ខេត្តក្រចេះ ៖ ក្រៅពីយុទ្ធនាការបង្ក្រាបបទល្មើសព្រៃឈើទ្រង់ទ្រាយធំរបស់គណៈកម្មការជាតិនៅតាមតំបន់ទីតាំងក្រុមហ៊ុនវិនិយោគរួចមក អាជ្ញាធរមានសមត្ថកិច្ចថ្នាក់ខេត្តបានបន្តវិធានការចុះចាប់រឹបអូសរថយន្តច្នៃធន់យក្ស(រថយន្តបង្កុង)
ខេត្តក្រចេះ ៖ ក្រៅពីយុទ្ធនាការបង្ក្រាបបទល្មើសព្រៃឈើទ្រង់ទ្រាយធំរបស់គណៈកម្មការជាតិនៅតាមតំបន់ទីតាំងក្រុមហ៊ុនវិនិយោគរួចមក អាជ្ញាធរមានសមត្ថកិច្ចថ្នាក់ខេត្តបានបន្តវិធានការចុះចាប់រឹបអូសរថយន្តច្នៃធន់យក្ស(រថយន្តបង្កុង) នៅតាមលំនៅឋានដីឡូត៍របស់អ្នកភូមិជាម្ចាស់រថយន្ត ដោយសំអាងថា ពពួករថយន្តនេះ ជាមធ្យោបាយដឹកជញ្ជូនឈើចេញព្រៃមកកាន់ក្រុមហ៊ុន។
វិធានការចុះបង្ក្រាបរថយន្តច្នៃធន់យក្សដែលគេឲ្យឈ្មោះថា រថយន្តបង្កុងរបស់អាជ្ញាធរមានសមត្ថកិច្ចខេត្តក្រចេះ ក្រោមការដឹកនាំដោយស្ថាប័នអយ្យការខេត្ត បានធ្វើឡើងពីថ្ងៃជាប់ៗគ្នាមកនេះ ថ្ងៃទី៦-៧ មីនា ត្រូវបានគេមើលឃើញថា បានធ្វើឡើងក្រោយពីយុទ្ធនាការចុះបង្ក្រាបបទល្មើសព្រៃឈើទ្រង់ទ្រាយធំរបស់គណៈកម្មាធិការថ្នាក់ជាតិទៅលើបទល្មើសព្រៃឈើជ្រកក្រោមស្លាកក្រុមហ៊ុនវិនិយោគព្រៃសម្បទានធំៗមួយចំនួននៅក្នុងខេត្តក្រចេះ ហើយនៅពេលនេះ យុទ្ធនាការក៏ត្រូវបានស្ងប់ស្ងាត់ទៅវិញ ចំណែកឯតួរលេខចំនួនឈើដែលបានចាប់រឹបអូសឈើ ក៏នៅមិនទាន់បានបង្ហាញនៅឡើយដែរ។
សេចក្តីរាយការណ៍បានឲ្យដឹងថា មានរថយន្តច្នៃប្រភេទ ឬរថយន្តបង្កុងចំនួន២៣គ្រឿង ក្នុងនោះមាននៅស្រុកស្នួលចំនួន២គ្រឿង និងនៅស្រុកចិត្របុរី ចំនួន១៩គ្រឿង ដែលចតទុកគ្រប់តង់នៅក្នុងដីឡូត៍តាមផ្ទះត្រូវបានសមត្ថកិច្ចខេត្តក្រោមការដឹកនាំដោយលោក ហាក់ ហ៊ាន់ ព្រះរាជអាជ្ញាររងខេត្តបានកំណត់ថា នឹងត្រូវរឹបអូសយកមករក្សាដើម្បីមានវិធានការនោះ គឺត្រូវបានផ្លាស់ប្តូរនីតិវិធីទៅវិញ ក្រោយពីម្ចាស់រថយន្តមិនសហការអនុវត្តធ្វើតាម។ ហើយសមត្ថកិច្ចក៏បានបង្វែរនីតិវិធី ដោយតម្រូវឲ្យម្ចាស់រថយន្តទាំងអស់នេះធ្វើកិច្ចសន្យាថែរក្សាទុករថយន្តតាមផ្ទះរៀងៗខ្លួន តែតម្រូវមិនឲ្យមានការកែច្នៃបន្ត។ នេះបើតាមការបញ្ជាក់ឱ្យដឹងពីសំណាក់លោកវរសេនីយ៍ឯក ហន ប៉ូច ស្នងការរងកណ្តាល សណ្តាប់ធ្នាប់ដែលបានចូលរួមសហការ។
ខេត្តក្រចេះ ត្រូវបានគេមើលឃើញថា ការប្រើប្រាស់រថយន្តកែច្នៃមានការកើនឡើងច្រើន ហើយរថយន្តទាំងនោះត្រូវបានម្ចាស់អះអាងថា ការច្នៃរថយន្តក្នុងតម្លៃថ្លៃនេះ មិនមែនកំណត់តែថា សម្រាប់យកទៅស៊ីឈ្នួលដឹកឈើឲ្យក្រុមហ៊ុននោះទេ គឺមានខ្លះកែច្នៃសម្រាប់ដឹកដើមឬស្សី ដឹកដំឡូង និងដឹកទំនិញទៅលក់នៅព្រៃក្រុមហ៊ុនពេលរដូវវស្សាទឹកជន់ និងមួយចំនួនយកទៅស៊ីឈ្នួលដឹកឈើចេញពីព្រៃឲ្យក្រុមហ៊ុនមែន។
យ៉ាងណាក៏ដោយជាមួយនិងវិធានការរបស់អាជ្ញាធរខេត្ត ក្នុងកិច្ចប្រតិបត្តការអនុវត្ត ផែនការរបស់គណៈកម្មការថ្នាក់ជាតិលើកិច្ចការងារចុះបង្ក្រាបបទល្មើសព្រៃឈើ ក្នុងទីតាំងរបស់ក្រុមហ៊ុនដែលតែងតែប្រើរូបភាពកន្ទេលធំបន្លំដេក។ ក្រោយពីមានវិធានការចុះបង្ក្រាបឈើហុប និងឈើអាឡាំងជ្រុង ប្រភេទប្រណីត និងឈើលេខ១ មានចំនួនរាប់ម៉ឺនកំណាត់នៅក្នុងទីតាំងក្រុមហ៊ុនចំនួន២នៅខេត្តក្រចេះ រួចមកនោះរហូតមកទល់និងពេលនេះវិធានការរបស់អាជ្ញាធរខេត្តក្រចេះ ត្រូវបានគេមើលឃើញថា មានភាពស្ងប់ស្ងាត់ទៅវិញ ខណៈដែលមានប្រភពព័ត៌មានខ្លះៗបានបង្ហើបប្រាប់ថា មានឈើមួយចំនួនដែលបានចាប់ឃាត់នៅក្រុមហ៊ុនចិនឈ្មោះឆាយណា ឌីណាម៉ិក និងក្រុមហ៊ុនចិនឈ្មោះ ហ្គ្រីនស៊ី កំពុងតែរងនូវការបាត់ ដោយមានការលួចលក់ជាបន្តបន្ទាប់៕
ចែករំលែកព័តមាននេះ