអស់ពីរបីក្នុងចំណោមអ្នកស្លាប់៦០នាក់ដោយសារលិចនាវា មុនពេលក្រុមសង្គ្រោះរកឃើញនៅ៣សប្ដាហ៍ក្រោយ… ។ អ្នកនៅរស់ទាំងប៉ុន្មានដែលលើកឡើងនោះ គ្មានអ្នកណាម្នាក់ត្រូវកាត់ទោសពីបទស៊ីសាច់មនុស្សឡើយ ។
លោកមេធាវីRicardo Culcalon ដែលស្ម័គ្រចិត្តការពារក្ដីឱ្យJ.Alvarenga និយាយទាំងស្រងេះស្រងោចក្នុងចិត្តថា «សរុបមករឿងនេះបណ្ដាលមកពីJ.Alvarenga ល្បីល្បាញពេក ដល់ថ្នាក់ជាប់ឈ្មោះក្នុងសៀវភៅកំណត់ត្រាពិភពលោកទៀត ទើបចុងក្រោយក្លាយទៅជារឿងខ្លួនឯងធ្វើបាបខ្លួនឯងយ៉ាងនេះ… ឱ!លោកអើយ!» ៕
ចែករំលែកព័តមាននេះ