រាជធានីភ្នំពេញ ៖ ក្រសួងព័ត៌មាន តាមរយៈរដ្ឋលេខាធិការប្រចាំការ កាលពីថ្ងៃទី២៣ កញ្ញា ២០២១ បានចេញលិខិត ជម្រាប់ទៅកាន់ម្ចាស់ស្ថានីយ៍ទូរទស្សន៍គ្រប់ប្រភេទ ហាមចាក់ផ្សាយខ្សែភាពយន្តរឿង…
រាជធានីភ្នំពេញ ៖ ក្រសួងព័ត៌មាន តាមរយៈរដ្ឋលេខាធិការប្រចាំការ កាលពីថ្ងៃទី២៣ កញ្ញា ២០២១ បានចេញលិខិត ជម្រាប់ទៅកាន់ម្ចាស់ស្ថានីយ៍ទូរទស្សន៍គ្រប់ប្រភេទ ហាមចាក់ផ្សាយខ្សែភាពយន្តរឿង «Methagu» នៅក្នុងកម្មវិធីផ្សាយរបស់ស្ថានីយ៍ទូរទស្សន៍ ទូរទស្សន៍ខ្សែកាប និងទូរទស្សន៍គ្រប់ប្រភេទ ។
ការហាមមិនឲ្យចាក់ផ្សាយខ្សែភាពយន្តរឿង «Methagu» ដោយសារក្រសួងការបរទេស និងសហប្រតិបត្តិការអន្តរជាតិ បានទទួលសំណូមពរពីប្រទេសស្រីលង្កា ស្នើសុំឲ្យព្រះរាជាណាចក្រកម្ពុជា ជួយទប់ស្កាត់ការចាក់ផ្សាយខ្សែភាពយន្តនេះ ដែលឆ្លុះបញ្ចាំងអំពីជីវិតរបស់ អតីតអង្គការភេរវកម្ម Liberation Tigers of Tamil Eelam (LTTE) ដឹកនាំដោយ Velupillai Prabhakaran និងផលិតដោយអង្គការ Tamil Eelam Film Society ដែលត្រូវបានគេកំណត់ថា LTTE គឺជាអង្គការមួយ ក្នុងចំណោមអង្គការភេរវកម្មដ៏ឃោរឃៅនៅក្នុងសកលលោក ។
កោះសន្តិភាព សូមធ្វើការបកប្រែ ក្រៅផ្លូវការ ពីប្រវត្តិ និងសកម្មភាព ត្រួសៗ របស់អតីតអង្គការភេរវកម្មមួយនេះ ដូចតទៅ ៖
ខ្លាតាមិល ជាឈ្មោះហៅក្រៅ ដែលឈ្មោះពេញថា Liberation Tigers of Tamil Eelam (LTTE) ជាអង្គការទ័ពព្រៃ ឫក្រុមឧទ្ទាមទ័ពព្រៃ ដែលបានព្យាយាមបង្កើតរដ្ឋឯករាជ្យមួយ នៅភាគខាងជើង និងខាងកើត នៃប្រទេសស្រីលង្កា ។
LTTE ត្រូវបានបង្កើតឡើងក្នុងឆ្នាំ ១៩៧៦ ដោយលោក Velupillai Prabhakaran ជាអ្នកស្នងតំណែងពីអង្គការមួយ ដែលគាត់បានបង្កើតនៅដើមទសវត្សរ៍ឆ្នាំ ១៩៧០ ។ LTTE បានរីកចម្រើនក្លាយជាក្រុមបះបោរមួយ ក្នុងអំឡុងទសវត្សរ៍ឆ្នាំ ១៩៧០ អង្គការនេះ បានធ្វើការវាយប្រហារដោយទ័ពព្រៃជាច្រើនដង ។ នៅឆ្នាំ ១៩៨៣ បន្ទាប់ពីការសម្លាប់ទាហានរបស់ស្រីលង្កា ១៣នាក់ ដោយទ័ពព្រៃតាមិល និងការវាយប្រហារសងសឹក ដោយយោធាស្រីលង្កាវិញ អំពើហិង្សាទ្រង់ទ្រាយធំ បានផ្ទុះឡើងរវាងរដ្ឋាភិបាលស្រីលង្កា និងក្រុម LTTE ។
នៅឆ្នាំ ១៩៨៥ ក្រុមនេះ ស្ថិតនៅភាគច្រើន នៅភាគខាងជើងប្រទេសស្រីលង្កា ក្រោមការបញ្ជារបស់ Prabhakaran ។ ក្រុម LTTE ទទួលបានការគាំទ្រផ្នែកហិរញ្ញវត្ថុស្ម័គ្រចិត្ត ពីជនជាតិតាមិល ដែលរស់នៅក្រៅប្រទេស ។
LTTE បានបាត់បង់ការគ្រប់គ្រងរបស់ខ្លួននៅខាងជើង ក្នុងខែតុលាឆ្នាំ ១៩៨៧ ដោយកងកម្លាំងរក្សាសន្តិភាពរបស់ឥណ្ឌា (IPKF) ដែលត្រូវបានបញ្ជូនទៅប្រទេសស្រីលង្កា ដើម្បីជួយក្នុងការអនុវត្ត បទឈប់បាញ់ពេញលេញមួយ ។
ទោះយ៉ាងណាក៏ដោយ បន្ទាប់ពីកងទ័ពឥណ្ឌា IPKF ដកចេញនៅខែមីនា ឆ្នាំ ១៩៩០ ខ្លាតាមិល បានកើនឡើងយ៉ាងខ្លាំង និងឆាប់រហ័ស ហើយបានធ្វើប្រតិបត្តិការទ័ពព្រៃ ដោយជោគជ័យ និងការវាយប្រហារភេរវកម្ម ។ នៅថ្ងៃទី២១ ខែឧសភា ឆ្នាំ ១៩៩១ អ្នកបំផ្ទុះគ្រាប់បែកអត្តឃាតម្នាក់ បានសម្លាប់អតីតនាយករដ្ឋមន្ត្រីឥណ្ឌា លោក Rajiv Gandhi ខណៈពេលដែលលោកកំពុងធ្វើយុទ្ធនាការ នៅរដ្ឋមួយ ក្នុងប្រទេសឥណ្ឌា ។
ការវាយប្រហារផ្សេងទៀត រួមមានការផ្ទុះមីន នៅខែសីហា ឆ្នាំ ១៩៩២ នៅតំបន់ភាគខាងជើងស្រីលង្កា ដែលបានសម្លាប់មេបញ្ជាការយោធាជាន់ខ្ពស់ ១០នាក់ ។ ខែឧសភា ឆ្នាំ ១៩៩៣ ការធ្វើឃាតប្រធានាធិបតីស្រីលង្កា គឹលោក Ranasinghe Premadasa ។ ខែមករា ឆ្នាំ ១៩៩៦ ការវាយប្រហារដោយគ្រាប់បែកអត្តឃាត ទៅលើធនាគារកណ្តាលក្នុងទីក្រុងកូឡុំបូ Colombo ដែលបានសម្លាប់មនុស្ស ១០០នាក់ ។ និងការវាយប្រហារនៅខែកក្កដា ឆ្នាំ ២០០១ លើអាកាសយានដ្ឋានអន្តរជាតិ ទីក្រុងកូឡុំបូ ដែលបានបំផ្លាញយន្តហោះពាណិជ្ជកម្មពាក់កណ្តាលរបស់ប្រទេសស្រីលង្កា ។ ភេវរជន នៃក្រុម “LTTE” ជាអ្នកទទួលខុសត្រូវ ចំពោះការវាយប្រហារអត្តឃាត ទាំងនេះ ។ ប្រសិនបើប្រឈមមុខនឹងការចាប់ខ្លួនពីសំណាក់អាជ្ញាធរស្រីលង្កា ដោយជៀសមិនរួច ក្រុមប្រតិបត្តិការទាំងនោះ និងអ្នកផ្សេងទៀត បានធ្វើអត្តឃាត ដោយលេបថ្នាំពុល ដែលពាក់នៅករបស់ពួកគេ ។
ការចរចារវាងក្រុមខ្លាតាមិល និងរដ្ឋាភិបាលស្រីលង្កា បានបែកបាក់គ្នា នៅពាក់កណ្តាលទសវត្សឆ្នាំ ១៩៩០ ។ នៅខែធ្នូ ឆ្នាំ ២០០០ LTTE បានប្រកាសបទឈប់បាញ់ ជាឯកតោភាគី ដែលមានរយៈពេលរហូតដល់ខែមេសា ២០០១ ប៉ុណ្ណោះ ។
បន្ទាប់មក ការប្រយុទ្ធគ្នារវាងក្រុមទ័ពព្រៃតាមិល និងកងទ័ពរដ្ឋាភិបាលស្រីលង្កា បានផ្ទុះឡើងជាថ្មីម្តងទៀត រហូតដល់ខែកុម្ភៈ ឆ្នាំ ២០០២ នៅពេលដែលរដ្ឋាភិបាល និង LTTE បានចុះហត្ថលេខាលើកិច្ចព្រមព្រៀង ឈប់បាញ់អចិន្ត្រៃយ៍ ។
ទោះយ៉ាងណា អំពើហិង្សាបានបន្តកើតមានជាហូរហែ ហើយនៅឆ្នាំ ២០០៦ សហភាពអឺរ៉ុប បានចុះឈ្មោះក្រុម LTTE ទៅក្នុងបញ្ជីអង្គការភេរវកម្ម ដែលត្រូវហាមឃាត់ ។ មិនយូរប៉ុន្មាន ការប្រយុទ្ធគ្នាយ៉ាងខ្លាំង បានផ្ទុះឡើងរវាងក្រុមឧទ្ទាម និងកងកម្លាំងរដ្ឋាភិបាលស្រីលង្កា ហើយមនុស្សរាប់ពាន់នាក់ ត្រូវបានសម្លាប់ ។
នៅខែមករា ឆ្នាំ ២០០៨ រដ្ឋាភិបាលស្រីលង្កា បានលុបចោលកិច្ចព្រមព្រៀងឈប់បាញ់ (ឆ្នាំ២០០២) ជាផ្លូវការ ហើយយោធារបស់ស្រីលង្កា ដណ្តើមបានតំបន់សំខាន់ៗ របស់ក្រុម LTTE ក្នុងរយៈពេលប៉ុន្មាន ខែបន្ទាប់ ។ ទីប្រជុំជនធំមួយ ដែលជាមជ្ឈមណ្ឌលរដ្ឋបាលរបស់ LTTE បានស្ថិតនៅក្រោមការគ្រប់គ្រងរបស់រដ្ឋាភិបាលស្រីលង្កា ក្នុងខែមករាឆ្នាំ ២០០៩ ។
នៅចុង ខែមេសា កងទ័ពរដ្ឋាភិបាល ចាប់បាន យុទ្ធជនខ្លាតាមិល ដែលនៅសេសសល់ តាមបណ្តោយឆ្នេរតូចមួយ នៅភាគឥសានប្រទេស ។ ការវាយលុកចុងក្រោយ ដោយកងកម្លាំងទ័ព នៅពាក់កណ្តាលខែឧសភា បានទទួលជោគជ័យ ក្នុងការវាយដណ្តើមយក និងកាន់កាប់មូលដ្ឋានចុងក្រោយរបស់ក្រុមឧទ្ទាម ហើយមេដឹកនាំ LTTE (រួមទាំងលោក Velupillai Prabhakaran) ត្រូវបានសម្លាប់ នាពេលនោះ ដែលរឿង «Methagu» និយាយពីជីវិតមេដឹកនាំរបស់ខ្លាតាមិល រូបនេះ ។ ចំនួន នៃការស្លាប់ទាក់ទងនឹងសង្គ្រាមស៊ីវិល នៅប្រទេសស្រីលង្កា ចាប់តាំងពីដើមទស្សវត្សរ៍ឆ្នាំ ១៩៨០ ត្រូវបានប៉ាន់ប្រមាណថា មានចន្លោះពី ៧០.០០០ ទៅ ៨០.០០០នាក់ ដោយមានមនុស្សរាប់ម៉ឺននាក់ផ្សេងទៀត ត្រូវបានផ្លាស់ទីលំនៅ ដោយការប្រយុទ្ធគ្នា ។
ចំនួនយុទ្ធជនក្នុងក្រុមឧទ្ទាមតាមិល មិនត្រូវបានកំណត់ចំនួនជាក់លាក់ទេ ព្រោះតួលេខនេះ ប្រែប្រួលទៅតាមពេលវេលា និងទ្រព្យសម្បត្តិរបស់អង្គការនេះ ម្តងកើនឡើង និងធ្លាក់ចុះ ។ តាមការប៉ាន់ស្មាន ពីប្រភពផ្សេងៗ ក្រុមឧទ្ទាមតាមិល មានចំនួនយ៉ាងតិចពី ៣,០០០នាក់ ដល់ ១៦.០០០នាក់ ឬច្រើនជាងនេះ ។ បើតាមរបាយការណ៍របស់អង្គការសហប្រជាជាតិ ស្តីពីប្រទេសស្រីលង្កា ពីឆ្នាំ ២០១១ បានចុះបញ្ជីអ្នកប្រយុទ្ធ ក្រុមឧទ្ទាមតាមិល ដែលបានចុះចូលជាមួយរដ្ឋាភិបាល មានចំនួន ៥.៨០០នាក់ ៕
ចែករំលែកព័តមាននេះ