ខេត្តតាកែវ ៖ រថយន្តដឹកកូនត្រីឆ្តោចូលមកពីស្រុកយួនមួយគ្រឿង បានត្រូវកំលាំងកងរាជអាវុធហត្ថខេត្តសហការជាមួយសមត្ថកិច្ចប៉ូលិសស្រុកត្រាំកក់តាមចាប់បាន ខណៈពេលរថយន្តនេះដឹកកូនត្រីឆ្តោល្មើសច្បាប់ចូលពីស្រុកយួនតាមស្រុកគីរីវង់ ឆ្ពោះទៅលក់ឱ្យម៉ូយនៅភ្នំពេញ។ ការបង្ក្រាបរថយន្តដឹកកូនត្រីខុសច្បាប់នេះបានធ្វើឡើងតាមបណ្តោយផ្លូវជាតិលេខ៣ ខាងត្បូងស្ពានស្លាគូ ស្ថិតក្នុងភូមិចោមពល ឃុំពពេល ស្រុកត្រាំកក់ វេលាម៉ោង២និង៣០នាទី រសៀល ថ្ងៃទី១៨ តុលា។
លោកអនុសេនីយ៍ឯក ឡា យ៉ាស់យ៉ា ជំនួយការសន្តិសុខព្រហ្មទណ្ឌនៃកងរាជអាវុធហត្ថខេត្តបានឱ្យដឹងថា រថយន្តដឹកកូនត្រីឆ្តោចូលមកពីស្រុកយួននេះ ម៉ាកកាមរី ស៊េរី៨៧ពណ៌ប្រផេះ ពាក់ស្លាកលេខ គ-៧៥៨៤ ភព២ ដែលមានម្ចាស់រស់នៅផ្សារទន្លាប់ ស្រុកគីរីវង់ ដឹកកូនត្រីឆ្តោរាប់សែនក្បាល។ នៅមុនពេលឃាត់ចាប់រូបលោក និងមន្ត្រីក្រោមឱវាទបានបើករថយន្តតាមបណ្តោយផ្លូវជាតិលេខ២ ខាងត្បូងទីរួមខេត្ត ខណៈនោះស្រាប់តែឃើញមានរថយន្តកាមរីមួយគ្រឿងបើកមកពីទិសខាងត្បូងយ៉ាងលឿនលោកក៏បើករថយន្តដេញតាមពីក្រោយ តែរថយន្តនោះមិនព្រមឱ្យវ៉ាសោះ ហើយលោកនៅតែដេញជាប់ពីក្រោយរហូតនៅតាមផ្លូវកៅស៊ូពីកែងអូរចំបក់ ទៅអង្គតាសោម។
លោកឡា យ៉ាស់យ៉ា បានបន្តទៀតថា ដោយមើលឃើញបែបនេះ លោកបានទូរស័ព្ទសុំការអន្តរាគមន៍ពីប៉ូលិសស្រុកត្រាំកក់ ជួយស្កាត់ពីមុខ និងដេញរហូតដល់ស្ពានស្លាគូ ទើបចាប់រថយន្តដឹកកូនត្រីឆ្តោនេះបាន។ លោកអួន សុខុម អធិការរងប៉ូលិសស្រុកត្រាំកក់ បានឱ្យដឹងថា បន្ទាប់ពីមានការសុំការអន្តរាគមន៍ភ្លាម លោកក៏បានបើករថយន្តទៅស្កាត់នៅស្ពានស្លាគូ ហេតុនេះហើយទើបរថយន្តដឹកកូនត្រីរត់ទៅណាមិនរួចក៏ចាប់បាន តែអ្នកបើកបររថយន្តនោះបានវាយគ្នាជាមួយមន្ត្រីក្រោមឱវាទលោកថែមទៀត។ រថយន្តដឹកត្រីត្រូវបានបញ្ជូនមកកាន់ទីបញ្ជាការកងរាជអាវុធហត្ថខេត្ត លុះល្ងាចថ្ងៃដដែលទើបឃើ់ញខាងជលផលមកសុំចូលរួមលែងកូនត្រីឆ្តោទាំងអស់ទៅក្នុងបឹងតាកែវវិញ។ ការចិញ្ចឹមឆ្តោ និងបំផ្លាញកូនត្រីទើបមានការហាមឃាត់៕
ចែករំលែកព័តមាននេះ