ខេត្តកំពង់ស្ពឺ៖ ក្មេងស្រី ២នាក់បងប្អូន បានស្លាប់ភ្លាមៗ នៅកន្លែងកើតហេតុ ខណៈដែលជិះម៉ូតូឌុបគ្នា ហើយត្រូវបានរថយន្តធុនធំបើកបរបញ្ច្រាសទិស បុកចំពីមុខពេញទំហឹង ហើយតៃកុងរថយន្តព្យាយាម បើករត់គេចពីកន្លែងកើតហេតុ…
ខេត្តកំពង់ស្ពឺ៖ ក្មេងស្រី ២នាក់បងប្អូន បានស្លាប់ភ្លាមៗ នៅកន្លែងកើតហេតុ ខណៈដែលជិះម៉ូតូឌុបគ្នា ហើយត្រូវបានរថយន្តធុនធំបើកបរបញ្ច្រាសទិស បុកចំពីមុខពេញទំហឹង ហើយតៃកុងរថយន្តព្យាយាម បើករត់គេចពីកន្លែងកើតហេតុ ក្នុងស្រុកសំរោងទង រហូតដល់ស្រុកឱរ៉ាល់ រត់គេចចូលព្រៃបាត់។
ហេតុការណ៍រថយន្តបុកម៉ូតូកិនក្មេងស្រីស្លាប់ ២នាក់នេះ បានកើតឡើង កាលពីវេលាម៉ោង ០៧ និង ៥០នាទី យប់ថ្ងៃទី១២ ខែសីហា ឆ្នាំ២០២១ នៅតាមបណ្តោយផ្លូវជាតិលេខ៤៤ ចន្លោះបង្គោលគីឡូម៉ែត្រលេខ១៣ទៅលេខ១៤ ត្រង់ចំណុចភូមិអូរគគី ឃុំតាំងក្រូច ស្រុកសំរោងទង ខេត្តកំពង់ស្ពឺ។
សមត្ថកិច្ចជំនាញ ឲ្យដឹងថា នៅមុនពេលកើតហេតុ មានរថយន្ត ១គ្រឿង ម៉ាកហ៊ីណូ ពណ៌ស ពាក់ស្លាកលេខ ត្បូងឃ្មុំ 3A-2237 សណ្តោងសឺមីរ៉ឺម៉ក(កន្ទុយ) ពាក់ស្លាកលេខត្បូងឃ្មុំ 4A-1683 មិនស្គាល់អត្តសញ្ញាណអ្នកបើកបរនោះទេ ( បានរត់គេចខ្លួន ក្រោយពេលកើតហេតុ ) ដែលបានបើកបរ តាមបណ្តោយផ្លូវជាតិលេខ៤៤ ក្នុងទិសដៅ ពីទិសខាងកើតទៅទិសខាងលិច លុះមកដល់ចំណុចកើតហេតុ បានបុកម៉ូតូ០១គ្រឿង ម៉ាកហុងដាសេ125 ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ភ្នំពេញ 1FE-2240 អ្នកបើកបរឈ្មោះ ណេត ស្រីរីន ភេទស្រី អាយុ ២២ឆ្នាំ បានឌុបមនុស្ស ម្នាក់ឈ្មោះ ណេត ស្រីលីន ភេទស្រី អាយុ ១២ឆ្នាំ។ អ្នកទាំងពីរ រស់នៅភូមិតាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺ (ជាបងប្អូនបង្កើត) ដែលកំពុងបើកបរបញ្ច្រាសទិសគ្នា ចំពីមុខយ៉ាងពេញទំហឹង បណ្តាលឱ្យកិនក្មេងស្រី ស្លាប់យ៉ាងអាណោចអាធ័ម នៅកន្លែងកើតហេតុ ក្រោយបង្កហេតុរួច តៃកុងរថយន្តបានបន្ថែមល្បឿន ព្យាយាមរត់គេចទៅទិសខាងលិច រហូតដល់ បង្គោលគីឡូម៉ែត្រលេខ៤៦ លេខ៤៧ ក្នុងស្រុកឱរ៉ាល់។
ក្រោយមក កម្លាំងរបស់អធិការដ្ឋាននគរបាលស្រុកឱរ៉ាល់ ដែលដឹកនាំដោយលោកវរសេនីយ៍ឯក ប៊ុត ប៊ុនធឿន អធិការនគរបាល ដេញតាម ដើម្បីចាប់ខ្លួនអ្នកបើកបរ ប៉ុន្តែតៃកុងរថយន្ត បានរត់ចុះពីលើរថយន្ត រត់ចូលព្រៃបាត់។
ក្រោយកើតហេតុ សមត្ថកិច្ចជំនាញស្រុកសំរោងទង វាស់វែងនៅកន្លែងកើតហេតុ ហើយសពក្មេងស្រី ប្រគល់ឱ្យសាច់ញាតិ យកទៅធ្វើបុណ្យតាមប្រពៃណី។
ចំពោះវត្ថុតាង ដែលយកទៅរក្សាទុកនៅប៉ុស្តិ៍ប៉ូលិសខ្ទុំក្រាំង រួមមាន៖ រថយន្តបង្កហេតុ និងម៉ូតូ។ សមត្ថកិច្ចជំនាញ បានយកវត្ថុតាង ទៅរក្សាទុក និងកសាងសំណុំរឿង ចាត់ការបន្តតាមផ្លូវច្បាប់៕ វង្ស សន
ចែករំលែកព័តមាននេះ