ខេត្តតាកែវ ៖ រហូតមកដល់ថ្ងៃនេះ ក្រុមគ្រូពេទ្យ និងអាជ្ញាធរស្រុកបានធ្វើតេស្តរកឃើញអ្នកឆ្លងជំងឺកូវីដ១៩ថ្មីចំនួន១៩នាក់បន្ថែមទៀតហើយ បន្ទាប់ពីអាជ្ញាធរបានធ្វើសម្រេចការបិទខ្ទប់ភូមិសាស្ត្រ ភូមិពោន និងភូមិត្រពាំងឈូក ក្នុងឃុំត្រឡាច ស្រុកទ្រាំង ជាបណ្ដោះអាសន្ន ចាប់ពីម៉ោង១៧:០០នាទី ល្ងាចថ្ងៃទី១២នេះតទៅ រហូតដល់មានសេចក្ដីជូនដំណឹងជាថ្មី ។
លោកអ៊ុំ ចំរើន អភិបាលរងស្រុកទ្រាំងបានប្រាប់កោះសន្តិភាពយើងអោយដឹងថាសេចក្ដីសម្រេចរបស់ រដ្ឋបាលខេត្តតាកែវបានបន្ថែមថា គោលបំណងនៃការបិទខ្ទប់នេះ គឺដើម្បីកាត់ផ្ដាច់ការឆ្លងរាលដាលនៃជំងឺកូវីដ១៩ នៅក្នុងភូមិសាស្ត្រ ដែលមានអ្នកវិជ្ជមានជំងឺកូវីដ១៩ បានប៉ះពាល់ផ្ទាល់ និងប្រយោលច្រើននាក់ពាក់ព័ន្ធព្រឹត្តិការណ៍សហគមន៍ ២០ កុម្ភៈ ។ ជាពិសេសបងប្អូនប្រជាពលរដ្ឋនៅតំបន់បិទខ្ទប់ទាំងអស់ត្រូវស្ដាប់តាមការណែនាំរបស់ក្រសួងសុខាភិបាល និងអនុវត្តវិធាន ៣ការពារ និង៣កុំ របស់ សម្ដេចតេជោ ឱ្យបានម៉ឺងម៉ាត់បំផុត ។
លោកអ៊ុំ ចំរើន អភិបាលរងស្រុកទ្រាំងបានបន្តទៀតថា ចំពោះប្រជាពលរដ្ឋយើងរស់នៅភូមិខាងលើ ដែលបានឆ្លងជំងឺកូវីដ១៩នេះ គឺផ្ទុះចេញពីបុគ្គលម្នាក់ឈ្មោះ សម រតនា ភេទប្រុស អាយុ៣៥ឆ្នាំធ្វើការជាយោធា ហើយគាត់បានមកចូលរួមបុណ្យសពបងជីដូនមួយឈ្មោះអ៊ុក រីម ភេទស្រី អាយុ៨៣ឆ្នាំរស់នៅភូមិពោនឃុំត្រឡាច លុះពេលគាត់ចេញពីបុណ្យត្រឡប់ទៅភ្នំពេញវិញដល់ធ្វើតេស្តក៏មានវិជ្ជមានជំងឺកូវីដ១៩ ហើយគាត់ក៏បានខលប្រាប់បងប្អូនថា គាត់មកចូលរួមបុណ្យសពបានឆ្លងជំងឺកូវីដ១៩ ហើយក៏មានការផ្ទុះរីករាលដាលមកដល់ព្រឹកថ្ងៃនេះ អ្នកដែលធ្វើតេស្តវិជ្ជមានមានចំនួន៣៤នាក់ និងរហូតមកដល់ថ្ងៃត្រង់នេះ អាជ្ញាធរនឹងមន្ត្រីពេទ្យបានធ្វើតេស្តរកឃើញអ្នកឆ្លងថ្មីទាំង២ភូមិ មានចំនួន១៩នាក់បន្ថែមទៀត សរុបកើនដល់៥៣នាក់ហើយ ។
លោកអភិបាលរងស្រុក ក៏បានអំពាវនាវដល់អ្នកពាក់ព័ន្ធទាំងប៉ះផ្ទាល់ និងប្រយោលមានចំនួនជាង១០០នាក់ហើយ អ្នកពាក់ព័ន្ធទាំងអស់ធ្វើចត្តាឡីស័កនៅក្នុងផ្ទះ ចំណែកអ្នកដែលមានវិជ្ជមានជំងឺកូវីដ១៩ បានយកទៅព្យាបាលនៅមន្ទីរពេទ្យបង្អែកស្រុកកោះអណ្តែត ។
លោកអ៊ុំ ចំរើន អភិបាលរងស្រុក ក៏បានធ្វើការអំពាវនាវដល់បងប្អូនប្រជាពលរដ្ឋយើង ដែលមានការប៉ះពាល់ដោយផ្ទាល់ ឬប្រយោល សូមធ្វើចត្តាឡីស័កអោយបានត្រឹមត្រូវ ដោយអនុវត្តតាមការណែនាំរបស់ក្រសួងសុខាភិបាល ពិសេសអនុវត្តផែនការការពារ ៣កុំ ៣ការពារ របស់សម្តេចប្រមុខរាជរដ្ឋាភិបាលអោយបានច្បាស់លាស់ទើបមិនមានការរីករាលដាលជំងឺកូវីដ១៩ បាន ៕
ចែករំលែកព័តមាននេះ