ពិធីករ តាប៊ុយ សម្រេចចិត្តដើរចេញពីស្ថានីយ៍ទូរទស្សន៍ MyTV
រាជធានីភ្នំពេញ ៖ ពិធីករដ៏ល្បីឈ្មោះ ប្រចាំនៅស្ថានីយ៍ទូរទស្សន៍ My TV វីជេ តាប៊ុយ បានប្រកាសនៅថ្ងៃទី០៩ កញ្ញា…
រាជធានីភ្នំពេញ ៖ ពិធីករដ៏ល្បីឈ្មោះ ប្រចាំនៅស្ថានីយ៍ទូរទស្សន៍ My TV វីជេ តាប៊ុយ បានប្រកាសនៅថ្ងៃទី០៩ កញ្ញា ២០២១នេះថា លោកបានសម្រេចចិត្តដើរចេញពីស្ថានីយ៍ទូរទស្សន៍នេះហើយ ក្រោយរស់នៅក្នុងទ្រនំនេះ អស់រយៈពេល១៣ឆ្នាំ ព្រោះចង់សម្រាកខួរក្បាល ដើរលេងឲ្យសប្បាយ និងឲ្យកាដូខ្លួន ធ្វើឲ្យមហាជនអ្នកប្រើប្រាស់បណ្ដាញសង្គមមានការភ្ញាក់ផ្អើលយ៉ាងខ្លាំង ។
បើយោងតាមគណនីហ្វេសប៊ុករបស់លោក តាប៊ុយ បានបង្ហោះសាររៀបរាប់ថា ថ្ងៃនេះ លោកបានសម្រេចចិត្ត ចាកចេញពី MyTV ហើយ បន្ទាប់ពីបានបម្រើការងារនៅទីនេះ អស់រយៈពេលជិត១៣ឆ្នាំ សម្រាប់ការចាកចេញនេះ គឺរូបលោក និង MyTV មិនមានបញ្ហាអ្វីនឹងគ្នាទេ គឺគ្រាន់តែលោកមានអារម្មណ៍ថា ហត់នឿយ និងចង់អោយខ្លួនឯងមានសេរីភាព និងគេងលក់ស្រួលបានដូចគេ ។
លោកនិយាយថា នាពេលកន្លងមក លោកតែងតែទទួលបាននៅការគាំទ្រយ៉ាងពេញទំហឹង ពីខាងស្ថានីយ៍ និងការផ្តល់ឪកាសជាច្រើនតាំងតែពីថ្ងៃដំបូង ដែលលោកឈានជើងចូល MyTV និងសូមអរគុណដល់ MyTV ដែលយល់ព្រមតាមការសម្រេចចិត្តលាឈប់របស់លោក ។
ពិធីករស្រស់សង្ហារូបនេះ បានបញ្ជាក់ថា «លោកមិនចង់គិតម្នាក់ឯងច្រើនទៀតទេ ជាពិធីករផង ជាផលិតករផង កក់ studio ក៏ខ្លួនឯង រៀបចំតួក៏ខ្លួនឯង មើលការកាត់តក៏ខ្លួន ពិសេសត្រូវចំណាយពេលស្រាវជ្រាវរកគំនិតថ្មីៗទៀត ចង់និយាយថា ហត់ខ្លាំងណាស់ ទោះបីជាមានជំនួយការ ជួយសម្រួលការងារក៏ដោយ» ។
ក្នុងន័យនេះ តាប៊ុយ ចង់បញ្ជាក់ឲ្យបានយ៉ាងច្បាស់ថា ការចាកចេញនេះ ព្រោះតែសម្រាកខួរក្បាលខ្លះ ជាពិសេសលោកមិនចង់គិតច្រើនបន្តទៀត ដ្បិតលោកត្រូវរ៉ាប់រងតែម្នាក់ឯង ជាពិធីករផង ផលិតករផង និងការស្រាវជ្រាវផ្សេងៗទៀត ដែលធ្វើឲ្យហត់នឿយខ្លាំង និងចង់មានសេរីភាព នាពេលនេះគឺចង់ដើរលេង និងអោយកាដូខ្លួនឯងម្តង ព្រោះដាក់សំពាធលើខ្លួនឯងជាយូរពេកហើយ ។
តាប៊ុយ ជាពិធីករដែលពោរពេញទៅដោយវោហារស័ព្ទ លោកបានបន្ថែមថា វាហាក់បីដូចជាក្រៀមក្រំដែរ ដែលត្រូវដើរចេញពីកន្លែងដែលយើងធ្លាប់ហៅថា ជាផ្ទះទី២ ប៉ុន្តែលោកសប្បាយចិត្ត ព្រោះមិនត្រូវគិតច្រើន និងអាចគេងលក់ស្រួល មិនមាន(ស្ត្រេស) ។
បើនិយាយពីទំនាក់ទំនងរវាង តាប៊ុយ និងស្ថានីយ៍ទូរទស្សន៍ MyTV គឺមានច្រើនរហូតលោកនៅតែចងចាំ ព្រោះ MyTV បានផ្លាស់ប្តូរជីវិតរបស់លោក ១៨០ដឺក្រេ ពីសិស្សសាលា ងាកមកធ្វើការងាររបៀបមនុស្សធំ និងបង្រៀនលោកពីចំណុចសូន្យ រហូតក្លាយជាមនុស្សម្នាក់ ដែលបងប្អូនស្គាល់សព្វថ្ងៃ ក៏ដូចជាឪកាសមាសរបស់លោក គឺការបញ្ជូនទៅបណ្តាប្រទេសល្បីៗ ដើម្បីទទួលយកចំណេះដឹងថ្មី ៕
ចែករំលែកព័តមាននេះ