ទស្សនិកជនដែលនិយមទស្សនាភាពយន្តខ្មែរដែលចាក់បញ្ចាំងតាមរោងភាពយន្តកាលពីជាង១០ឆ្នាំមុន ប្រហែលជាមិនទាន់ភ្លេចនៅឡើយទេ នូវតួអង្គស្រីដែលសម្តែងក្នុងរឿងខ្មោច «ដើមចេកជ្វា» ដែលល្បីល្បាញនាអំឡុង
រាជធានីភ្នំពេញ ៖ ទស្សនិកជនដែលនិយមទស្សនាភាពយន្តខ្មែរដែលចាក់បញ្ចាំងតាមរោងភាពយន្តកាលពីជាង១០ឆ្នាំមុន ប្រហែលជាមិនទាន់ភ្លេចនៅឡើយទេ នូវតួអង្គស្រីដែលសម្តែងក្នុងរឿងខ្មោច «ដើមចេកជ្វា» ដែលល្បីល្បាញនាអំឡុងពេលនោះ។ ពេលនេះតារាសម្តែងរូបនេះ បានលេចវត្តមានមកវិញសារជាថ្មី ក្នុងនាមជាតួអង្គម្តាយតាមរយៈរឿង «នគរមាស» ដែលកំពុងចាក់ផ្សាយនៅលើកញ្ចក់ទូរទស្សន៍ CTN។
សាំង ភស្តា ជានិស្សិតដែលបានបញ្ចប់ការសិក្សាផ្នែករបាំបុរាណដែលមានឈាមជ័រឪពុកក៏ជាអ្នកសិល្បៈបុរាណម្នាក់ផងនោះ បានបង្ហាញខ្លួនសម្តែងកុនលើកដំបូងតាមរយៈភាពយន្តខ្នាតធំរឿង «ខ្មោចដើមចេកជ្វា» កាលពីអំឡុងឆ្នាំ២០០៥។ ប៉ុន្តែក្រោយពីប្រឡូកក្នុងភាពយន្តខ្នាតធំក្នុងរឿងខាងលើ និងរឿង «ព្រាយកន្ទងខៀវ» ព្រមជាមួយនឹងរឿងអប់រំខ្លីៗបានមួយរយៈនោះ តារាស្រីដែលមានសប្បុរសខ្មៅស្រអែមរូបនេះ ក៏បាត់វត្តមានឈឹងពីវិស័យសិល្បៈភាពយន្តអស់ជាច្រើនឆ្នាំ។
យ៉ាងណា ទើបតែពេលថ្មីៗនេះ ដែលបានឃើញវត្តមានសម្តែងរបស់នាងជាថ្មីឡើងវិញ នៅក្នុងរឿង «នគរមាស» តាមរយៈតួអង្គម្តាយតួឯកស្រីឈ្មោះ អប្សរ និងជាភរិយាស្តេចត្រាញ់។
សាំង ភស្តា បានអះអាងប្រាប់កោះសន្តិភាពតាមសារអេឡិចត្រូនិចកាលពីពេលថ្មីៗនេះថា បន្ទាប់ពីនាងបានប្រឡូកក្នុងពិភពសម្តែងមួយរយៈនោះ នាងក៏បានដកខ្លួនមកវិញ ដោយសារតែនាងមានភារកិច្ចត្រូវបានបញ្ចប់ការសិក្សារយៈពេល៤ឆ្នាំនៅសាលាភូមិន្ទវិចិត្រសិល្បៈ។
នាងបញ្ជាក់ថា ក្រោយពីបានបញ្ចប់ការសិក្សា នាងក៏បានរៀបការមានគ្រួសារ ដែលនោះក៏ជាមូលហេតុដែលនាងកាន់តែឃ្លាតឆ្ងាយពីអាសម្តែងនេះផងដែរ។ នាងបន្ថែមថា កន្លងមក បើទោះបីជានាងមិនមានឱកាសបានសម្តែងភាពយន្តថ្មីៗក៏ដោយ ប៉ុន្តែនាងក៏បានសម្តែងរបាំតាមកម្មវិធីថ្នាក់ជាតិជាបន្តបន្ទាប់ផងដែរ។
នាងថា ក្នុងនាមជាសិស្សដែលទទួលការបណ្តុះបណ្តាលពីសាលាភូមិន្ទវិចិត្រសិល្បៈនោះ គឺនាងនិងកូនសិស្សមួយចំនួនទៀត ត្រូវបានលោកគ្រូអ្នកគ្រូហៅអោយចូលរាំរបាំតាមកម្មវិធីថ្នាក់ជាតិជាបន្តបន្ទាប់។ សាំង ភស្តា បានលើកឡើងទៀតថា ការពិតនាងមានការស្រឡាញ់ និងចូលចិត្តការសម្តែងនេះខ្លាំងណាស់ តែដោយសារតែសមត្ថភាពនាងនៅមានកម្រិត ហេតុនេះនាងតែងតែបរាជ័យម្តងជាពីរដងនៅពេលដែលនាងបានធ្វើតេស្តសាកល្បងដើម្បីសម្តែងម្តងៗ។ កត្តានេះហើយ បានជម្រុញចិត្តរបស់នាងលេងហ៊ានបញ្ជៀបខ្លួនបន្តទៀតសម្រាប់ការសម្តែង ត្បិតនាងមានការខ្លាចរអាលនូវការបរាជ័យនេះទៀត។
យ៉ាងណា បើតាម សាំង ភស្តា ជាភព្វសំណាងមួយដែលអ្នកដឹកនាំរឿង «នគរមាស» បានផ្តល់ឱកាសជាថ្មីដល់រូបនាងអោយចូលសម្តែងក្នុងរឿងនេះ ដែលនេះត្រូវបាននាងគិតថា វាជាចំណុចចាប់ផ្តើមរបស់នាងសារជាថ្មីក្នុងពិភពសម្តែងខ្សែភាពយន្ត។
សាំង ភស្តា បានអះអាងថា ដើមឡើយនាងក៏បានបដិសេធមិនចូលរួមសម្តែងរឿងខាងលើនេះដែរ ដោយសារនាងនៅតែខ្លាចការបរាជ័យម្តងទៀតនៅពេលដែលធ្វើតេស្តចូលសម្តែង។ នាងបញ្ជាក់ថា ក្រោយពីអ្នកដឹកនាំរឿងបានរៀបចំពីសាច់រឿងនេះ ដោយវាជាប្រភេទរឿងបុរាណ ហើយមានលាយឡំនូវរបាំបុរាណ ដូចនេះនាងមានការចាប់អារម្មណ៍ខ្លាំង។ នាងថា ប្រសិនបើនាងមិនបានចូលរួមសម្តែងរឿងនេះទេ នោះជាការសោកស្តាយរបស់នាង ហេតុនេះនាងក៏សម្រេចចិត្តមកសាកល្បងធ្វើតេស្តតួរតែម្តង។
នាងបន្ថែមថា អ្នកដឹកនាំរឿងបានសម្រេចអោយនាងចូលសម្តែងក្នុងរឿងនេះ ដោយសារនាងមានជំនាញលើផ្នែករបាំបុរាណ ហើយនៅពេលសម្តែងនាងក៏អាចចូលរួមជាយោបល់ខ្លះៗលើផ្នែករបាំនេះផងដែរ។
សូមបញ្ជាក់ថា សាំង ភស្តា បានរៀបការមានស្វាមីនៅឆ្នាំ២០១៤ ដែលរហូតមកដល់បច្ចុប្បន្ននាងមានកូប្រុសស្រីចំនួន២នាក់ហើយ។ ទោះជាយ៉ាងណានាងរំពឹងថា ចំណុចចាប់ផ្តើមនៃការសម្តែងភាពយន្តជាថ្មីឡើងវិញ នាពេលនេះអាចនឹងធ្វើអោយនាងមានឱកាសបានចូលរួមសម្តែងរឿងថ្មីៗជាបន្តបន្ទាប់ទៀត ត្បិតនាងក៏ស្រឡាញ់ និងចូលចិត្តការសម្តែងនេះផងដែរ៕
ចែករំលែកព័តមាននេះ