ការស្រាវជ្រាវថ្មីមួយដែលចុះផ្សាយក្នុងព្រឹត្តិបត្រវេជ្ជសាស្ត្ររបស់អង់គ្លេសឈ្មោះ The Lancet Diabetes& Endocrinology បានអះអាងថា ការវះកាត់បញ្ចុះទម្ងន់ខ្លួនអាចជួយឱ្យបុគ្គលធាត់ៗកាត់បន្ថយគ្រោះហានិភ័យ
ការស្រាវជ្រាវថ្មីមួយដែលចុះផ្សាយក្នុងព្រឹត្តិបត្រវេជ្ជសាស្ត្ររបស់អង់គ្លេសឈ្មោះ The Lancet Diabetes& Endocrinology បានអះអាងថា ការវះកាត់បញ្ចុះទម្ងន់ខ្លួនអាចជួយឱ្យបុគ្គលធាត់ៗកាត់បន្ថយគ្រោះហានិភ័យកើតជំងឺទឹកនោមផ្អែមប្រភេទ-២បានប្រហែលជា៨០ភាគរយ ។ លើសទម្ងន់ខ្លួនឬរាងកាយមានសភាពធាត់ខ្លាំង គឺជាកត្តាហានិភ័យចម្បងនៃជំងឺទឹកនោមផ្អែលប្រភេទ-២ ។
ប្រើប្រាស់កំណត់ត្រាសុខភាពពី Clinical Practice Research Datalink នៃចក្រភពអង់គ្លេស ពួកអ្នកស្រាវជ្រាវមកពីសាកលវិទ្យាល័យ King’s College Londonបានវាយតម្លៃពីប្រសិទ្ធភាពនៃនិតិវិធីបញ្ចុះទម្ងន់បណ្តោះអាសន្នដោយការវះកាត់ទៅលើការអភិវឌ្ឍរបស់ជំងឺទឹកនោមផ្អែម ។
រយៈពេល១២ឆ្នាំ ក្រុមអ្នកស្រាវជ្រាវបានពិនិត្យឃើញមាន មនុស្សធំដែលធាត់ជ្រុល២១៦៧នាក់បានវះកាត់បញ្ចុះទម្ងន់ខ្លួនមួយលើកក្នុងចំណោមការវះកាត់របស់ពួកគេ៣លើក ។
អំឡុងពេលពិសោធ អ្នកស្រាវជ្រាវបានកត់ត្រាឃើញមានអ្នកកើតជំងឺទឹកនោមផ្អែម៣៨នាក់ ក្នុងចំណោមអ្នកដែលវះកាត់បញ្ចុះទម្ងន់។ ប្រៀបធៀបទៅនឹងក្រុម១៧៧នាក់ផ្សេងទៀត គឺថា អត្រាកើតជំងឺទឹកនោមផ្អែមរបស់ក្រុមវះកាត់បញ្ចុះទម្ងន់ត្រូវបានកាត់បន្ថយប្រមាណជា ៨០ភាគរយ បើទោះជាបូកបញ្ចូលកត្តាហានិភ័យសំខាន់ៗមួយចំនួនមានដូចជា លើសខ្លាញ់កូឡេស្តេរ៉ូល លើសឈាមនិងជក់បារីកជាដើម ។
វេជ្ជបណ្ឌិត Jacques Himpens មកពីសាកលវិទ្យាល័យមន្ទីរពេទ្យ Saint Pierre ក្រុងព្រុចសែលថ្លែងថា៖ «ថ្វីបើលទ្ធផលលើកនេះបានជួយឱ្យយើងបោះជំហានកាន់តែកៀកនឹងវិធីសាស្ត្រកាត់បន្ថយហានិភ័យជំងឺទឹកនោមផ្អែមដោយការវះកាត់ក្តី ប៉ុន្តែមានសំណួរជាច្រើនដែលយើងនៅពុំទាន់ឆ្លើយបាន ។ ដូច្នេះ យើងត្រូវរកភស្តុតាងបន្ថែមទៀតមកបញ្ជាក់នូវការពិត» ៕
ចែករំលែកព័តមាននេះ