រាជធានីភ្នំពេញ ៖ ភេសជ្ជៈ M-150 សហការជាមួយក្រុមហ៊ុន SAYAM INTERNATIONAL CO., LTD នឹងរៀបចំការប្រកួតកីឡាកាច់ដៃដែលជាប្រភេទកីឡាដំបូងគេនៅកម្ពុជា មិនធ្លាប់មានពីមុនមក សម្រាប់សាធារណជន
រាជធានីភ្នំពេញ ៖ ភេសជ្ជៈ M-150 សហការជាមួយក្រុមហ៊ុន SAYAM INTERNATIONAL CO., LTD នឹងរៀបចំការប្រកួតកីឡាកាច់ដៃដែលជាប្រភេទកីឡាដំបូងគេនៅកម្ពុជា មិនធ្លាប់មានពីមុនមក សម្រាប់សាធារណជនទូទៅទូទាំងប្រទេសកម្ពុជា ។ ប្រភេទកីឡានេះនឹងចាប់ផ្ដើមធ្វើនៅតាមបណ្ដាខេត្តនានា នៃព្រះរាជាណាចក្រកម្ពុជា ដោយចាប់ផ្ដើមដំបូងនៅក្នុងខេត្តព្រះសីហនុ ថ្ងៃទី២៨ មីនា ២០១៦ ។
លោក សាយ៉ាម រ៉ាម៉ាស៊ូត ពីក្រុមហ៊ុន SAYAM INTERNATIONAL CO., LTD ថ្លែងនៅក្នុងសន្និសីទសារព័ត៌មានមួយកាលពីថ្ងៃទី១៤ មីនា ២០១៦ នៅសណ្ឋាគារ អាំងទែរកុងទីណង់តាល់ ឱ្យដឹងថា កម្មវិធីនេះរៀបចំឡើងក្នុងគោលបំណងឲ្យសាធារណជនទូទៅ ជាពិសេសចំពោះអ្នកដែលមានចំណាប់អារម្មណ៍ជាមួយការប្រកួតកាច់ដៃ បានចូលរួមប្រកួតដោយមិនប្រកាន់ថាអ្នកនោះជាកម្មករ កសិករឡើយ សំខាន់គឺអ្នកចូលរួមប្រកួតត្រូវមានលក្ខណៈសម្បត្តិត្រូវជាមួយនឹងលក្ខខណ្ឌដែលផ្ដល់ជូន ។
លោកបន្តថា ការប្រកួតនេះនឹងចាប់ផ្តើមស្វែងរកបេក្ខជនដោយចុះទៅតាមបណ្តាខេត្តក្រុងទាំង២៤ ចាប់ពីថ្ងៃទី២៨ ខែមីនា ឆ្នាំ២០១៦ រហូតដល់ថ្ងៃទី២ ខែកក្កដា ឆ្នាំ២០១៦ ដើម្បីប្រកួតជម្រុះ និងជ្រើសយកបេក្ខជនតំណាងខេត្តនីមួយៗចំនួន៣រូបក្នុងប្រភេទទម្ងន់៣ខុសគ្នា គឺ ប្រភេទទម្ងន់ស្រាល ប្រភេទទម្ងន់កណ្តាល និងប្រភេទទម្ងន់ធ្ងន់ ដើម្បីធ្វើការប្រកួតដណ្តើមជើងឯកM-150វគ្គផ្តាច់ព្រ័ត្រនៅរាជធានីភ្នំពេញ ព្រមទាំងមានការផ្សាយផ្ទាល់នៅតាមស្ថានីយទូរទស្សន៍ផងដែរ ។
លោកបន្ថែមថា បេក្ខជនគ្រប់រូបអាចចូលរួមប្រកួតបានដោយសេរី តែចាំបាច់ត្រូវគោរពតាមលក្ខខណ្ឌដែលមានដូចជា ត្រូវមានអាយុចាប់ពី១៨ឆ្នាំឡើងទៅ មានសញ្ជាតិខ្មែរ មានកាយសម្បទារឹងមាំនិងមានទំនុកចិត្តលើខ្លួនឯង អាចមកដាក់ពាក្យដោយផ្ទាល់នៅតាមស្តង់ M-150 ដែលនឹងចុះទៅតាមបណ្តាខេត្តក្រុង ។ សម្រាប់រង្វាន់ចំពោះអ្នកលេខ១ប្រចាំខេត្តនឹងទទួលបានទឹកប្រាក់សុទ្ធចំនួន២.៤០០.០០០រៀលស្មើនឹង៦០០ដុល្លារគ្រប់ប្រភេទទម្ងន់ ហើយ១២.០០០.០០០រៀលស្មើនឹង៣.០០០ដុល្លារសម្រាប់អ្នកលេខ១ទូទាំងប្រទេសគ្រប់ប្រភេទទម្ងន់ ។
តំណាងទីផ្សាររបស់ភេសជ្ជៈ M-15 ក៏បានឱ្យដឹងថា ការប្រកួតនេះមានគណៈកម្មការវិនិច្ឆ័យត្រឹមត្រូវ ហើយក៏មានក្រុមគ្រូពេទ្យ សម្រាប់ពិនិត្យមើលក្រែងមានហេតុការណ៍ណាមួយកើតឡើងចំពោះកីឡាករក្នុងពេលប្រកួតជាដើម ។ ចំពោះព្រឹតិ្តការណ៍នេះ ក្រុមហ៊ុនរំពឹងថា នឹងមានអ្នកចូលរួមច្រើនដោយសារតែប្រភេទកីឡានេះថ្មីសម្រាប់កម្ពុជាដែលមិនធ្លាប់រៀបចំប្រកួតពីមុនមក ៕
ចែករំលែកព័តមាននេះ