ខេត្តឧត្តរមានជ័យ ៖ អាជ្ញាធរថៃបានដោះលែងអ្នកទោសខ្មែរ៥នាក់ដែលជាប់ចោទពីបទឆ្លងដែនកាប់ឈើដោយខុសច្បាប់កាលពីថ្ងៃទី៩ កញ្ញា ២០១៤ កន្លងទៅនេះ នាំយកមកប្រគល់ឲ្យអាជ្ញាធរកម្ពុជា កាលពីរសៀលថ្ងៃទី៨ មីនា ២០១៦ តាមច្រកទ្វារអន្តរជាតិជាំ ស្ថិតនៅក្នុងភូមិជាំ ឃុំត្រពាំងប្រីយ៍ ស្រុកអន្លង់វែង ។
អ្នកទោសខ្មែរម្នាក់ក្នុងចំណោម៥នាក់ ឈ្មោះ ឃុត ញ៉ាន ភេទប្រុស អាយុ៣៦ឆ្នាំ រស់នៅឯខេត្តកំពត បានរៀបរាប់ថា មុនពេលកើតហេតុដោយសារតែពួកខ្លួនក្រីក្រហើយរកការងារមិនបានធ្វើ ក្រោយមកមានក្រុមឈ្មួញឈើគ្រញួងបានទៅបំផុសថា ពួកគេចង់បានមនុស្សកាប់ឈើគ្រញួងចំនួន៤០ទៅ៥០នាក់ កាប់ឈើយកមកលក់ឲ្យពួកគេ ហើយស្បៀងអាហារ និងថ្លៃបង់ផ្លូវ ពួកគេជាអ្នកចំណាយ ។
មន្ត្រីបម្រើការងារមាត់ច្រកទ្វារអន្តរជាតិជាំ បានឲ្យដឹងថា អ្នកទោសខ្មែរទាំង៥នាក់ខាងលើ មាន ១-ឈ្មោះ វង្ស ហ៊ុន ភេទប្រុស អាយុ២១ឆ្នាំ រស់នៅខេត្តឧត្តរមានជ័យ ២-ឈ្មោះ ប៉ម រឿន ភេទប្រុស អាយុ៣៣ឆ្នាំ ៣-ឈ្មោះ ញ៉ាន ថុល ភេទប្រុស អាយុ២៤ឆ្នាំ ៤-ឈ្មោះ ចាន់ ម៉ៅ ភេទប្រុស អាយុ២៤ឆ្នាំ និង៥-ឈ្មោះ ឃុន ញ៉ាន ភេទប្រុស អាយុ៣៦ឆ្នាំ ទាំង៤នាក់នេះ រស់នៅឯខេត្តកំពត ។ បន្ទាប់មក សមត្ថកិច្ចបានអប់រំណែនាំ រួចក៏អនុញ្ញាតឲ្យទៅជួបជុំក្រុមគ្រួសារវិញនាថ្ងៃដដែល ៕
ចែករំលែកព័តមាននេះ