ខេត្តព្រះវិហារ ៖ ស្ត្រីម្នាក់បានស្លាប់ភ្លាមៗនៅនឹងផ្ទះរបស់ខ្លួន ដោយសារយកត្រីក្រាញ់មកខាំសម្លាប់ ដើម្បីធ្វើម្ហូម បណ្តាលឱ្យត្រីរអិលចូលក្នុងមាត់ឆ្លាក់ស្លាប់ ។ ហេតុការណ៍ការណ៍នេះ បានកើតឡើងនៅវេលាម៉ោងជាង៥ល្ងាច ថ្ងៃទី២ មីនា ២០១៦ ក្នុងភូមិគូលែនត្បូង ឃុំគូលែនត្បូង ស្រុកគូលែន ។
បើតាមអ្នកឆ្លើយឆ្លងព័ត៌មានកោះសន្តិភាពបានឱ្យដឹងថា ជនរងគ្រោះឈ្មោះលឹម ណារុំ ភេទស្រី អាយុ៤៦ឆ្នាំ រស់នៅក្នុងភូមិ-ឃុំកើតហេតុ ។
សេចក្តីរាយការណ៍បានបន្តថា នៅថ្ងៃកើតហេតុ ស្ត្រីរងគ្រោះបានទៅបាចត្រីក្នុងអូរដូនស្ងួន ក្នុងភូមិគូលែនត្បូង យកមកប្រោះទុកចំនួន៤ក្បាល ហើយជនរងគ្រោះបានចាប់ត្រីក្រាញ់ទាំងនោះមកខាំងាប់អស់ចំនួន៣ក្បាល ហើយនៅសល់ត្រីក្រាញ់មួយក្បាលចុងក្រោយ ក៏ចាប់មកខាំក្នុងមាត់ទៀត ប៉ុន្តែចៃដន្យអីត្រីក្រាញ់បំរះរអិលចូលទៅក្នុងមាត់ បណ្តាលឱ្យស្លាប់ភ្លាមៗតែម្តង ។
ចែករំលែកព័តមាននេះ