រាជធានីភ្នំពេញ ៖ កុមារចាប់ពីអាយុ១២ឆ្នាំ ដល់ក្រោម១៨ឆ្នាំ ដែលនឹងត្រូវចាក់វ៉ាក់សាំងបង្ការជំងឺកូវីដ១៩ អាចនឹងត្រូវប្រើប្រាស់សំបុត្រកំណើត ឬលិខិតបញ្ជាក់ពីអាជ្ញាធរឃុំ សង្កាត់ ។ នេះបើតាមប្រធានមន្ទីរសុខាភិបាលខេត្តកណ្តាល ។
លោកវេជ្ជបណ្ឌិត គួយ ប៊ុនធឿន ប្រធានមន្ទីរសុខាភិបាលខេត្តកណ្តាលបានឲ្យកោះសន្តិភាពដឹងនៅថ្ងៃទី២៨ ខែកក្កដា ឆ្នាំ២០២១ថា កុមារចាប់អាយុ១២ ដល់ក្រោម១៨ ឆ្នាំ មានប្រមាណជាង១៧ម៉ឺននាក់នឹងត្រូវចាក់វ៉ាក់សាំងបង្ការជំងឺកូវីដ១៩ នៅពេលខាងមុខនេះដោយស្ម័គ្រចិត្ត ។
លោកវេជ្ជបណ្ឌិតបានបញ្ជាក់ថា ៖«កុមារចាប់ពី១២ ដល់ក្រោម១៨ឆ្នាំ ដែលចាក់វ៉ាក់សាំងបានមានអត្តសញ្ញាណប័ណ្ណ និងសំបុត្រកំណើត ។ ប៉ុន្តែយើងមិនទាន់មានគោលការណ៍តែមនុស្សធំ (អាយុ១៨ឆ្នាំ) ១. អត្តសញ្ញាណបណ្ណ ២.សំបុត្រកំណើត ៣.លិខិតបញ្ជាក់ពីអាជ្ញាធរមូលដ្ឋាន» ។
លោកវេជ្ជបណ្ឌិតបន្ថែមចំពោះការចាក់វ៉ាក់សាំងនេះខ្ញុំគិតថា ចំពោះយុវជនខ្លះមានខ្លះមិនទាន់មាន ។ បើមានយើងយកអត្តសញ្ញាណបណ្ណ តែបើអត់យើងសំបុត្រកំណើត និងលិខិតបញ្ជាក់ពីអាជ្ញាធរមូលដ្ឋាន ។
លោកវេជ្ជបណ្ឌិតបានគូសបញ្ជាក់ថា «អីញ្ចឹងកុមារមានអាយុ១២ឆ្នាំឡើង ឬអ្នកមិនទាន់មានអត្តសញ្ញាណបណ្ណយើងយកលិខិតសំបុត្រកំណើត ឬលិខិតបញ្ជាក់កំណើតពីអាជ្ញាធរមូលដ្ឋាន» ។
ចំណែកលោកវេជ្ជបណ្ឌិត លី មករា ប្រធានមន្ទីរពេទ្យក្រុមតាខ្មៅនៅមន្ទីរពេទ្យបង្អែកជ័យជំនះបានឲ្យដឹងថា រហូតមកដល់ពេលនេះខាងលោកមិនទាន់បានការណែនាំនៅឡើយទេ ។ ប៉ុន្តែមកដល់ពេលនេះគ្រាន់តែដឹងថា មានវ៉ាក់សាំងស៊ីណូវ៉ាក់ សម្រាប់ចាក់ជូនក្មេងៗ ចាប់ពីអាយុពី១២ឆ្នាំ ក្រោម១៨ឆ្នាំ ទៅតាមស្រុកមួយៗក្នុងខេត្តកណ្តាលរួចហើយ ។ ប៉ុន្តែកំណត់យកថ្ងៃណាសម្រាប់ចាក់ ឬយកឯកសារអ្វីខ្លះយើងមិនទាន់ទទួលបាននៅឡើយទេ ។
ចំពោះការចាក់វ៉ាក់សាំងជូនកុមារនេះ លោកវេជ្ជបណ្ឌិតបានបញ្ជាក់ថា ៖«ខ្ញុំជឿជាក់ថា មានការស្មុគស្មាញជាងការចាក់មនុស្សចាស់ពីព្រោះថា មនុស្សមានឯកសារអត្តញ្ញាណបណ្ណហើយការបញ្ចូលក្នុងប្រព័ន្ធមានភាពងាយស្រួល ចំណែកក្មេងអត់មានអត្តសញ្ញាណបណ្ណទេ គឺមានតែសំបុត្រកំណើត ។
ដូច្នេះកាលប្រើសំបុត្រកំណើត គឺមានការពិបាកជាងការប្រើអត្តស ញ្ញាណបណ្ណបន្តិច» ។ លោកវេជ្ជបណ្ឌិតគូសបញ្ជាក់ថា ៖«អ្វីដែលសរុបមក គឺមកដល់ពេលនេះយើងមិនមានការណែនាំ ឬកំណត់ច្បាស់នៅឡើយទេ ហើយយើងកំពុងតែរង់ចាំពីក្រសួងសុខាភិបាល»។
ជាមួយគ្នានោះដែរ លោកវេជ្ជ បណ្ឌិត លី មករា បានលើកឡើងថានៅក្នុងខេត្តកណ្តាលមានស្រុកចំនួន៣ មានកុមារអាយុ១២ដល់ ក្រោម១៨ឆ្នាំ មានចំនួនជាង២ម៉ឺននាក់ (ស្រុកស្អាង ស្រុកកោះធំនិងស្រុកខ្សាច់កណ្តាល) ។ ចំណែកស្រុកផ្សេងទៀតមានតែជាង ១ម៉ឺននាក់តែប៉ុណ្ណោះ ។ លោកវេជ្ជបណ្ឌិតបានគូសបញ្ជាក់ថា ៖ក្មេងដែលត្រូវចាក់ជូនក្មេងៗសរុបប្រហែង១៧ម៉ឺននាក់ ។
ពាក់ព័ន្ធនឹងការចាក់វ៉ាក់សាំងនេះដែរ លោកវេជ្ជបណ្ឌិត ក៏បានអំពាវនាវដល់មាតាបិតាអាណាព្យាបាលនាំកូនចៅទៅចាក់វ៉ាក់សាំងឲ្យគ្រប់គ្នាពីព្រោះថា វ៉ាក់សាំងនេះត្រូវបានរាជរដ្ឋាភិបាលខិតខំណាស់ ទំរាំបានវ៉ាក់សាំងមកចាក់ជូនប្រជាពលរដ្ឋ ។
លោកវេជ្ជបណ្ឌិត បានគូសបញ្ជាក់ថា៖« ខ្ញុំសូមអំពាវនាវដល់មាតាបិតាទាំងអស់ជឿទុកចិត្តលើប្រមុខរាជរដ្ឋាភិបាលពីព្រោះមកដល់ពេលនេះលោកលះបង់ខ្លាំងណាស់ ក្នុងការចរចា ដើម្បីសុំទិញយ៉ាងម៉េច ជើម្បីបានវ៉ាក់សាំងជូនប្រជាពលរដ្ឋយើង ។ វ៉ាក់សាំង នេះមិនចេះតែធ្វើនោះទេ គឺវ៉ាក់សាំងនេះត្រូវអង្គការសុខភាពពិភព លោកបានទទួលស្គាល់រួចហើយ»។
លោកបានស្នើសុំមាតាបិតាកុំជឿលើឃោសនាពីសំណាក់មនុស្សអគិតមួយចំនូន ដើម្បីយកវេទិការផ្តេសផ្តាស ។ ចំពោះការចាក់វ៉ាក់សាំងជូនកុមារនេះដែរ លោក សេក ណារិន ជាពលរដ្ឋរស់នៅខេត្ត កណ្តាលបានបញ្ជាក់ថា«លោកបានត្រៀមរួចហើយ ក្នុងការនាំកូនទៅចាក់វ៉ាក់សាំងដែលរាជរដ្ឋាភិបាលកំណត់នេះ ។ ពេលចាក់វ៉ាក់សាំងរួចហើយកូនខ្ញុំអាចចូលរៀនបាន » ។
យ៉ាងណាក្តីលោក ណារិន បានចាក់វ៉ាក់សាំងរួចបានលើកឡើងថាការចាក់វ៉ាក់សាំងនេះមិនបានប៉ះពាល់អ្វីដល់សុខភាពលោកនោះទេ ផ្ទុយទៅវិញអាចព្យាបាលជំងឺមួយចំនួនក្នុងខ្លួនគាត់ផងដែរ៕
ចែករំលែកព័តមាននេះ