ប្រជាពលរដ្ឋប្រមាណ២៣គ្រួសារ ក្នុងចំណោមអ្នកទិញដីប្រមាណជាង១០០ឡូតិ៍ ពីលោកឧកញ៉ា ឡាយ លន់ ប្រធានក្រុមហ៊ុន BLACK EAGLE CO.L T D បានផ្ទុះការតវ៉ា ដោយនាំគ្នា ជួបប្រមូលគ្នា ដើម្បីស្នើសុំអោយ
រាជធានីភ្នំពេញ ៖ ប្រជាពលរដ្ឋប្រមាណ២៣គ្រួសារ ក្នុងចំណោមអ្នកទិញដីប្រមាណជាង១០០ឡូតិ៍ ពីលោកឧកញ៉ា ឡាយ លន់ ប្រធានក្រុមហ៊ុន BLACK EAGLE CO.L T D បានផ្ទុះការតវ៉ា ដោយនាំគ្នា ជួបប្រមូលគ្នា ដើម្បីស្នើសុំអោយក្រុមហ៊ុន លក់អចនទ្រព្យខាងលើ ធ្វើប្លង់អោយពួកគាត់តាមកិច្ច សន្យាទិញ-លក់ បើពុំដូច្នេះទេ ពួកគាត់នឹងប្តឹងដាក់ពាក្យទៅសមត្ថកិច្ច ក៏ដូចតុលាការ ដើម្បីចាត់ការតាមច្បាប់។ ទន្ទឹមនោះ ប្រជាពលរដ្ឋក៏បានទទួចសុំដល់សម្តេចតេជោមេត្តាជួយអន្តរាគមន៍ផង ព្រោះពួកគាត់សុទ្ធតែជាអ្នករងគ្រោះដោយទិញដីដោយស្របច្បាប់។
ការតវ៉ាខាងលើនេះ បានផ្ទុះឡើងកាលពីវេលាម៉ោងប្រមាណ៩ព្រឹក ថ្ងៃទី០៤ ខែសីហា ឆ្នាំ២០២១ ដោយប្រជាពលរដ្ឋ ក៏បានជួបប្រមូលផ្តុំគ្នាលើដីឡូតិ៍ដែលពួកគាត់ទិញ និងខ្លះធ្វើផ្ទះរស់នោះរួចរាល់ហើយ នៅក្នុងភូមិភ្លូផ្អើម សង្កាត់គោករការ ខណ្ឌព្រែកព្នៅ រាជធានីភ្នំពេញ។
ការលើកគ្នាតវ៉ានេះ បន្ទាប់ពីពួកគាត់ទិញដីបង់ប្រាក់ខ្លះគ្រប់ចំនួនមួយរយភាគរយហើយ ក្រុមហ៊ុនមិនបានធ្វើប្លង់រួចរាល់តាមកិច្ចសន្យា ហើយថែមទាំងមានអ្នកទី៣ គឺលោកឧកញ៉ា អ៊ឹង ឃាង ដែលជាម្ចាស់ដីដើមចេញមុខយករំនាំងដែកមកបិទផ្លូវ និងថែមទាំងហាមឃាត់ការសាងសង់លើដីដែលពួកគាត់ទិញទាំងនោះទៀត។
តាមប្រជាពលរដ្ឋដែលបានផ្ទះការតវ៉ាអោយដឹងថា ពួកគាត់បាននាំគ្នាមកទិញដីឡូតិ៍របស់ក្រុមហ៊ុនBLACK EAGLE CO.L T D ដែលមានលោកឧកញ៉ាឡាយ លន់ ជាម្ចាស់ រយៈពេលប្រមាណ១ឆ្នាំ មកហើយ ដោយខ្លះបានកក់៥០ភាគរយ និងខ្លះទៀតបានអោយលុយគ្រប់១០០ភាគរយក៏មានដែរ ។ ហើយនៅក្នុងការទិញលក់នោះ ក្រុមហ៊ុនបានធ្វើកិច្ចសន្យាថា កាត់ប្លង់រឹងជួនពួកគាត់ក្នុងរយៈពេល ប្រមាណ៣ទៅ៦ខែហើយ តែបាត់ដំណឹងរហូត ។ នៅពេលដែលពួកគាត់ទៅសួរនាំក្រុមហ៊ុន ចេះតែពន្យាពេល ដោយលើកហេតុផលថា កូវីដ១៩។
ប្រជាពលរដ្ឋបន្តថា នៅក្នុងដំណាក់នេះ ដោយសារតែខ្លះបានបង់លុយគ្រប់ ក្រុមហ៊ុនក៏បានទៅសុំច្បាប់ពីសង្កាត់សាងសង់ផ្ទះរស់នោះបណ្តើរៗហើយ ស្រាប់តែនៅថ្ងៃទី១៩ ខែកក្កដា ឆ្នាំ២០២១ ម្ចាស់ ដើមលោកឧកញ៉ា អ៊ឹង ឃាង ក៏បានចេញមុខមក ដោយយករនាំងដែក មកបិទមិនអោយដឹកគ្រឿងសំណង់ និងមកហាមឃាត់ការដ្ឋាន ទើបពួកគាត់នាំគ្នាប្តឹងលោកឧកញ៉ាឡាយ លន់ ទៅ
សាលាសង្កាត់ព្រមទាំងស្នើអោយក្រុមហ៊ុន ទទួលខុសត្រូវចេញមកដោះស្រាយធ្វើប្លង់ជួន ពួកគាត់តាមកិច្ចសន្យា ។
តាមប្រជាពលរដ្ឋ ដែលតវ៉ាបានអោយដឹងទៀតថា បន្ទាប់ពីដាក់ពាក្យបណ្តឹង មានមេធាវីខាងក្រុមហ៊ុនBLACK EAGLE CO.L T D ចេញមកដោះស្រាយ ហើយស្នើសុំអោយប្រជាពលរដ្ឋដែលទិញដីពន្យាពេលរហូត។ ដោយសារតែគេចវេសន៍មិនទទួលខុសត្រូវធ្វើពួកគាត់នាំគ្នាតវ៉ាតែម្តង ។
ប្រជាពលរដ្ឋដែលរងគ្រោះ ក៏បានអោយដឹងថា បើសិនជាក្រុមហ៊ុន មិនទទួលខុសត្រូវ ដោយមិនបានចរចាដោះស្រាយបញ្ចប់ជាមួយម្ចាស់ដីដើម គឺលោកឧកញ៉ា អ៊ឹង ឃាង កាត់ប្លង់ប្រគល់អោយគាត់នោះទេ ពួកគាត់នឹងដាក់ពាក្យបណ្តឹងទៅតុលាការដើម្បីចាត់ការតាមច្បាប់។
តាមសេចក្តីជូនដំណឹងរបស់លោក អ៊ែល វណ្ណៈ ជាមេធាវីលោកឧកញ៉ា អ៊ឹង ឃាង ដែលបានជំរាបទៅលោក ឡាយ លន់ ដែលជាអ្នកទិញដី បានអោយដឹងថា កន្លងមក លោកពុំបានបំពេញកាតព្វកិច្ចថ្លៃទិញដីទៅភាគីអ្នកលក់អោយបានត្រឹមត្រូវតាមប្រការ៣នៃកិច្ចសន្យាស្តីពីការទិញលក់ដីធ្លីចុះថ្ងៃទី០១ខែតុលា ឆ្នាំ ២០២០ឡើយ។ ហើយមូលប្បទានប័ត្ររបស់ធានាគារ ABA ដែលលោកបានចេញសម្រាប់ការទូទាត់ថ្លៃដីក៏ពុំអាចបើកប្រាក់បានដែរ ទង្វើបែបនេះ ជាការបំពានកិច្ចសន្យាយ៉ាងធ្ងន់ធ្ងរ នាំអោយបញ្ចប់កិច្ចសន្យា ។
លើសពីនេះទៅទៀត កូនក្តីរបស់ខ្ញុំបានធ្វើការទំនាក់ទំនង ដើម្បីអោយយកប្រាក់មកទូទាត់ថ្លៃដីអោយបានត្រឹមត្រូវតាមកិច្ចសន្យា តែភាគីខាងលោក នៅតែមិនបានធ្វើការទូទាត់រហូតមក។ នៅក្នុងសេចក្តី ជួនដំណឹងក៏បានចាត់ទុកថា ទង្វើបែបនេះធ្វើអោយខាតបង់ផលប្រយោជន៍របស់ភាគីអ្នកលក់យ៉ាងធ្ងន់ធ្ងរបំផុត និងមិនអាចបន្តកិច្ចសន្យានេះជាមួយលោកបានទៀតឡើយ ។ អាស្រ័យហេតុនេះ យើង សម្រេចបញ្ចប់កិច្ចសន្យា ស្តីពីការទិញលក់ដីធ្លីចុះថ្ងៃទី០១ ខែតុលា ឆ្នាំ២០២០ ជាមួយភាគីលោកចាប់ពីថ្ងៃជួនដំណឹងនេះតទៅ។
តាមព័ត៌មានអោយដឹងថា ដីឡូតិ៍នោះដំបូងជាគម្រោងដីឡូតិ៍ ជាដីរបស់លោក ឧកញ៉ា អ៊ឹង ឃាង បើកដំណើរលក់ តែក្រោយមកក៏បានផ្ទេរទៅអោយលោកឧកញ៉ា ឡាយ លន់ ដែលខ្លះអះអាងថា ជាមិត្តភក្តិនឹងគ្នាជាអ្នកលក់ តែមិនអាចកាត់ឈ្មោះ បំបែកប្លង់ទៅអោយអ្នកទិញបាន។
ហើយគេពុំទាន់ដឹងអោយច្បាស់ពីផ្ទៃក្នុងនោះនៅឡើយទេ ព្រោះអ្នកទាំង២សុទ្ធតែធ្លាប់មានរឿងអាស្រូវរឿងដីធ្លី។ ទោះបីជាយ៉ាងណា កោះសន្តិភាព ពុំទទួលការបំភ្លឺណាមួយពីលោកឧកញ៉ា ឡាយ លន់ ដែលជាប្រធានក្រុមហ៊ុន BLACK EAGLE CO.L T D បានឡើយ៕
ចែករំលែកព័តមាននេះ