ខេត្តសៀមរាប៖ នាថ្ងៃទី២៩ ខែកុម្ភៈ នៅទីបញ្ជាការដ្ឋានវរសេនាតូចនគរបាលការពារព្រំដែនគោកលេខ១០៥ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មានប្រសាសន៍ថា
ខេត្តសៀមរាប៖ នាថ្ងៃទី២៩ ខែកុម្ភៈ នៅទីបញ្ជាការដ្ឋានវរសេនាតូចនគរបាលការពារព្រំដែនគោកលេខ១០៥ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មានប្រសាសន៍ថា នៅក្នុងខែមេសា ខាងមុខនេះ រាជរដ្ឋាភិបាលនឹងពិនិត្យពិចារណាលទ្ធភាព ដើម្បីដំឡើងប្រាក់បៀវត្សមន្ត្រីរាជការ និងកងកម្លាំងប្រដាប់អាវុធបន្ថែមទៀត យ៉ាងហោចណាស់ត្រូវទទួលបានជាង៧០ម៉ឺនរៀល ។
នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ និងជាមេបញ្ជាការនគរបាលជាតិប្រចាំតំបន់ភូមិភាគទី៤ និងទី៥ រាយការណ៍ថា សភាពការណ៍ព្រំដែននាពេលបច្ចុប្បន្ន ស្ថិតក្នុងស្ថានភាពល្អប្រសើរ ហើយកំពុងតែឈានទៅរកការអភិវឌ្ឍទាំងក្នុងដែនគ្រប់គ្រងរដ្ឋបាល និងការកសាងអង្គភាពប្រដាប់អាវុធ ។ កងកម្លាំងនគរបាលជាតិ បានសម្រេចភារកិច្ច ដោយមានកិច្ចសហការជាមួយកងយោធពលខេមរភូមិន្ទ ។ ប្រជាពលរដ្ឋដែលរស់នៅក្នុងតំបន់ព្រំដែន មានកិច្ចសហការល្អជាមួយអាជ្ញាធរដែនដី និងសមត្ថកិច្ចពាក់ព័ន្ធ អនុវត្តគោលនយោបាយភូមិឃុំមានសុវត្ថិភាព រក្សាបានសន្តិសុខក្នុងមូលដ្ឋានបានល្អ ។ នាយឧត្តមសេនីយ ខេង សុមេធ បានរាយការណ៍ជូនរដ្ឋមន្ត្រីផងដែរថា កងកម្លាំងប្រដាប់អាវុធដែលកំពុងឈរជើងការពារបូរណភាពដែនដី បានទទួលការយកចិត្តទុកដាក់ពីរាជរដ្ឋាភិបាល ក្នុងការដំឡើងប្រាក់បៀវត្សកន្លងមក ។ គ្រប់អង្គភាពទាំងអស់ ត្រូវបានក្រសួងសេដ្ឋកិច្ចនិងហិរញ្ញវត្ថុ បើប្រាក់បៀវត្សយ៉ាងទៀងទាត់ នាអំឡុងសប្តាហ៍ទី៤ ជារៀងរាល់ខែ ។
លោក អូនព័ន្ធ មុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ បានថ្លែងឱ្យដឹងយ៉ាងដូច្នេះ នៅក្នុងពិធីជួបសំណេះសំណាល និងនាំយកអំណោយ រួមមានសម្ភារ សំណង់ ស្បៀងអាហារ និងថវិកាមួយចំនួនទៀត ឧបត្ថម្ភជូដល់កងកម្លាំងនគរបាលការពារព្រំដែនគោកវរសេនាតូចលេខ១០៥ និងកងកម្លាំងវរសេនាតូចអន្តរាគមន៍លេខ៣៩៥ ដែលកំពុងឈរជើង បំពេញភារកិច្ចនៅតំបន់មុម៣ ព្រំដែន៣ប្រទេស( កម្ពុជា-ឡាវ-ថៃ ) ដែនភូមិសាស្ត្រសមរភូមិមុខទិសទី១ យោធភូមិភាគទី៤ ។ អង្គភាពប្រដាប់អាវុធទាំង២នេះ ជាអង្គភាពសម្ពន្ធមេត្រីភាពជាមួយក្រសួងសេដ្ឋកិច្ចនិងហិរញ្ញវត្ថុ អស់រយៈពេលជាច្រើនឆ្នាំមកហើយ ដែលបានបង្កើតឡើងក្រោមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា ដើម្បីបម្រើឱ្យចលនាពង្រឹងខឿនការពារជាតិរបស់ប្រជាជន ក្នុងពាក្យស្លោកដែលថា «សមរភូមិក្រោយឧបត្ថម្ភសមរភូមិមុខ»។
លោកបានបន្តថា ក្នុងនាមរាជរដ្ឋាភិបាលកម្ពុជា និងក្នុងនាមជាអង្គភាពសម្ពន្ធមេត្រីភាព បានសម្តែងនូវក្តីសោមនស្សរីករាយជាមួយលទ្ធផលនៃការអភិវឌ្ឍតំបន់ព្រំដែន ដែលជាចក្ខុវិស័យរបស់រាជរដ្ឋាភិបាល ភាពរីកចម្រើនរឹងមាំ និងការកសាងអង្គភាពប្រដាប់អាវុធជួរមុខ ជាមួយនឹងការពាំនាំនូវក្តីនឹករលឹករបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ផងដែរ ចំពោះកម្លាំងជួរមុខទាំងអស់ ។
លោកបានលើកឡើងបន្ថែមទៀតថា បច្ចុប្បន្ននេះ ក្រសួងសេដ្ឋកិច្ចនិងហិរញ្ញវត្ថុ ខិតខំប្រើប្រាស់គ្រប់កម្លាំងជំនាញ អនុវត្តបទបញ្ជាដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការពង្រឹងប្រភពថវិកាចំណូលសេដ្ឋកិច្ចជាតិ ដើម្បីបំពេញមហិច្ឆតានៃការលើកកម្ពស់ជីវភាពរស់នៅរបស់មន្ត្រីរាជការ កងកម្លាំងប្រដាប់អាវុធ តាមរយៈនៃផែនការដំឡើងប្រាក់បៀវត្ស ហើយក៏ជាមធ្យោបាយពង្រឹងប្រព័ន្ធការងារផងដែរ ។
លោកបានបញ្ជាក់ឱ្យដឹងថា តម្រូវក្នុងការផ្គត់ផ្គង់ប្រាក់បៀវត្សជូនបុគ្គលិក មន្ត្រីរាជការ និងកងកម្លាំងប្រដាប់អាវុធគ្រប់ប្រភេទ គឺរាជរដ្ឋាភិបាលត្រូវបានចំណាយថវិកាជាតិ ក្នុង១ខែ ប្រមាណជា២៦០ពាន់លានរៀល ហើយនឹងត្រូវបានចំណាយប្រហែលជាជិតទ្វេរដង នៅពេលមានដែលការដំឡើងប្រាក់បៀរវត្សនៅពេលខាងមុខ ។ ពាក់ព័ន្ធទៅនឹងអំណោយឧបត្ថម្ភសម្រាប់អង្គភាពសម្ពន្ធមេត្រីភាពជួរមុខ លោកបានបញ្ជាក់ថា អំណោយទាំងអស់នេះ ក្រសួងសេដ្ឋកិច្ចនិងហិរញ្ញវត្ថុ មិនបានប្រើប្រាស់ថវិការបស់ជាតិនោះទេ ព្រោះនេះជាមនសិការស្ម័គ្រស្មោះ ។
លោកបានថ្លែងអំណរគុណចំពោះថ្នាក់ដឹកនាំ បុគ្គលិកមន្ត្រីរាជការក្រោមឱវាទក្រសួងសេដ្ឋកិច្ចទាំងអស់ រួមទាំងនៅបណ្តាខេត្ត-រាជធានីទូទាំងប្រទេសផងដែរ ដែលបានរួបរួមគ្នាបរិច្ចាគវិភាគទាន ដើម្បីពង្រឹងខឿនការពារជាតិ ឧបត្ថម្ភសមរភូមិ តាមអនុសាសន៍ដ៏ខ្ពង់ខ្ពស់នៃប្រមុខរាជរដ្ឋាភិបាលកម្ពុជា ។អំណោយទាំងនោះ រួមមានសម្ភារ សំណង់ ស្បៀងអាហារសរុបប្រមាណជិត៣០មុខ ដោយឡែកថវិកាត្រូវបានឧបត្ថម្ភជូន នាយនគរបាល នាយនិងពលទាហាន ក្នុងអង្គភាពទាំង២ បានថវិកាក្នុងម្នាក់ៗ៥ម៉ឺនរៀល និងឧបត្ថម្ភដល់អង្គភាពនគរបាល៥លាន ៥សែនរៀល និងឧបត្ថម្ភសម្រាប់អង្គភាពយោធា៧លានរៀល ៕
ចែករំលែកព័តមាននេះ