ក្រុមអ្នកស្រាវជ្រាវនៅសាកលវិទ្យាល័យEdinburgh និងសាកលវិទ្យាល័យ Southampton ចក្រភពអង់គ្លេសបានរកឃើញថា ពន្លឺថ្ងៃ អាចជួយគ្រប់គ្រងនូវការរំលាយអាហារដើម្បីបន្ថយល្បឿននៃការឡើងទម្ងន់
ក្រុមអ្នកស្រាវជ្រាវនៅសាកលវិទ្យាល័យEdinburgh និងសាកលវិទ្យាល័យ Southampton ចក្រភពអង់គ្លេសបានរកឃើញថា ពន្លឺថ្ងៃ អាចជួយគ្រប់គ្រងនូវការរំលាយអាហារដើម្បីបន្ថយល្បឿននៃការឡើងទម្ងន់ និងការវិវឌ្ឍទៅមុខរបស់ជំងឺទឹកនោមផ្អែម ។
នៅក្នុងការពិសោធរកមូលហេតុពិត អ្នកវិទ្យាសាស្ត្រជនជាតិអង់គ្លេសបានយកសត្វកណ្តុរដែលរោមរបស់វាត្រូវបានកោរចេញ ទៅដាក់ឱ្យត្រូវនឹងពន្លឺអ៊ុលត្រាស្វាយ គឺជាកាំរស្មីដូចគ្នានឹងពន្លឺថ្ងៃ ។ បន្ទាប់ពីប៉ះនឹងពន្លឺរួចមក ស្បែករបស់សត្វកណ្តុរទាំងនោះបានបញ្ចេញនូវអុកស៊ីតនីទ្រិច-ជាសារធាតុគីមីសម្រាប់គ្រប់គ្រងសម្ពាធឈាមដោយការពង្រីកសរសៃឈាម និងបង្កើនអុកស៊ីសែនក៏ដូចជា កម្លាំងនិងការស៊ូទ្រាំ ។ បន្ទាប់មកទៀត សត្វកណ្តុរបានបញ្ចេញនូវរោគសញ្ញានៃជំងឺមេតាប៉ូលីទាក់ទងទៅនឹងជំងឺទឹកនោមផ្អែម តួយ៉ាងដូចជាកម្រិតជាតិស្ករមិនធម្មតា និងរ៉េស៊ីស្តង់អាំងស៊ុយលីនជាដើម ។
លោកបណ្ឌិត Martin Feelisch មកពីសា កលវិទ្យាល័យ Southampton បានថ្លែងថា ការសង្កេតទាំងនេះបានចង្អុលបង្ហាញកាន់តែច្បាស់ថា បរិមាណនៃអុកស៊ីតនីទ្រិចដែលបញ្ចេញពីស្បែក អាចនឹងផ្តល់អត្ថប្រយោជន៍ មិនត្រឹមតែលើបេះដូង និងសរសៃឈាមប៉ុណ្ណោះទេ ប៉ុន្តែវាផ្តល់ជាមធ្យោបាយដល់រាងកាយគ្រប់គ្រងឱ្យមានរបៀបរៀបរយនូវការរំលាយអាហារផងដែរ ។
រីឯលោកបណ្ឌិត Richard Weller មកពីសាកលវិទ្យាល័យ Edinburgh បាននិយាយថា តាមរយៈការសិក្សាពីជំងឺរាតត្បាត យើងដឹងបានថា បុគ្គលដែលត្រូវពន្លឺថ្ងៃគ្រប់គ្រាន់រមែងជាអ្នកមានអាយុវែង ។ លទ្ធផលនៃការសិក្សាតួយ៉ាងដូចជាលើកនេះគឺបានជួយយើងឈ្វេងយល់ពីហេតុដែលពន្លឺថ្ងៃផ្តល់អត្ថប្រយោជន៍ចំពោះមនុស្ស ។
យ៉ាងណាក៏ដោយ យើងចាំបាច់ត្រូវចាំថា មហារីកស្បែកគឺមិនមែនជាជំងឺតែមួយមុខដែលអាចសម្លាប់យើងបាននោះទេ ហើយគួរតែថ្លឹងថ្លែងឱ្យមានតុល្យភាពនូវការយល់ឃើញរបស់យើងម្នាក់ៗទៅលើពន្លឺថ្ងៃ ៕
ចែករំលែកព័តមាននេះ