ប្រើប្រាស់រមៀតជួយទប់ស្កាត់ការរលាករាងកាយ
តាមការស្រាវជ្រាវបែបវិទ្យាសាស្ត្របានរកឃើញថា មើមរមៀតដែលជាគ្រឿងផ្សំសំខាន់មួយក្នុងសម្លការីមានសក្តានុពលប្រឆាំងនឹងការរលាកក្នុងរាងកាយ និងជួយបង្កើនសុខភាពតាមមធ្យោបាយច្រើនយ៉ាង ។
តាមការស្រាវជ្រាវបែបវិទ្យាសាស្ត្របានរកឃើញថា មើមរមៀតដែលជាគ្រឿងផ្សំសំខាន់មួយក្នុងសម្លការីមានសក្តានុពលប្រឆាំងនឹងការរលាកក្នុងរាងកាយ និងជួយបង្កើនសុខភាពតាមមធ្យោបាយច្រើនយ៉ាង ។
ដោយសារមានគ្រូឱសថបុរាណមួយចំនួននិយមយករមៀតទៅកែច្នៃប្រើជាថ្នាំព្យាបាលជំងឺដូចជា អាលែកហ្ស៊ី ទឹកនោមផ្អែម និងដំបៅរលាកជាដើមនោះ នាំឱ្យបណ្តាអ្នកវិទ្យាសាស្ត្រជាច្រើនចាប់អារម្មណ៍ និងងាកមកបង្កើតការពិសោធពីប្រសិទ្ធភាពរបស់វាជាហូរហែ ។
ដោយឡែក ការសិក្សាថ្មីចុងក្រោយនេះដែលធ្វើឡើងដោយអ្នកស្រាវជ្រាវមកពីសាកលវិទ្យារដ្ឋអូហៃយ៉ូ សហរដ្ឋអាមេរិកបានរកឃើញថា ប្រសិទ្ធភាពជីវសាស្ត្ររបស់រមៀតបានផ្តល់អត្ថប្រយោជន៍ដល់រាងកាយទាំងមូលដោយអាចប្រឆាំងនឹងជំងឺមួយចំនួនបាន ។
សាស្ត្រាចារ្យ Nicholas Young ជាអ្នកដឹកនាំការសិក្សាបានថ្លែងថា មានហេតុផលមួយដែលសមាសធាតុរបស់រមៀតត្រូវបានគេប្រើក្នុងឱសថបណ្តាប្រទេសលោកខាងលិចអស់រាប់រយឆ្នាំមកនេះ ។ ការសិក្សាលើកនេះបានបង្ហាញថា យើងបានកត់សម្គាល់ឃើញមានមធ្យោបាយដ៏ល្អប្រសើរនិងកាន់តែមានប្រសិទ្ធភាពលើការប្រើប្រាស់រមៀត ព្រមទាំងដឹងថា តើជំងឺណាខ្លះដែលគួរប្រើវាដើម្បីទាញផលប្រយោជន៍ពីម្សៅប្រឆាំងនឹងការរលាករបស់វា ។
ចុះផ្សាយនៅលើព្រឹត្តិបត្រវិទ្យាសាស្ត្រ PLOS ONE ក្រុមអ្នកស្រាវជ្រាវបញ្ជាក់ថា ខ្លួនបានលាយម្សៅរមៀតជាមួយប្រេងល្ហុងខ្វងនិងសមាសធាតុគីមី Polyethylene glycol (PEG)ដើម្បីឱ្យបានទៅជាវត្ថុរាវដែលពោះវៀនងាយស្រូបយកទៅចែកចាយដល់ជាលិកានិងចរន្តឈាម ។ បណ្តាសត្វកណ្តុរដែលគេយកពិសោធដាក់ឱ្យស៊ីថ្នាំផលិតពីរមៀតបានបិទចោលនូវប្រតិកម្មនាំឱ្យរលាកដែលជាប់ទាក់ទិននឹងបញ្ហាសុខភាពមួយចំនួនក្នុងនោះមានជំងឺបេះដូងនិងសភាពធាត់លើសទម្ងន់ជាដើម ។
លោកសាស្ត្រាចារ្យ Young បានបន្តថា៖ «យើងយល់ថា សមាសធាតុក្នុងរមៀត ថ្ងៃណាមួយអាចនឹងបានត្រូវយកទៅប្រើក្នុងទម្រង់ជាថ្នាំប៉ូវសុខភាពទប់ស្កាត់បណ្តាជំងឺមួយចំនួននិងជាថ្នាំព្យាបាលប្រឆាំងការរលាក…» ៕
ចែករំលែកព័តមាននេះ