រាជធានីភ្នំពេញ ៖ មន្ត្រីចរាចរណ៍ នៃអធិការដ្ឋាននគរបាលខណ្ឌទួលគោក មួយរូប បានរងរបួសធ្ងន់ ដោយសារបុរសស្រវឹងម្នាក់ បានបើកបរក្នុងល្បឿនលឿន ហើយជ្រុលមកបុកមន្ត្រីនគរបាល ដែលកំពុងអនុវត្តច្បាប់ចរាចរណ៍…
រាជធានីភ្នំពេញ ៖ មន្ត្រីចរាចរណ៍ នៃអធិការដ្ឋាននគរបាលខណ្ឌទួលគោក មួយរូប បានរងរបួសធ្ងន់ ដោយសារបុរសស្រវឹងម្នាក់ បានបើកបរក្នុងល្បឿនលឿន ហើយជ្រុលមកបុកមន្ត្រីនគរបាល ដែលកំពុងអនុវត្តច្បាប់ចរាចរណ៍ និងត្រួតពិនិត្យអាវុធជាតិផ្ទុះ ។
ហេតុការណ៍នេះ បានកើតឡើងនៅវេលាម៉ោង២០និង៥៥នាទីយប់ថ្ងៃទី២៧ ខែកញ្ញា ឆ្នាំ២០២១ នៅតាមបណ្តោយផ្លូវ២៧១ ចំណុចមុខផ្សារហេងលី សង្កាត់ទឹកល្អក់ទី៣ ខណ្ឌទួលគោក ។
ជនសង្ស័យបើកម៉ូតូ០១គ្រឿង ម៉ាក let’s ពណ៍ស ផ្លាកលេខ ភ្នំពេញ1HM-9792 បានបើកម៉ូតូក្នុងល្បឿនលឿន និងក្នុងស្ថានភាពស្រវឹងខ្លាំង បុកកម្លាំងសមត្ថកិច្ច ដែលកំពុងបំពេញភារកិច្ច អនុវត្តន៍ច្បាប់ចរាចរណ៌ និងត្រួតពិនិត្យអាវុធជាតិផ្ទុះ បណ្តាលឲ្យមន្ត្រីរងរបួសធ្ងន់ គឺលោកអនុសេនីយ៌ឯក ស៊ុយ ទី នាយផ្នែកសណ្តាប់ធ្នាប់ និងចរាចរណ៌ នៃអធិការដ្ឋាននគរបាលខណ្ឌទួលគោក ។
បច្ចុប្បន្ន ជនបង្ក និងមន្ត្រីខាងលើ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យព្រះកុសុមៈ ដើម្បីព្យាបាលរបួស ទាំង២នាក់ ។
ក្រោយពីការសម្រាកព្យាបាលរួច ជនបង្កនឹងត្រូវរៀបចំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីអនុវត្តបន្តតាមនីតិវិធីច្បាប់ ។
ដោយមានការយកចិត្តទុកដាក់ពីឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ នៅរសៀលថ្ងៃទី២៨ ខែកញ្ញា ឆ្នាំ២០២១ បានចាត់ឲ្យលោកវរសេនីយ៍ឯក សុខ ហេង អធិការ នៃអធិការដ្ឋាននគរបាលខណ្ឌទួលគោក ដឹកនាំមន្ដ្រីក្រោមឱវាទ ចុះសួរសុខទុក្ខលោកអនុសេនីយ៍ឯក ស៊ូយ ទី ដែលកំពុងសម្រាប់ព្យាបាល នៅក្នុងមន្ទីរពេទ្យព្រះកុសមៈ ។
ក្នុងឱកាសនោះដែរ លោកអធិការ បាននាំយកថវិការបស់លោកស្នងការចំនួន ៥លានរៀល ថវិការបស់លោកអធិការ និងមន្ត្រីក្រោមឱវាទចំនួន ២លានរៀល និងថវិកាសប្បុរសជនចំនួន ១០០ដុល្លារ និងសម្ភារមួយចំនួន ជូនលោក អនុសេនីយ៍ឯក ស៊ូយ ទី ៕
ចែករំលែកព័តមាននេះ