ព្រោះតែមេរោគបំប្លែងថ្មីដែលតាមានឥទ្ធិពលនៃការចម្លងលឿនទ្វេដង និងបង្កគ្រោះថ្នាក់គ្រប់នាទី ក្រសួងធម្មការ និងសាសនាក៏បានជំរុញឱ្យមន្ត្រីធម្មការសហការជាមួយអាជ្ញាធរដែនដី និងគ្រប់វត្តអារាម គ្រប់វិហារសាសនានានាឱ្យអនុវត្តកិច្ចការងារដែលត្រូវធ្វើចំពោះមុខ ធ្វើយ៉ាងណាដើម្បីទប់ស្កាត់ការឆ្លងរាលដាលនៃជំងឺដ៏កាចសាហាវនេះឱ្យខាងតែបាន ជាពិសេសមិនឲ្យមានការជួបជុំប្រារព្ធពិធីសាសនាទាំងនៅក្នុងវត្តអារាម នៅវិហារសាសនានានា និងនៅតាមលំនៅឋានដែលមានការប្រមូលមនុស្សជួបជុំច្រើននោះឡើយ ។
អ្នកតាមដានខាងវិស័យសាសនាបានលើកឡើងថា រឿងព្រះសង្ឃមិនពិបាកទប់ស្កាត់ការចម្លងនៃមេរោគកំណាចនេះទេ ព្រោះព្រះសង្ឃលោកជាអ្នកចេះដឹងច្រើន ឆាប់យល់សភាពការណ៍បានលឿនជាងគ្រហស្ថ ម្យ៉ាងទៀតនៅក្នុងរដូវគង់ចាំវស្សាផង ព្រះសង្ឃអាចគង់នៅតែក្នុងវត្តអារាមដោយស្ងៀមស្ងាត់យ៉ាងមានសុវត្ថិភាព ។ ក៏ប៉ុន្តែអ្វីដែលជាបញ្ហាតាមវត្តជាច្រើនក្នុងពេលជំងឺកូវីដឆ្លងរាតត្បាតនេះ គឺចង្ហាន់សម្រាប់ព្រះសង្ឃ ខណៈដែលអ្នកស្រុកដែលមានសទ្ធាធ្វើបុណ្យបំពេញទានក៏មិនហ៊ានចូលទៅប្រគេនចង្ហាន់នៅក្នុងទីអារាមបាន ដោយសារតែខ្លាចឆ្លងមេរោគកូវីដដែលកំពុងតែរាតត្បាតពេញបន្ទុកនេះ ពិសេសគឺភ័យខ្លាចមេរោគបំប្លែងថ្មីដែលតាតែម្តង ព្រោះមេរោគនេះឆ្លងលឿនជាងកូវីដឆ្ងាយណាស់ ។
ដូច្នេះមានតែអាជ្ញាធរមូលដ្ឋានទេដែលជាភ្នែកជាច្រមុះក្នុងការទំនុកបម្រុងចង្ហាន់ប្រគេនព្រះសង្ឃតាមតែអាចធ្វើទៅបាន និងស្របតាមសេចក្តីណែនាំរបស់ប្រមុខរាជរដ្ឋាភិបាលក្នុងពេលកន្លងមកផង ។
ដូចនេះយើងមិនអាចប្រមាទ ធ្វេសប្រហែសបានជាដាច់ខាត ពីព្រោះកូវីដ១៩បានចូលឈ្លានពានដល់គ្រប់ទីកន្លែងសូម្បីតែវត្តអារាមក៏មេរោគនេះមិនលើកលែងដែរ ឯដែលតាបំប្លែងថ្មីក៏កំពុងលុកលុយក្នុងសហគមន៍ ជាមេរោគដែលពិភពលោកខ្លាចជាងគេដោយសារតែភាពសាហាវរបស់វាទាំងការបង្កគ្រោះថ្នាក់ធ្ងន់ធ្ងរ និងការឆ្លងលឿនជាងមេរោគកូវីដទ្វេដងឯណោះបង្កគ្រោះថ្នាក់កាន់តែធ្ងន់ ។ ហេតុនេះមិនថាព្រះសង្ឃ ឬគ្រហស្ថទេត្រូវតែបង្កើនការប្រុងប្រយ័ត្នខ្ពស់បំផុត ទើបធានាបាននូវសុវត្ថិភាពនៃការរស់នៅ ៕ សាន សារិន
ចែករំលែកព័តមាននេះ