រាជធានីភ្នំពេញ ៖ រឿងរ៉ាវស្នេហាមួយដែលភាគីខាងស្រីទំនងឈានដល់ខ្សោះអស់រសជាតិ បានរត់ចោលភាគីខាងប្រុសបង្កឱ្យមានការភ្ញាក់ផ្អើលទាំងថ្ងៃ នៅកែងផ្លូវជាតិលេខ២ និងផ្លូវ៦០ម៉ែត្រ ទល់មុខវត្តចាក់អង្រែក្រោម ស្ថិតក្នុងភូមិទួលរកា សង្កាត់ចាក់អង្រែក្រោម ខណ្ឌមានជ័យ កាលពីវេលាម៉ោង១០និង៣០នាទីព្រឹក ថ្ងៃទី១៧ ខែមីនា។ ការភ្ញាក់ផ្អើលនេះដោយសារតែភាគីខាងប្រុសជាយុវជនម្នាក់បានជិះម៉ូតូឌុបតាមកាក់រថយន្តតាក់ស៊ី ដែលនារីជាអតីតសង្សារបែកចិត្តព្យាយាមគេចមុខ ព្រោះតែអស់អាល័យសូម្បីតែប៉ុនក្រចក ។
ជុំវិញរឿងរ៉ាវខាងលើនេះ នៅកន្លែងកើតហេតុ ស្នេហ៍ដាច់អាល័យមួយគូខាងលើនោះ មិនបានបញ្ជាក់ពីអត្តសញ្ញាណឱ្យដឹងឡើយ ហើយពួកគេបាននាំគ្នាឡើងជិះរថយន្តតាក់ស៊ីជាមួយគ្នាចេញពីចំណុចខាងលើភ្លាមៗ ដោយសារមានការខ្មាសអៀនចំពោះរឿងអាស្រូវរបស់ខ្លួន ដែលធ្វើឱ្យអ្នកធ្វើដំណើរតាមផ្លូវផ្អើលមើលគ្រប់គ្នា ។
ទោះជាយ៉ាងណាក៏ដោយ ប្រភពព័ត៌មាននៅកន្លែងកើតហេតុបានឱ្យដឹងថា ដំបូងឡើយនារីរូបស្រស់វ័យក្មេងស្លៀកខោខូវប៊យស្នាប់ភ្លៅបញ្ចេញសាច់សខ្ចីខាងលើនេះ បានចុះពីលើរថយន្តតាក់ស៊ី ហើយស្តីឱ្យយុវជនម្នាក់ដែលពាក់មួកសុវត្ថិភាពបិទបាំងមុខថា ហេតុអ្វីបានជាតាមឃាត់តាក់ស៊ី ។ ជាការឆ្លើយតប នៅពេលជាមួយគ្នានោះដែរ យុវជនដែលឃាត់រថយន្តនោះរៀបរាប់ថា «ខ្លួនជាប្តីរបស់នាង» តែភ្លាមៗនោះនារីរូបស្រស់ដដែលនេះបដិសេធថា មិនមែនជារឿងប្តីប្រពន្ធទេ គ្រាន់តែធ្លាប់រស់នៅជាសង្សារនឹងគ្នាតែប៉ុណ្ណោះ ។
តាមនារីរូបស្រស់សាច់សខ្ចីនេះរៀបរាប់ថា រូបនាងត្រូវតែបែកគ្នា ព្រោះមិនអាចរស់នៅជាមួយគ្នាកើតទេ ហើយម្យ៉ាងវិញទៀតខ្លួនគ្រាន់តែត្រឹមជាសង្សារនឹងគ្នាប៉ុណ្ណោះ គ្មានពាក់ព័ន្ធនឹងរឿងរ៉ាវប្តីប្រពន្ធពីមុនមកទេ ដូច្នេះសូមកុំមកតាមរំខានរូបនាង ។
ទោះបីជាបែបណា ភាគីខាងយុវជនវិញមិនបានបោះបង់ស្នាមស្នេហ៍ដែលពួកគេបង្កាត់វាឱ្យឆេះទៅហើយ រលត់ទៅវិញភ្លាមៗបាននោះទេ ដោយទទូចរហូតលើកដៃសំពះ អង្វរនារីរូបស្រស់នោះថា កុំបែកពីបងអី និងបានព្យាយាមតាមអង្វរលួងលោមនារីរូបស្រស់នោះ នៅចំពោះមុខមនុស្សត្រៀបត្រា ទំនងលែងខ្មាស់អៀនហើយ ដើម្បីបានរួមរស់ជួបជុំគ្នាក្នុងលក្ខណៈ ជាប្តីប្រពន្ធតទៅទៀត ។
ជុំវិញរឿងរ៉ាវខាងលើនេះ វាជារឿងមួយគួរឱ្យអាណិតដល់ភាគីខាងបុរសដែរ ព្រោះខ្លួនបានស្រែកទ្រហោយំផុសចេញពីទឹកចិត្ត ដោយបានសម្តែងការនឹកស្រណោះអាឡោះអាល័យ មិនដាច់ចិត្តផ្តាច់ស្នេហ៍ ពីនារីដែលខ្លួនស្រឡាញ់ ហើយបែរជានាងព្យាយាមរត់គេច ពីក្រសែភ្នែកខ្លួនទៅវិញ ។
ឱស្នេហា ! វាពិតជាធំធេងមែន សម្រាប់អន្ទាក់ស្នេហ៍ ដែលយុវជនរូបនេះអាចឆក់បេះដូងនាងបាននោះ ប្រហែលមិនមែនបានយកមកថ្នាក់ថ្នមដោយងាយៗនោះទេ ។ ដូច្នេះហើយទើបគេនៅតែសុំឱ្យនាងដាក់ទានស្នេហ៍បន្តទៀត ។ មិនដឹងថា ល្បែងស្នេហ៍ដែលពួកគេកំពុងលេងនេះ អាចជួបសុភមង្គលឬបែបណានោះទេ ព្រោះភ្លាមៗខាងយុវជន បានបើកទ្វាររថយន្តតាក់ស៊ីឡើងជិះជាមួយនារីរូបនោះចេញដំណើរបាត់ទៅ ដោយមានអន្តរាគមន៍ពីសំណាក់សន្តិសុខតាមដងផ្លូវផងដែរ ៕
ចែករំលែកព័តមាននេះ