ភ្នំពេញ៖ អ្វីដែលជាការព្រួយបារម្ភរបស់អ្នកជំនាញសុខាភិបាល ពីការឆ្លងរាលដាលជំងឺកូវីដ១៩ បង្កឡើង ដោយវីរុសបំប្លែងថ្មី ដែលតា នៅក្នុងសហគមន៍យើង នាពេលនេះ បានកើតឡើងហើយ។ នោះគឺក្នុងចំណោមអ្នកឆ្លងវីរុសកូវីដ១៩…
ភ្នំពេញ៖ អ្វីដែលជាការព្រួយបារម្ភរបស់អ្នកជំនាញសុខាភិបាល ពីការឆ្លងរាលដាលជំងឺកូវីដ១៩ បង្កឡើង ដោយវីរុសបំប្លែងថ្មី ដែលតា នៅក្នុងសហគមន៍យើង នាពេលនេះ បានកើតឡើងហើយ។ នោះគឺក្នុងចំណោមអ្នកឆ្លងវីរុសកូវីដ១៩ បំប្លែងថ្មី ដែលតា ( B.1.617.2 Delta ) ចំនួន ៣៩នាក់ ដែលទើបរកឃើញថ្មី គឺមានប្រជាពលរដ្ឋ ក្នុងសហគមន៍ ១៤នាក់ ក្រៅពីនោះ ជាប្រជាពលរដ្ឋខ្មែរយើង ដែលធ្វើដំណើរវិលត្រឡប់មកពីប្រទេសថៃ។
ករណីនេះ ជាគ្រោះថ្នាក់មួយដ៏ធ្ងន់ធ្ងរ បើសិនជាយើងម្នាក់ៗ ធ្វេសប្រហែស មិនបន្តអនុវត្តវិធានការការពារឲ្យបានម៉ឺងម៉ាត់ទេនោះ។
មេរោគបំប្លែងថ្មី ដែលតា កំពុងតែធ្វើអោយពិភពលោកទាំងមូលឈឺក្បាល ដោយសារតែវាឆ្លងលឿន និងសាហាវ។ ដូច្នេះការឆ្លងចូលសហគមន៍ ដោយមេរោគនេះ នឹងធ្វើអោយស្ថានភាពកូវីដ១៩ នៅកម្ពុជា កាន់តែពិបាកគ្រប់គ្រងហើយភាពគ្រោះថ្នាក់ គឺស្ថិតនៅចំពោះមុខគ្រប់ពេល។
កាលពីព្រឹកថ្ងៃទី២៧ ខែកក្កដា ឆ្នាំ២០២១ ក្រសួងសុខាភិបាល បានប្រកាសពីការរកឃើញករណីឆ្លងវីរុសកូវីដ១៩ បំប្លែងថ្មី ដែលតា ( B.1.617.2 Delta ) ចំនួន ៣៩នាក់ កាលពីថ្ងៃទី២២កក្កដា និងថ្ងៃទី២៥ ខែកក្កដា ឆ្នាំ២០២១។ ក្នុងនោះ មានអ្នកដំណើរឆ្លងដែន មកពីប្រទេសថៃ ចំនួន ២១នាក់ ( ស្ត្រី ១១នាក់ ) បុគ្គលិកសុខាភិបាល ចំនួន ៤នាក់ ( ស្ត្រីម្នាក់ ) ប្រជាពលរដ្ឋ ក្នុងសហគមន៍ ដែលប៉ះពាល់ផ្ទាល់ជាមួយពលករឆ្លងដែន ចំនួន ៦នាក់ (ស្ត្រី ៣នាក់) និងប្រជាពលរដ្ឋ ក្នុងសហគមន៍ ដែលមិនប៉ះពាល់ផ្ទាល់ ចំនួន ៨នាក់ ( ស្ត្រី ៤នាក់ )។
មុននឹងរកឃើញវីរុសកូវីដ បំប្លែងថ្មី ដែលតា គឺទាំង ៣៩នាក់នេះ សុទ្ធតែត្រូវបានធ្វើតេស្តរហ័ស រកឃើញផ្ទុកមេរោគកូវីដ បន្ទាប់ពីឆ្លងកាត់ព្រំដែនគោក ចេញបពីប្រទេសថៃ មកដល់កម្ពុជា ចាប់ពីថ្ងៃទី១១ ដល់ថ្ងៃទី១៨ ខែកក្កដា ឆ្នាំ២០២១។ ក្នុងនោះ បុគ្គលិកសុខាភិបាល ៤នាក់ នៅខេត្តឧត្តរមានជ័យ រួមទាំងមនុស្ស ៦នាក់ទៀត ជាអ្នកប៉ះពាល់ជាមួយអ្នកដំណើរតាមព្រំដែនគោក ក៏ត្រូវបានធ្វើតេស្តរកឃើញឆ្លងកូវីដដែរ។ ក្នុងនោះ សូម្បីតែប្រជាពលរដ្ឋ ដែលស្ថិតក្នុងសហគមន៍ មិនប៉ះពាល់ជាមួយអ្នកដំណើរ មកពីក្រៅប្រទេស ពោលគឺមិនប៉ះពាល់ពលករមកពីប្រទេសថៃ ចំនួន ៨នាក់ ( ស្ត្រី ៤នាក់ ) ក៏ត្រូវបានរកឃើញឆ្លងកូវីដប្រភេទបំប្លែងថ្មី ដែលតា កាលពីថ្ងៃទី២៥ ខែកក្កដា ឆ្នាំ២០២១ ផងដែរ។
គិតចាប់ពីថ្ងៃទី៣១ ខែមីនា ឆ្នាំ២០២១ ដល់ថ្ងៃទី២៥ ខែកក្កដា ឆ្នាំ២០២១ ក្រសួងសុខាភិបាល បានកត់សម្គាល់ថា កម្ពុជាបានរកឃើញអ្នកមានវិជ្ជមានវីរុសកូវីដ១៩ ប្រភេទ ដែលតា ( Delta ) សរុបទាំងអស់ ចំនួន ១១៤នាក់ ( ស្ត្រី ៥៩នាក់ )។
វីរុសកូវីដ១៩ បំប្លែងថ្មី ប្រភេទ ដែលតា ( Delta ) ត្រូវបានអ្នកជំនាញ លើកឡើងថា កាចសាហាវ ឆ្លងលឿនជាងវីរុសកូវីដធម្មតា ហើយអាចបណ្តាលឲ្យអ្នកជំងឺរងគ្រោះធ្ងន់ធ្ងរ រហូតដល់ស្លាប់ថែមទៀត។
ក្រសួងសុខាភិបាល សង្កេតឃើញថា ការចម្លងវីរុសកូវីដ នៅកម្ពុជាយើង នាបច្ចុប្បន្ននេះ មានសន្ទុះកើនឡើងលើយុវវ័យ ដែលក្រុមនេះ បានដើរចេញក្រៅផ្ទះច្រើន ឬមានការជួបជុំមិត្តភ័ក្ត្រ។ ហេតុនេះ ក្រសួងសូមអំពាវនាវដល់យុវវ័យគ្រប់រូប សូមចូលរួមអនុវត្តនូវគោលការណ៍ណែនាំរបស់ក្រសួងសុខាភិបាលឲ្យបានម៉ត់ចត់ និងត្រឹមត្រូវ លើវិធានការ ៣ការពារ ៣កុំ និងកុំទៅកាន់ទីតាំង ៣ “ជ” ដើម្បីការពារបុគ្គលខ្លួនឯង កុំនាំវីរុសកូវីដ១៩ មកចូលផ្ទះ និងដើម្បីការពារសមាជិកគ្រួសាររបស់ខ្លួន ជាពិសេសឪពុកម្តាយ ជីដូន ជីតា ឬអ្នកមានជំងឺប្រចាំកាយនៅក្នុងគ្រួសារ ដែលជាបុគ្គលងាយរងគ្រោះ និងប្រឈមខ្ពស់ចំពោះភាពធ្ងន់ធ្ងរនៃជំងឺ ឬឈានទៅដល់ការស្លាប់ បើមានការឆ្លងវីរុសកូវីដ១៩នេះ។
ក្រៅពីនេះទៀត សាធារណជន បងប្អូនប្រជាពលរដ្ឋយើង នៅទូទាំងប្រទេស សូមបន្តប្រុងប្រយ័ត្នខ្ពស់ ការពារខ្លួន កុំភ្លេចខ្លួនឲ្យសោះ ដោយត្រូវចេះផ្លាស់ប្តូរទម្លាប់របស់ខ្លួន ឲ្យស្របតាមពាក្យស្លោកថា “រៀនរស់នៅធម្មតា ជាមួយវីរុសកូវីដ១៩ តាមបែបគន្លងថ្មី ក្នុងបរិបទប្រយុទ្ធនឹងជំងឺកូវីដ១៩” សំដៅបង្ការ គ្រប់គ្រង និងកាត់ផ្តាច់នូវខ្សែចម្លងនៃវីរុសកូវីដ១៩ ជាពិសេសពពួកប្រភេទបំប្លែងថ្មីនេះ ឬក៏ប្រភេទថ្មីផ្សេងទៀត ដែលអាចកើតមានក្នុងព្រះរាជាណាចក្រកម្ពុជាយើង ជាយថាហេតុណាមួយ។
វិធីសាមញ្ញទេ ដើម្បីការពារកូវីដ គឺម្នាក់ៗ ត្រូវបន្តការអនុវត្តឲ្យបានខ្ជាប់ខ្ជួននូវវិធានការ ៣ការពារ និង៣កុំ ដោយត្រូវចូលរួមជាចាំបាច់ ឲ្យបានត្រឹមត្រូវ ខ្ជាប់ខ្ជួន និងម៉ត់ចត់។ អ្នកដែលតម្រូវឲ្យធ្វើចត្តាឡីស័ក ក៏ត្រូវតែគោរពតាមគោលការណ៍នៃការធ្វើចត្តាឡីស័កឲ្យបានត្រឹមត្រូវ និងគោរពទៅតាមការណែនាំរបស់អាជ្ញាធរគ្រប់គ្រង នៅទីនោះ ដើម្បីទប់ស្កាត់ការចម្លងបន្តគ្នា នៅក្នុងសហគមន៍ក្នុងទ្រង់ទ្រាយធំ។ ក្រៅពីនោះ បុគ្គលគ្រប់រូប សូមកុំទៅកាន់ទីតាំង៣ “ជ” គឺកន្លែងមនុស្សជួបជុំអ៊ូរអរច្រើន កន្លែងមនុស្សនៅជិតៗគ្នា និងកន្លែង ដែលបិទជិត។ ទីតាំងទាំង ៣នេះ ជាទីតាំង ដែលមានហានិភ័យឆ្លងខ្ពស់បំផុត ដូចជា ជួបជុំគ្នា ដើម្បីទទួលទានបាយរួមគ្នា ឬបង្កឲ្យជួបជុំ ពិធីភ្ជាប់ពាក្យ ឬពិធីបុណ្យទានអ្វីមួយ និងកាត់បន្ថយការធ្វើដំណើរចល័ត ឬនៅផ្ទះ ប្រសិនបើមិនមានភារកិច្ចចាំបាច់ ត្រូវចេញក្រៅ។
ជាមួយនឹងវិធានការការការពារកូវីដខាងលើនេះ បងប្អូនប្រជាពលរដ្ឋ ដែលមានអាយុចាប់ពី ១៨ឆ្នាំឡើង នៅពេលដល់វេន សូមចូលរួមចាក់វ៉ាក់សាំងការពារជំងឺកូវីដ១៩ ឲ្យបានគ្រប់ៗគ្នា។ ជាងនេះទៀត ចាប់ពីថ្ងៃទី១ ខែសីហាតទៅ ដល់ពេលយុទ្ធនាការចាក់វ៉ាក់សាំង ដល់កុមារ និងយុវវ័យ អាយុចាប់ពី ១២ឆ្នាំ ដល់ក្រោម ១៨ឆ្នាំ ក៏សូមឪពុកម្តាយ អាណាព្យាបាល ជីដូនជីតា នាំកូនចៅ ទៅចាក់វ៉ាក់សាំងការពារជំងឺកូវីដ១៩ ឲ្យបានទាំងអស់គ្នា។
ប៉ុន្តែចាក់វ៉ាក់សាំងរួចហើយ ក៏នៅតែឆ្លងកូវីដដែរ។ កត្តានេះ ទាមទារឲ្យយើងម្នាក់ៗ ទាំងអ្នកចាក់វ៉ាក់សាំងបាន ២ដូសហើយក្តី ឬក៏ចាក់ ៣ដូសក្តី ក៏ត្រូវបន្តអនុវត្តវិធានការសាមញ្ញ គឺពាក់ម៉ាស លាងសម្អាតដៃ និងរក្សាគម្លាតសុវត្ថិភាព រួមទាំងការផ្អាកការជួបជុំផឹកកាហ្វេ ឬក៏ផឹកស៊ី ជាដើម គឺត្រូវបន្តអត់ធ្មត់តទៅទៀតសិន ទម្រាំស្ងាត់កូវីដ ចាំជួបគ្នា ក៏មិនទាន់ហួសពេលឡើយ។
ក្រៅពីនេះ អាជ្ញាធរសមត្ថកិច្ចមូលដ្ឋាន ពិសេសនៅថ្នាក់ភូមិឃុំសង្កាត់ ក៏ត្រូវបន្តអប់រំ ផ្សព្វផ្សាយពីគ្រោះថ្នាក់ នៃវីរុសកូវីដ១៩ ជាពិសេសវីរុសបំប្លែងថ្មី ដែលតា។ ចូរកុំភ្លេចថា កន្លងមក មានច្រើនករណីហើយ ដែលឈឺស្លាប់ មុនទៅដល់ពេទ្យ ឬក៏ធ្លាក់ខ្លួនឈឺធ្ងន់ ទើបទៅពេទ្យ។ ក្រោយស្លាប់ ធ្វើតេស្ត យកសំណាកពិនិត្យ ទើបចេញលទ្ធផលថា កើតកូវីដ។ នៅសហគមន៍ភូមិឃុំ ក៏ត្រូវរាយការណ៍ជាបន្ទាន់ បើមានជនចំណូលថ្មី ពិសេសអ្នកមកពីថៃ។ ធ្វើដូច្នេះ ដើម្បីអាជ្ញាធរសមត្ថកិច្ច សហការជាមួយក្រុមគ្រូពេទ្យ ពិនិត្យរកកូវីដ ហើយណែនាំឲ្យធ្វើចត្តាឡីស័ក ទប់ស្កាត់នូវការឆ្លងរាលដាលតាមភូមិស្រុកនោះ។
អាជ្ញាធរសមត្ថកិច្ច ក៏ត្រូវបន្តអនុវត្តនូវវិធានការរដ្ឋបាល ម៉ឺងម៉ាត់ មិនថា នៅភ្នំពេញ ឬនៅតាមខេត្តណាណាទេ។ ការជួបជុំផឹកស៊ី ត្រូវបន្តផ្អាកមួយរយៈទៀត ទម្រាំដល់កូវីដស្ងប់ស្ងាត់ទៅវិញ។ ករណីល្មើសនឹងវិធានការរដ្ឋបាល ដើម្បីទប់ស្កាត់កូវីដ ត្រូវបានអនុវត្តរួចមកហើយ ជាច្រើនករណី ហើយថ្មីៗនេះ យ៉ាងហោចណាស់ មនុស្ស ៦នាក់ មានទាំងម្ចាស់ហាង និងមេការផង នៅខេត្តសៀមរាប ត្រូវបានចាប់ខ្លួន ហើយតុលាការចោទប្រកាន់ និងសម្រេចឃុំឃាំងនៅពន្ធនាគារ។ នោះក៏ដោយសារតែបើកហាង និងចូលផឹកស៊ី ក្នុងអំឡុងពេលហាមឃាត់នេះ។
ចែករំលែកព័តមាននេះ