ខេត្តព្រៃវែង ៖ ប្រតិភូក្រសួងសាធារណការ និងដឹកជញ្ជូន ដឹកនាំដោយលោករដ្ឋមន្ត្រី ត្រាំ អីុវតឹក កាលពីព្រឹកថ្ងៃទី១ ខែមីនា បានអញ្ជើញទៅត្រួតពិនិត្យមើលទីតាំង១កន្លែងនៅក្បែររង្វង់មូលផ្លូវឡើងស្ពានអ្នកលឿង
ខេត្តព្រៃវែង ៖ ប្រតិភូក្រសួងសាធារណការ និងដឹកជញ្ជូន ដឹកនាំដោយលោករដ្ឋមន្ត្រី ត្រាំ អីុវតឹក កាលពីព្រឹកថ្ងៃទី១ ខែមីនា បានអញ្ជើញទៅត្រួតពិនិត្យមើលទីតាំង១កន្លែងនៅក្បែររង្វង់មូលផ្លូវឡើងស្ពានអ្នកលឿង ស្ថិតក្នុងភូមិ១ ឃុំព្រែកខ្សាយ«ខ» ស្រុកពាមរក៍ ដែលជាទីកន្លែងសម្រាប់ធ្វើជាស្ថានីយថ្លឹងរថយន្ត ។
ក្នុងឱកាសនោះ គេឃើញមានការចូលរួម ពីសំណាក់លោកអភិបាលរងខេត្តព្រៃវែង អភិបាលរងខេត្តកណ្តាល ប្រធានមន្ទីរសាធារណការនិងដឹកជញ្ជូនខេត្តកណ្តាល ខេត្តព្រៃវែង ខេត្តស្វាយរៀង និងប្រតិភូមកពីក្រសួងជាច្រើនរូបទៀត ។
លោករដ្ឋមន្ត្រី ត្រាំ អីុវតឹក ថ្លែងថា តាមពិតរឿងស្ថានីយថ្លឹងទម្ងន់រថយន្តនេះ ក្រសួងមានគម្រោងដាក់នៅចំណុចផ្លូវឡើងស្ពានអ្នកលឿងនេះរួចជាស្រេចទៅហើយ ប៉ុន្តែ១រយៈមកនេះមានការយឺតយ៉ាវមិនទាន់បានរៀបចំដាក់ គឺដោយសារតែខាងក្រុមហ៊ុនជប៉ុនធ្វើការរបស់គេមិនទាន់ចប់រួចរាល់ ។ ប៉ុន្តែ ពេលនេះដោយសារតែមានហេតុការណ៍រថយន្តធុនធំដឹកលើសទម្ងន់បើកឡើងស្ពានធ្វើឱ្យខូចស្ពានបែបនេះ ទើបក្រសួងសម្រេចរៀបចំដាក់ស្ថានីយថ្លឹងទម្ងន់នេះតែម្តង គឺលែងចាំអីទៀតហើយ ។
ទាក់ទងទៅនឹងរឿងដាក់ជញ្ជីងនេះដែរ ក្រុមអ្នកសារព័ត៌មានបានសាកសួរទៅលោក រដ្ឋមន្ត្រីថា ការដាក់ជញ្ជីងនៅចំណុចផ្លូវឡើងស្ពានអ្នកលឿងនេះ គឺអាចទប់ស្កាត់បានតែក្រុមរថយន្ត ដែលមានបំណងបើកឆ្លងស្ពានទៅខេត្តកណ្តាល ឬទៅភ្នំពេញប៉ុណ្ណោះ ប៉ុន្តែសម្រាប់រថយន្តយីឌុបធំៗរាប់សិបគ្រឿងដែលដឹកលើសទម្ងន់ធ្វើដំណើរពីខេត្តផ្សេងៗ ចូលមកខេត្តព្រៃវែងតាមផ្លូវជាតិលេខ១១ និងកាត់តាមស្រុកបាភ្នំ ឡើងមកលើផ្លូវជាតិ១វិញ គឺពុំមានជញ្ជីងចាប់ថ្លឹងនិងទប់ស្កាត់ទេ តើក្រសួងមានវិធានការបែបណា ?
សំណួរនេះត្រូវបានលោករដ្ឋមន្ត្រី ឆ្លើយយ៉ាងខ្លីថា ការដាក់ជញ្ជីងនេះគឺ់ដើម្បីតែការពារស្ពានអ្នកលឿងប៉ុណ្ណោះ ចំណែករឿងផ្លូវចាំដោះស្រាយតាមក្រោយ ។
ទាក់ទងទៅនឹងរឿងរថយន្តយីឌុបធំៗដឹកលើសទម្ងន់ធ្វើចរាចរណ៍នៅលើដងផ្លូវនេះ ត្រូវបានសាធារណមតិខ្លះលើកឡើងថា ក្រុមរថយន្តទាំងនោះដឹកលើសទម្ងន់បាន គឺដោយសារតែគេកែច្នៃតទ្រុងបន្ថែម ដោយរថយន្តខ្លះទ្រុងកំណើតរបស់វាកម្ពស់តែជាង១ម៉ែត្រទេ ប៉ុន្តែគេតបន្ថែមរហូតដល់ជិត៣ម៉ែត្រ និងតគូទក្រោយបន្ថែមទៀត មើលទៅធំសម្បើមខ្លាំងណាស់ ។ ករណីនេះ សម្តេចតេជោធ្លាប់បានផ្តល់អនុសាសន៍ឱ្យកាត់កន្ទុយរថយន្តទាំងនោះ តែឃើញធ្វើតែមួយដង្ហើមចង្រិតក៏ស្ងាត់ទៅវិញ។
ចំណែករថយន្តដឹកលើសទម្ងន់បំផ្លាញស្ពាននិងផ្លូវនេះ សម្តេចតេជោនាយករដ្ឋមន្ត្រី ក៏ធ្លាប់បានថ្លែងជាសាធារណៈនាឱកាសសម្ពោធស្ពានលើកំណាត់ផ្លូវជាតិលេខ១ថា បើរកឃើញរថយន្តក្រុមហ៊ុនណាដឹកលើសចំណុះបំផ្លាញស្ពាន ថ្នល់ នឹងដកអាជ្ញាប័ណ្ណក្រុមហ៊ុននោះ តែរហូតមកដល់ពេលនេះ គ្មានឃើញក្រុមហ៊ុនណាមួយត្រូវបានបិទទេ ហើយការបំផ្លាញស្ពាន ថ្នល់នៅតែដដែល ។ បញ្ហានេះ បើក្រសួងសាធារណការឬមន្ទីរសាធារណការនិងដឹកជញ្ជូនខេត្ត ធ្វើការគ្រប់គ្រងរឿងរថយន្តតទ្រុងនេះបាន គឺពិតជាមិនមានរថយន្តដឹកលើសទម្ងន់រហូតដល់រាប់សិបតោនទៀតឡើយ ។
គួរបញ្ជាក់ថា នៅចំណុចផ្លូវឡើងស្ពានអ្នកលឿងនេះ មានប្រជាពលរដ្ឋជាច្រើនដែលមានដីនៅតាមបណ្តោយផ្លូវនេះរអ៊ូរទាំយ៉ាងខ្លាំងរឿងដែលខាងជប៉ុនបិទមិនឱ្យពួកគាត់ចាក់ដីតភ្ជាប់មកទល់នឹងផ្លូវឡើងស្ពាន ធ្វើឱ្យពួកគាត់គ្មានផ្លូវចេញចូលបាន ជាពិសេសគឺហាងឆេងតម្លៃដីរបស់ពួកគាត់ត្រូវធ្លាក់ថ្លៃយ៉ាងខ្លាំង ។
ចំពោះបញ្ហានេះ លោករដ្ឋមន្ត្រីបញ្ជាក់ថា មិនមែនតែខាងជប៉ុនទេដែលហាមនោះ ក្រសួងក៏សុំហាមដែរ ព្រោះបើអនុញ្ញាតឱ្យបងប្អូនចាក់ដីតភ្ជាប់មកផ្លូវនេះបាន នោះបងប្អូននឹងធ្វើផ្ទះ ធ្វើរោងលក់ដូរនៅលើចិញ្ចើមផ្លូវនេះ ធ្វើឱ្យមានភាពរញ៉េរញ៉ៃពិបាកគ្រប់គ្រង ។ ម្យ៉ាងទៀតផ្លូវនេះជាផ្លូវហាយវ៉េ ដែលមានភ្ញៀវជាតិនិងអន្តរជាតិចេញចូលច្រើន បើមានអ្នកលក់នៅលើចិញ្ចើមផ្លូវ ធ្វើឱ្យផ្លូវចង្អៀត និងរញ៉េរញ៉ៃនោះ ក៏វាមិនល្អមើលដែរ និយាយឱ្យខ្លីគឺមិនអាចចាក់ដីមកភ្ជាប់ផ្លូវឡើងស្ពានបានទេ ។
ក្នុងព្រឹត្តិការណ៍ដាច់ដោយឡែកមួយ នគរបាលចរាចរណ៍ស្រុកលើកដែក ខេត្ដកណ្ដាល បានចាប់រថយន្ដដឹកត្រីមួយគ្រឿង ពាក់ផ្លាកលេខ កំពង់ចាម 3A-0264 យកទៅរក្សាទុកនៅប៉ុស្ដិ៍នគរបាលរដ្ឋបាលឃុំព្រែកទន្លាប់ ។ ការចាប់ឃាត់ថយន្ដដឹកត្រីទុកនេះ ត្រូវបានលោកវរសេនីយ៍ត្រី អាំ ធូ អធិការរងនគរបាលស្រុកលើកដែក ឱ្យដឹងកាលពីរសៀលថ្ងៃទី២៩ ខែកុម្ភៈថា រថយន្ដដឹកត្រីខាងលើត្រូវបាននគរបាលស្រុកឃាត់ចាប់នៅវេលាម៉ោង៥និង៣០នាទីល្ងាចថ្ងៃទី២៨ ខែកុម្ភៈ។
ការឃាត់ចាប់នេះ ធ្វើឡើងបន្ទាប់ពីរថយន្ដធ្វើចរាចរណ៍ឆ្លងកាត់ស្ពានអ្នកលឿងពីកើតទៅលិច លុះមកដល់កណ្ដាលស្ពាន រថយន្ដហាក់មានបញ្ហាដោយបើកចុះយ៉ាងលឿន ពីចំណុចចំណោតបានប្រហែល២០ម៉ែត្រ ស្រាប់តែដាច់ហ្វ្រាំងជាន់លែងសីុ ឯល្បឿនរថយន្ដចេះតែលឿនទៅៗ ។ ខណៈឃើញសភាពដូច្នោះ អ្នកបើកបរបានបញ្ជាឱ្យព្រូយកកំណាត់ឈើបួនជ្រុង ហើយលោតចុះពីលើរថយន្ដ ដើម្បីយកកំណល់ទៅកល់កង់រថយន្ដផ្នែកខាងក្រោយឱ្យជាប់កុំឱ្យរថយន្ដជ្រុលទៅមុខទៀត ។
ប៉ុន្តែ ដោយសារភ័យ ព្រូបានដាក់កំណល់បណ្តោយចូលចន្លោះកណ្ដាលនៃកង់រថយន្ដទាំង២ មានន័យថា កំណល់ដែលព្រូយកទៅកល់កង់រថយន្តនោះ ពេលដាក់កល់ថាដាក់ទទឹងកង់រថយន្ត តែបែរជាកំណល់ចូលទៅនៅចន្លោះកណ្តាលនៃកង់រថយន្តទាំង២ គឺចូលបណ្តោយកង់ទៅវិញ ។ ពេលឈើកំណល់ចូលទៅកប់លិចជាប់ទៅនឹងចន្លោះកង់រថយន្តហើយកង់រថយន្ដក៏លែងវិលខ្លាំង ប៉ុន្ដែជ្រុងឈើកំណល់បានបង្កឱ្យមានការកូតថ្នល់កៅស៊ូនៅលើស្ពាន ដែលមានជម្រៅប្រហែលកន្លះសង្ទីម៉ែត្រ ទទឹង១សង្ទីម៉ែត្រ និងបណ្តោយប្រវែងប្រហែល៣០ម៉ែត្រ គឺអស់មួយខ្យល់នៃល្បឿនទើបរថយន្ដឈប់ទៅមុខលែងរួច ។
ដោយភ័យខ្លាចមានបញ្ហា កម្លាំងនគរបាលស្រុកដែលនៅឈរជើងនៅទីនោះ ក៏បានឃាត់រថយន្ដមួយគ្រឿងខាងលើ យកទៅរក្សាទុកនៅប៉ុស្ដិ៍នគរបាលរដ្ឋបាលឃុំព្រែកទន្លាប់ដើម្បីទុកឱ្យភាគីជប៉ុន ឬអ្នកឯកទេស គេទៅពិនិត្យមើលកន្លែងដែលរថយន្ដធ្វើឱ្យកូតកៅស៊ូថ្នល់ថា តើមានការប៉ះពាល់យ៉ាងម៉េចខ្លះ ។ លោកក៏បានអញ្ជើញម្ចាស់រថយន្ដឈ្មោះ ចឹប សុខជា ឱ្យមកដោះស្រាយជាមួយភាគីជប៉ុន តែរហូតមកដល់ពេលនេះ ទាំងភាគីជប៉ុន ទាំងភាគីរថយន្ដ ពុំទាន់បានជួបដោះស្រាយយ៉ាងណានៅឡើយទេ ។
ចំណែកត្រីដែលម្ចាស់រថយន្ដនាំមកពីប្រទេសវៀតណាម ចូលតាមច្រកព្រំដែនបន្ទាយចក្រី មិនដឹងជាប្រភេទត្រីអ្វីហើយប៉ុន្មានតោនក៏លោកមិនដឹងដែរ តែលោកអះអាងថា មិនលើសចំណុះទេ ។ ជាមួយនេះ លោកបានធ្វើកំណត់ហេតុប្រគល់ត្រីឱ្យម្ចាស់វិញ ទុកតែរថយន្ដប៉ុណ្ណោះ ៕
ចែករំលែកព័តមាននេះ