កម្លាំងយោធាថៃប្រចាំការតាមបន្ទាត់ព្រំដែនថៃ-កម្ពុជា នៅក្នុងភូមិសាស្ត្រស្រុកតាប្រាយ៉ា កាលពីថ្ងៃទី០៨ ខែតុលា ឆ្នាំ២០២១ ក្រោយពីទទួលបានសេចក្ដីរាយការណ៍មកថា
ខេត្តបន្ទាយមានជ័យ ៖ កម្លាំងយោធាថៃប្រចាំការតាមបន្ទាត់ព្រំដែនថៃ-កម្ពុជា នៅក្នុងភូមិសាស្ត្រស្រុកតាប្រាយ៉ា កាលពីថ្ងៃទី០៨ ខែតុលា ឆ្នាំ២០២១ ក្រោយពីទទួលបានសេចក្ដីរាយការណ៍មកថា មានករណីលួចនាំម៉ូតូបញ្ជូនទៅលក់ឲ្យខ្មែរតាមច្រករបៀង នៅចំណុចបរិវេណភូមិរ៉មត្រៃ ស្ថិតក្នុងឃុំទព័ស្ដេច ស្រុកតាប្រាយ៉ា ខេត្តស្រះកែវ សមត្ថកិច្ចថៃក៏បានចុះប្រតិបត្តិការល្បាតត្រួតពិនិត្យ និងឃាត់ខ្លួនបណ្ដាអ្នកលួចនាំម៉ូតូបញ្ជូនទៅលក់នៅប្រទេសជិតខាងចំនួន៦គ្រឿង ព្រមទាំងឃាត់ខ្លួនជនជាប់សង្ស័យចំនួន៥នាក់ទៀតផង។
បន្ទាប់ពីធ្វើការត្រួតពិនិត្យរួចហើយ សមត្ថកិច្ចថៃ ក៏បានរកឃើញថា មានវត្ថុតាងម៉ូតូចំនួន៦គ្រឿង រួមមាន៖ ម៉ូតូម៉ូតូ ម៉ាក Honda Scopy ពណ៌សចំនួន៣គ្រឿង, ម៉ូតូ Honda ADV ពណ៌ខ្មៅ ចំនួន២គ្រឿង និងម៉ូតូម៉ាក Honda ADV ពណ៌ក្រហម ១គ្រឿង និងចាប់ខ្លួនជនត្រូវចោទដែលជាជនជាតិថៃ បានចំនួន៥នាក់ ដែលអ្នកទាំងអស់នោះរស់នៅក្នុងស្រុកតាប្រាយ៉ា ខេត្តស្រះកែវ ។
ក្រោយពេលសមត្ថកិច្ចសួរចម្លើយ បុរសជនជាតិថៃម្នាក់ឈ្មោះ សុ វីត បានសារភាពថា ពួកគេស៊ីឈ្នួលពី (ចែ ណាង) មិនស្គាល់នាមត្រកូលពិត ដោយជួលឲ្យបើកម៉ូតូបញ្ជូនទៅឲ្យអ្នកទិញជាជនជាតិខ្មែរ ដោយបានថ្លៃឈ្នួលក្នុងម៉ូតូ១គ្រឿងតម្លៃ៥០០បាត។
ដោយផ្អែកលើចម្លើយសារភាព និងមានវត្ថុតាងជាក់ស្តែងខាងលើនេះ បច្ចុប្បន្នជនសង្ស័យទាំង៥នាក់ ត្រូវបានសមត្ថកិច្ចស្រុកតាប្រាយ៉ា បញ្ជូនទៅឲ្យសមត្ថកិច្ចជំនាញ ដើម្បីចាត់ការតាមនីតិវិធីបន្ត៕
ចែករំលែកព័តមាននេះ