ក្នុងឱកាសពេលឈប់សម្រាកពីការងារក្នុងឱកាសបុណ្យភ្ជុំបិណ្ឌ អាចនឹងមានបងប្អូនខ្លះត្រូវអញ្ជើញទៅវត្តយកចង្ហាន់ទៅប្រគេនព្រះសង្ឃក្នុងពិធីបុណ្យភ្ជុំបិណ្ឌ ខណៈមានពុទ្ធបរិស័ទជាច្រើនក៏សម្រុកទៅក្នុងថ្ងៃធំប៉ុន្មានថ្ងៃចុងក្រោយនេះដែរ ដូច្នេះបើទោះជានាំយកចង្ហាន់ទៅប្រគេនព្រះសង្ឃនៅត្រឹមខ្លោងទ្វារវត្ត ឬបានចូលប្រគេនដល់ក្នុងកុដិព្រះសង្ឃក្តីក៏បងប្អូនពុទ្ធបរិស័ទត្រូវមានការប្រុងប្រយ័ត្នឱ្យបានខ្ពស់ដោយអនុវត្តឱ្យបានខ្ជាប់ខ្ជួននូវវិធានការ «៣ការពារ និង៣កុំ»ជាដាច់ខាត ពិសេសត្រូវពាក់ម៉ាស់ លាងដៃនឹងសាប៊ូ ឬអាល់កុល ព្រមទាំងរក្សាគម្លាតសុវត្ថិភាពក្នុងពេលប្រគេនចង្ហាន់ដែលមានគ្នាច្រើន និងត្រូវយកទឹកអាល់កុលដាក់តាមខ្លួនជានិច្ច ។
ដោយហេតុថា យោងតាមរបាយការណ៍ក្រសួងធម្មការ និងសាសនាបានបញ្ជាក់ថា មកដល់ពេលនេះមានព្រះសង្ឃព្រះពុទ្ធសាសនានៅទូទាំងប្រទេសប្រមាណជាជាង៩រយអង្គហើយបានឆ្លងជំងឺកូវីដ-១៩ ក្នុងនោះក៏មានព្រះសង្ឃ៧អង្គបានអនិច្ចធម្មទៀតផង ។
លោក សេង សុមុនី អ្នកនាំពាក្យក្រសួងធម្មការបានបញ្ជាក់ថា មូលហេតុដែលបណ្តាលឱ្យព្រះសង្ឃឆ្លងជំងឺកូវីដ-១៩ មកពីមានព្រះសង្ឃខ្លះបានឆ្លងពីក្មេងវត្តចេញទៅធ្វើការងារនៅខាងក្រៅវត្ត ហើយបានមកចម្លងជំងឺដល់ព្រះសង្ឃ និងព្រះសង្ឃខ្លះទៀតបានឆ្លងជំងឺពេលព្រះអង្គចេញទៅនិមន្តបិណ្ឌបាត្រ ហើយអង្គខ្លះឆ្លងតាមរយៈអាចារ្យវត្ត ដែលករណីទាំងនេះកើតឡើងភាគច្រើននៅរាជធានីភ្នំពេញ ។
គួរជម្រាបផងថា កាលពីថ្មីៗនេះមានផ្ទុះកូវីដ-១៩ នៅតាមវត្តអារាមមួយចំនួននៅក្នុងរាជធានីភ្នំពេញបានបង្ខំឱ្យរាជរដ្ឋាភិបាល និងក្រសួងធម្មការនិងសាសនាផ្អាកប្រារព្ធពិធីកាន់បិណ្ឌចាប់ពីវេនបិណ្ឌទី៤ រហូតដល់ភ្ជុំបិណ្ឌ ដើម្បីទប់ស្កាត់ការរីករាលដាលជំងឺកូវីដ-១៩ ។ ប៉ុន្តែពុទ្ធបរិស័ទអាចយកចង្វាន់ទៅប្រគេនព្រះសង្ឃបាននៅខាងក្រៅរខ្លោងទ្វារវត្តដោយអនុវត្តតាមវិធានការ៣កុំ៣ការពារឱ្យបានដាច់ខាត ដើម្បីចៀសវាងការនាំយកជំងឺមកចូលក្នុងគ្រួសាររបស់ខ្លួន ៕ សាន សារិន
ចែករំលែកព័តមាននេះ