រាជធានីភ្នំពេញ ៖ ក្រុមហ៊ុនសាមសុងបានដាក់បង្ហាញនូវផលិតផលអេឡិចត្រូនិកដែលជួយសម្រួលដល់ការរស់នៅប្រចាំថ្ងៃរបស់ប្រជាជនជាច្រើននៅក្នុងកម្មវិធីគ្រឿងអេឡិចត្រូនិក2016 ក្នុងទីក្រុងកូឡាឡាំពួរ ប្រទេសម៉ាឡេស៊ី ។ ផលិតផលដែលត្រូវបានដាក់បង្ហាញក្នុងកម្មវិធីនោះរួមមានទូរទស្សន៍ SUHD ស៊េរីថ្មី ម៉ាស៊ីនបោកសម្លៀកបំពាក់ដែលរចនាថ្មី និងទូទឹកកកដែលប្រើអីុនធើរណេតជាដើម ។
លោក ឆែ សុខឡេង ប្រធានផ្នែកផ្សព្វផ្សាយរបស់ក្រុមហ៊ុនសាមសុងអេឡិចត្រូនិកប្រចាំនៅកម្ពុជា ដែលមានវត្តមាននៅក្នុងកម្មវិធីនាះបានឲ្យដឹងថា៖«យើងតែងតែយកចិត្តទុកដាក់ចំពោះអ្វីដែលជាតម្រូវការរបស់អតិថិជន ហើយខិតខំបំពេញតម្រូវការទាំងនោះជាមួយផលិតផលថ្មីៗដែលមានការច្នៃប្រឌិតខ្ពស់ដោយអ្នកឯកទេសជំនាញៗជាច្រើននាក់ ។ ឆ្នាំនេះមិនខុសពីឆ្នាំកន្លងទៅ យើងមានផលិតផលថ្មីៗជាច្រើនទៀត ដែលអាចជួយសម្រួលដល់ការងារប្រចាំថ្ងៃរបស់លោកអ្នកផងដែរ» ។
ទូរទស្សន៍សាមសុង SUHD ស៊េរីថ្មី អាចឲ្យអ្នកទស្សនារូបភាពច្បាស់ត្រជាក់ភ្នែកទោះជានៅកន្លែងដែលមានពន្លឺភ្លឺចិញ្ចែងចិញ្ចាចជាមួយនឹងអេក្រង់កោងគ្មានគែមដែលជារបកគំហើញថ្មី ។ បច្ចេកវិទ្យា Tizen operating system (OS) របស់ទូរទស្សន៍មួយនេះអាចឲ្យលោកអ្នកមើលទូរទស្សន៍ លេងហ្គេម ប្រើអីុនធើរណេត និងប្រើកម្មវិធីជាច្រើនទៀតតាមរយៈតេលេបញ្ជា ឬក៏ទូរស័ព្ទដៃជាដើម ។
ចំណែកឯម៉ាស៊ីនបោកសម្លៀកបំពាក់ AddWash អាចឲ្យលោកអ្នកដាក់បន្ថែមសម្លៀកបំពាក់ពេលណាក៏បានដោយមិនបាច់ចាក់ទឹកចេញដើម្បីបើកទ្វារនោះឡើយ ។ លើសពីនេះទៀត លោកអ្នកក៏អាចដាក់សម្លៀកបំពាក់ដែល បោកសាប៊ូហើយចូលទៅក្នុងម៉ាស៊ីនដើម្បីលាងសម្អាតផងដែរ ។ ម្យ៉ាងទៀត លោកអ្នកក៏អាចដាក់ទឹកក្រអូបចូលក្នុងម៉ាស៊ីនបានគ្រប់ពេលទោះជាម៉ាស៊ីនកំពុងដំណើរការក៏ដោយ ។
របកគំហើញថ្មីមួយទៀតរបស់ក្រុមហ៊ុនសាមសុងនោះ គឺជាទូទឹកកកភ្ជាប់អីុនធើរណេតបានសម្រាប់ប្រើប្រាស់នៅក្នុងគ្រួសារ ។ ទូទឹកកកនេះមានឈ្មោះថា Family Hub វាមានភ្ជាប់មកជាមួយនូវអេក្រង់ទូរទស្សន៍ទំហំ21,5 អីុង នៅជាប់នឹងផ្នែកខាងក្រៅនៃទ្វារដែលលោកអ្នកអាចចែករំលែករូបភាពស្អាត កំណត់ហេតុ និងកាលវិភាគជាដើមជាមួយនឹងអ្នកដទៃបានយ៉ាងងាយ ។ លើសពីនេះទៅទៀត លោកអ្នកក៏អាចពិនិត្យមើលថា មានអ្វីខ្លះនៅក្នុងទូទឹកកកទោះជាលោកអ្នកមិននៅផ្ទះក៏ដោយលោកអ្នកគ្រាន់តែមើលតាមទូរស័ព្ទដៃរបស់ លោកអ្នកជាការស្រេច ។ មានកម្មវិធីកម្សាន្តជាច្រើនទៀតដែលលោកអ្នកអាចប្រើជាមួយទូទឹកកកមួយនេះបាន ។
ក្រៅពីផលិតផលទាំងនេះ សាមសុងក៏មានដាក់បង្ហាញផលិតផលជាច្រើនទៀតនៅក្នុងកម្មវិធីគ្រឿងអេឡិចត្រូនិក2016 ក្នុងប្រទេសម៉ាឡេស៊ី ។ សម្រាប់អតិថិជននៅក្នុងប្រទេសកម្ពជា លោកអ្នកនឹងអាចជាវគ្រឿងអេឡិចត្រូនិកទាំងនេះនាពេលឆាប់ៗ ៕
ចែករំលែកព័តមាននេះ