ខេត្តកំពង់ឆ្នាំង ៖ ក្មេងប្រុសស្រីអាយុ១០ឆ្នាំម្នាក់ និងអាយុ៧ឆ្នាំម្នាក់ ទាំង២នាក់បងប្អូនត្រូវបានស្លា.ប់នៅក្នុងអគ្គិភ័យមួយដែលបានកើតឡើងនៅវេលាម៉ោង៩និង១៦នាទីព្រឹក ថ្ងៃទី១៦ ខែសីហា ឆ្នាំ២០២១ នៅភូមិពោធិក្រៃ ឃុំស្វាយ ស្រុកសាមគ្គីមានជ័យ ខណៈពេលដែលក្មេងរងគ្រោះទាំង២នាក់ ត្រូវបានជីដូនចាក់សោពីក្រៅមិនឲ្យចេញពីផ្ទះ ព្រោះតែដោយខ្លាចលង់ទឹក។
យោងតាមរបាយការណ៍របស់លោក សេង ចិន្តា អធិការស្រុកសាមគ្គីមានជ័យ បានឲ្យដឹងថា ក្មេងប្រុសស្រីរងគ្រោះទាំង២នាក់ ម្នាក់មានឈ្មោះនឿន ចិត្រា ភេទប្រុស អាយុ១០ឆ្នាំ និងម្នាក់ទៀតឈ្មោះនឿន ចិន្តា ភេទស្រី អាយុ៧ឆ្នាំ ពួកគេទាំងពីរនាក់មានឪពុកឈ្មោះ អ៊ូ ចាន់នឿន និងម្ដាយឈ្មោះ សួន សំអូន មានទីលំនៅភូមិពោធិក្រៃ ឃុំស្វាយ ស្រុកសាមគ្គីមានជ័យ។
ប្រភពដដែលបានបន្តថា មុនពេលកើតហេតុ ឪពុកម្ដាយកុមាររងគ្រោះទាំង២នាក់មិននៅផ្ទះនោះទេ គឺចេញទៅធ្វើការបាត់ដោយទុកកូនប្រុសស្រីចំនួន៣នាក់ឱ្យជីតាជាអ្នកមើលថែ ។ ហើយនៅព្រឹកថ្ងៃកើតហេតុនោះ ដោយសារតែខ្លាចចៅៗចេញក្រៅទៅលេងទឹក បណ្ដាលឲ្យលង់ស្លា.ប់ ទើបពេលដែលជីតាទៅផ្សារក៏យកចៅទៅតាមម្នាក់ ដោយទុកចៅ២នាក់ដែលជាកុមាររងគ្រោះនៅផ្ទះ និងបានខ្ទាស់ទ្វារពីខាងក្រៅ រួចក៏ទៅផ្សារបាត់ទៅ។
ប្រភពដដែលបន្តថា ជាចៃដន្យអាក្រក់ ស្រាប់តែមានអគ្គិភ័យបានកើតឡើង បណ្ដាលឱ្យកុមារទាំងពីរនាក់ចេញពុំរួច និងត្រូវបានឆាបឆេះស្លា.ប់ក្នុងភ្នក់ភ្លើងយ៉ាងអាណោចអាធ័មជាទីបំផុត ។ ក្នុងគ្រាដែលកំពុងតែមានអគ្គិភ័យនោះផងដែរ រថយន្តពន្លត់អគ្គិភ័យបានទៅជួយបាញ់ទឹកពន្លត់ និងខ្លះព្យាយាមឡើងពីខាងលើ រួចចុះទៅជួយកុមារទាំងពីរនាក់ ប៉ុន្តែមិនអាចជួយបានឡើយ ព្រោះថាពួកគាត់បានស្លា.ប់បាត់អស់ទៅហើយ ។
តាមប្រភពដដែលបានបញ្ជាក់ថា ផ្ទះខាងលើ ទើបនឹងធ្វើមិនទាន់ហើយនោះទេ ដោយធ្វើអំពីថ្ម និងមានទំហំ១២គុណនឹង៥ម៉ែត្រ មានកម្ពស់២ជាន់ ហើយការដែលមានអគ្គិភ័យកើតឡើងនេះ គឺដោយសារតែទុស្សេខ្សែភ្លើង ។ ទោះបីយ៉ាងណានេះក្តី ក្នុងករណីដែលមានអគ្គិភ័យកើតឡើងនេះ សមត្ថកិច្ចនៅបន្តស្រាវជ្រាវថែមទៀត ៕
ចែករំលែកព័តមាននេះ