បង្ក្រាបការដឹកគល់រាំងទឹកទៅស្រុកយួន
ខេត្តព្រៃវែង ៖ រថយន្តយីឌុបម៉ាក់ហ៊ីយ៉ាន់ដាយ១គ្រឿងចំណុះ៨តោន ដែលផ្ទុកគល់រាំងទឹកចំនួន១១គល់ ត្រូវបានសមត្ថកិច្ចប៉ូលិសរួមជាមួយប៉ូលិសខេត្ត-ស្រុកសហការ…
ខេត្តព្រៃវែង ៖ រថយន្តយីឌុបម៉ាក់ហ៊ីយ៉ាន់ដាយ១គ្រឿងចំណុះ៨តោន ដែលផ្ទុកគល់រាំងទឹកចំនួន១១គល់ ត្រូវបានសមត្ថកិច្ចប៉ូលិសរួមជាមួយប៉ូលិសខេត្ត-ស្រុកសហការចាប់បាននៅវេលាម៉ោង១០និង៣០នាទីយប់ថ្ងៃទី៨ មីនា នៅមុខប៉ុស្ដិ៍កន្សោមអក ស្ថិតក្នុងឃុំកន្សោមអក ស្រុកកំពង់ត្របែក ហើយបានយកមករក្សាទុកនៅអធិការដ្ឋាននគរបាលស្រុកកំពង់ត្របែកដើម្បីដោះស្រាយទៅតាមនីតិវិធីនៃច្បាប់ជលផលកម្ពុជា ។
ប៉ូលិសក៏បានធ្វើការឃាត់ខ្លួនអ្នកបើកបររថយន្តឈ្មោះ ជា ថន និងព្រូម្នាក់ទៀតឈ្មោះ ជុំ បូណា ហៅសឿន យកមកសាកសួរផងដែរ ។
ព្រូឈ្មោះ ជុំ បូណា ហៅសឿន បានឱ្យកោះសន្តិភាពដឹងថា គល់រាំងទឹកទាំង១១គល់នេះ ជារបស់ឈ្មួញវៀតណាម ដែលបានទិញពីប្រជាពលរដ្ឋនៅស្រុកពារាំង ហើយឈ្មួញវៀតណាមបានជួលរថយន្តរបស់ខ្លួនឱ្យដឹកចេញពីស្រុកពារាំង ឆ្លងកាត់ស្រុកស៊ីធរកណ្ដាល ស្រុកស្វាយអន្ទរ ឆ្ពោះមកស្រុកកំពង់ត្របែក ដើម្បីនាំយកទៅលក់នៅប្រទេសវៀតណាម ដោយដឹកចេញតាមច្រកស្វាយអង៉ោង ។
ឈ្មួញវៀតណាមបានប្រាប់ថា កុំភ័យគេរត់ការអ្នកធំៗអស់ហើយ ។ ព្រូរថយន្តរូបនេះបន្តថា ខ្លួនត្រូវគេជួលឱ្យដឹកគល់រាំងរាប់សិបជើងមកហើយដែរ ពេលកន្លងមកនេះ ដោយមួយជើងៗគេឱ្យថ្លៃ២០០ដុល្លារ ទៅ៣០០ដុល្លារតែប៉ុណ្ណោះ ប៉ុន្តែជើងនេះស៊យធំត្រូវសមត្ថកិច្ចស្រុកកំពង់ត្របែកចាប់ទាំងរថយន្ត រួមទាំងមនុស្ស ។ ព្រូរថយន្តដដែលបានឱ្យដឹងថា ខ្លួនបានទាក់ទងតាមទូរស័ព្ទទៅឈ្មួញវៀតណាម ដែលជាម្ចាស់គល់រាំងទាំង១១គល់ ឱ្យមកដោះស្រាយតាមផ្លូវច្បាប់ ។
ប្រភពព័ត៌មានជំហានដំបូងពីមន្ត្រីប៉ូលិសបានឱ្យដឹងថា ឈ្មួញវៀតណាមរកសីុទិញគល់រាំងទឹកពីស្រុកខ្មែរ មួយគល់ធុនមធ្យមតម្លែខ្ពស់ពី២០០ទៅ៣០០ដុល្លារ ធុនធំៗមានមុខកាត់៧ទៅ៨តឹក ប្រវែង២ទៅ៣ម៉ែត្រ ឈ្មួញឱ្យថ្លៃខ្ពស់ពី៣០០ទៅ៥០០ដុល្លារ ។ គេយកទៅលក់នៅប្រទេសគេ ទិញថ្លៃ២០០ទៅ៣០០ដុល្លារ លក់ចេញបានដល់ទៅ១៥០០ទៅ២០០០ដុល្លារ ។
ការរកស៊ីរបស់ពួកឈ្មួញវៀតណាមនេះ ត្រូវបជ្ឈដ្ឋាននានាបានកត់សម្គាល់ឃើញថា គឺដោយសារមានការបិតភ្នែក បូញមាត់ បើកដៃពីមន្ដ្រីខិលខូចមួយចំនួន បានឃុបឃិតគ្នាជាលក្ខណៈប្រព័ន្ធ ប៉ុន្តែលើកនេះបែកការដោយសារតែការចែកគ្នាមិនស្មើ ។ ទាក់ទងបញ្ហាខាងលើនេះ កោះសន្ដិភាព បានព្យាយាមធ្វើការទំនាក់ទំនងទៅមន្ដ្រីពាក់ព័ន្ធគ្រប់ស្ថាប័ន តែពុំមានការឆ្លើយតបនោះទេ ។
ចំពោះគល់រាំងទឹក ទាំង១១គល់ដែលចាប់បាននេះ គឺគល់ខ្នាតធំ៦ និងគល់ខ្នាតមធ្យម៥ មិនដឹងថា សមត្ថកិច្ចប៉ូលិសដោះស្រាយបែបណាចំពោះគល់រាំងដែលរឹបរួសនេះ ។ ។ ស្រួលមិនស្រួលទុកចោល ខាតអត់ប្រយោជន៍ ។ ប៉ុន្តែបើនៅស្រុកគេមានតម្លៃណាស់ យកទៅដាំបន្តទៀតភ្លាម ។ តាមមន្ដ្រីជលផលបានឱ្យដឹងថា ដើមរាំងទឹកជារុក្ខជាតិលិចទឹក និងជាជម្រកត្រីពងកូន ។ ពេលនេះគេនាំគ្នាគាស់លក់ មិនខុសពីនាំគ្នាបំផ្លាញជម្រកត្រីនោះទេ ៕
ចែករំលែកព័តមាននេះ