ជំងឺថ្លើមប្រភេទ B ងាយចម្លង តែអាចការពារបាន
ថ្លើមប្រភេទ B ជាជំងឺឆ្លងយ៉ាងសកម្មបំផុតនៅក្នុងពិភពលោកដែលកំពុងធ្វើឱ្យមានការព្រួយបារម្ភយ៉ាងខ្លាំងចំពោះបញ្ហាសុខភាពសាធារណៈពិសេសនៅក្នុងតំបន់អាស៊ី…
ថ្លើមប្រភេទ B ជាជំងឺឆ្លងយ៉ាងសកម្មបំផុតនៅក្នុងពិភពលោកដែលកំពុងធ្វើឱ្យមានការព្រួយបារម្ភយ៉ាងខ្លាំងចំពោះបញ្ហាសុខភាពសាធារណៈពិសេសនៅក្នុងតំបន់អាស៊ីអាគ្នេយ៍ ក្នុងនោះមានទាំងប្រជាជនកម្ពុជាផងដែរ។
ជំងឺថ្លើមប្រភេទ B មានបង្កប់នៅក្នុងឈាម ទឹកមាត់ ទឹកដោះម្តាយ និងទឹករំអិលផ្សេងៗទៀតក្នុងខ្លួនមនុស្ស ហើយក៏អាចឆ្លងដោយងាយ ស្រដៀងគ្នាទៅនឹងការឆ្លងរបស់មេរោគអេដស៍ផងដែរ ។ ដោយការឆ្លងនេះមានតាមរយៈដូចជា ៖
-ឆ្លងតាមឈាម
-ឆ្លងតាមការរួមភេទដោយគ្មានសុវត្ថិភាព
-ឆ្លងពីម្តាយទៅកូនជាពិសេសនៅពេលសម្រាលកូន
-ឆ្លងតាមការប្រើប្រាស់ ម្ជុលចាក់ថ្នាំរួមគ្នាជាដើម ។
ដូច្នេះដើម្បីការពារការចម្លងជំងឺថ្លើមប្រភេទ B លោកអ្នកត្រូវតែអនុវត្តតាមវិធីសាស្ត្រខាងក្រោមនេះ ៖
-នៅពេលដឹងថាមានផ្ទៃពោះ ស្ត្រីគួរតែទៅពិនិត្យសុខភាព និងធ្វើតេស្តឈាមរកមើលជំងឺថ្លើម។
-មិនគួរប្រើប្រាស់ម្ជុលរួមគ្នា
-ការរួមភេទជាមួយដៃគូច្រើន គួរតែប្រើស្រោមអនាម័យ
ជាការពិត ជំងឺនេះមិនអាចឆ្លងតាមរយៈការថើប និងការទទួលទានអាហារជាមួយគ្នានោះទេ។ ចំណែកឯការបឺតមាត់ ក៏អាចមានហានិភ័យនៃការចម្លងផងដែរ បើសិនជាមានដាច់រលាត់បបូរមាត់ ឬអណ្តាតនោះ ។ ជំងឺថ្លើមប្រភេទ B មានវ៉ាក់សាំងចាក់បង្ការទប់ស្កាត់បាន១០០ភាគរយ បើទោះជាមិនទាន់មានឱសថណាអាចព្យាបាលឱ្យជាសះស្បើយ១០០ភាគរយក៏ដោយ ។
គោលបំណងនៅក្នុងការព្យាបាលជំងឺថ្លើមប្រភេទ B មានដូចជា៖
-ព្យាបាលដើម្បីទប់កុំឲ្យជំងឺនេះវិវឌ្ឍទៅជាជំងឺរ៉ាំរ៉ៃ
-ការពារជំងឺនេះកុំឲ្យមានការវិវឌ្ឍកាន់តែធ្ងន់ធ្ងរ
-ព្យាបាលដើម្បីកុំឲ្យថ្លើមមានសម្លាកកាន់តែច្រើន ដែលអាចវិវឌ្ឍទៅជាមហារីកថ្លើមឬក្រិនថ្លើមដែលអាចធ្វើឲ្យងាយនឹងបាត់បង់អាយុជីវិត ។
ដោយសារតែជំងឺនេះមិនមានរោគសញ្ញាច្បាស់លាស់ ដូច្នេះមហាជនទូទៅគួរទៅពិនិត្យឈាមគ្រប់ៗគ្នា ដើម្បីការពារខ្លួនពីការឆ្លងមេរោគរលាកថ្លើមគ្រប់ប្រភេទ តាមរយៈការចាក់វ៉ាក់សាំងការពារខ្លួន ៕
ចែករំលែកព័តមាននេះ