ខេត្តបន្ទាយមានជ័យ ៖ សត្វគោជាច្រើនក្បាលកំពុងកើតជំងឺពកលើស្បែក ដែលអាជ្ញាធរស្រុកបានដឹកនាំមន្ត្រីជំនាញចុះពិនិត្យចាក់ និងបាញ់ថ្នាំព្យបាល ដើម្បីការពារ ហេតុការណ៍នេះបានកើតឡើងកាលពីថ្ងៃទី២០ ខែកក្តដា ឆ្នាំ២០២១ ស្ថិតស្រុកភ្នំស្រុក ខេត្តបន្ទាយមានជ័យ។
លោក យឹម សំណាង អភិបាលស្រុកភ្នំស្រុក បានអោយដឹងថា ក្រោយពីទទួលព័ត៌មានពីប្រជាពលរដ្ឋថាមានសត្វគោបានឆ្លងជំងឺពកលើស្បែក ហើយអាជ្ញាធរក៏សុំអន្តរាគមន៍ពីមន្ត្រីការិយាល័យផលិតកម្មនិងបសុព្យបាលខេត្តបន្ទាយមានជ័យ ដឹកនាំដោយលោក ហ៊ុយ ទូច ជាប្រធានពេទ្យសត្វខេត្តបន្ទាយមានជ័យ រួមទាំងមន្ត្រីជំនាញ បានចុះមកពិនិត្យ និងព្យាបាលជំងឺសត្វគោ ដែលមានជំងឺពកលើស្បែកទាំងនោះ។
លោកបានបញ្ជាក់ថា ជំងឺពកលើស្បែកគោនេះ គឺប្រជាកសិករបានអោយដឹងថា កើតមានឡើងរយៈពេលយូរមកហើយ តែឆ្នាំនេះកើតច្រើន ទើបសុំអោយអន្តរាគមន៍ពីមន្ត្រីជំនាញ ដើម្បីអោយជួយព្យាបាលមិនអោយកើតជំងឺរីករាលដាលបន្តទៅទៀត។
លោក ហ៊ុយ ទូច ប្រធានការិយាល័យផលិតកម្ម និងបសុព្យាបាលខេត្តបន្ទាយមានជ័យ បានបញ្ជាក់ថា ក្រោយដឹកនាំមន្ត្រីជំនាញ បានចុះមកពិនិត្យគោដែលកំពុងកើតមានជំងឺពកលើស្បែក ឃើញថា នៅស្រុកភ្នំស្រុក កើតមានច្រើនជាងគេទូរទាំងខេត្តបន្ទាយមានជ័យ ព្រោះជំងឺពកលើស្បែកគោនេះ ឆ្លងភាគច្រើននៅរដូវស្សា ខណៈមានភ្លៀងជោកជាំ ហើយបានឆ្លងតាមរយៈសត្វល្អិត រុយ មូស ឬដង្កូវនៅក្នុងក្រោលគោ ដែលដេកមិនស្អាត និងឆ្លងតាមរយៈការទិញសត្វពីតំបន់ផ្សេងចូលមកចិញ្ចឹម ជាហេតុបណ្តាលឱ្យឆ្លងក៏មាន និងតាមរយៈចំណី ព្រមទាំងការបង្កាត់ពូជន៍ ទើបបណ្តាលកើតជំងឺពកលើស្បែកគោបែបនេះតែម្តង។
នៅពេលដែលមន្ត្រីជំនាញបានពិនិត្យ និងព្យាបាលជំងឺពកលើស្បែកគោហើយនោះ មន្ត្រីជំនាញក៏បានណែនាំដល់បងប្អូនប្រជាកសិករដែលចិញ្ចឹមគោ ឬក្របី ត្រូវសហការជាមួយមន្ត្រីជំនាញ ក្នុងការចិញ្ចឹមសត្វទទួលបានផលល្អ និងមានការរីកចម្រើនក្នុងការចិញ្ចឹមសត្វជាលក្ខណៈគ្រួសារទទួលបានផលល្អប្រសើរជាងធ្វើចំណាកស្រុកដោយខុសច្បាប់៕
ចែករំលែកព័តមាននេះ