ខេត្តកំពង់ចាម ៖ ប្រជាពលរដ្ឋក្មេងចាស់ប្រុសស្រី រស់នៅភូមិអូបេង បុសពោធិ ហ្នឹងភូមិអូបេង ក្នុងឃុំមេសរជ្រៃ ស្រុកស្ទឹងត្រង់ ត្រូវបានទទួលរងនូវការរាតត្បាតនៃជំងឺកូវីដ១៩ ដែលរហូតមកដល់ពេលនេះមានចំនួន៧៧នាក់…
ខេត្តកំពង់ចាម ៖ ប្រជាពលរដ្ឋក្មេងចាស់ប្រុសស្រី រស់នៅភូមិអូបេង បុសពោធិ ហ្នឹងភូមិអូបេង ក្នុងឃុំមេសរជ្រៃ ស្រុកស្ទឹងត្រង់ ត្រូវបានទទួលរងនូវការរាតត្បាតនៃជំងឺកូវីដ១៩ ដែលរហូតមកដល់ពេលនេះមានចំនួន៧៧នាក់ ក្នុងនោះស្លា.ប់៣នាក់ សុទ្ធតែជាមនុស្សចាស់ ។
រហូតឈានដល់បិទផ្សារមេសរជ្រៃរយៈពេល១៤ថ្ងៃ ចាប់តាំងតែពីថ្ងៃទី៧ កក្កដា រហូតដល់ថ្ងៃទី១៩ កក្កដា ឆ្នាំ២០២១ ដើម្បីទប់ស្កាត់នៃការរាលដើរឆ្លងជំងឺកូវីដ១៩ ។
លោក ថោ វុទ្ធី មេឃុំមេសរជ្រៃ មានប្រសាសន៍ឲ្យដឹងថា ដោយមានការយកចិត្តទុកដាក់ពីសំណាក់ឯកឧត្តមអ៊ុន ចាន់ដា អភិបាលខេត្ត អមដំណើរដោយអភិបាលរងខេត្ត ព្រមទាំងសហការីជាច្រើននាក់ នាព្រឹកថ្ងៃទី១០ កក្កដា ឆ្នាំ២០២១ បានអញ្ជើញចុះចែកអំណោយជូនដល់ប្រជាពលរដ្ឋនៅក្នុងតំបន់បិទខ្ទប់ ឃុំមេសរជ្រៃ ដែលកំពុងតែជួបការលំបាក ។
លោកមេឃុំមេសរជ្រៃ មានប្រសាសន៍រំលឹកថា ដើមហេតុដំបូងជំងឺកូវីដ១៩ ត្រូវបានរកឃើញមុនគេនៅក្នុងភូមិអូរបេង កាលពីថ្ងៃទី៣០ មិថុនា មានចំនួន៤គ្រួសារ ក្រោយមកទៀតចេះតែរកឃើញនៅតាមភូមិផ្សេងទៀត ក្នុងឃុំមេសរជ្រៃ ដោយចំនួនចេះ តែមានការកើនឡើងជាលំដាប់ ។
នៅថ្ងៃទី៤ កក្កដា ក្រុមគ្រូពេទ្យបានចុះប្រមូលសំណាកលើប្រជាពលរដ្ឋចំនួន១៧៥ នាក់ក្នុងនោះឃើញវិជ្ជមានចំនួន២៥នាក់ ។ រហូតមកដល់ថ្ងៃទី៩ កក្កដា សរុបអ្នកជំងឺកូវីដទាំងអស់ចំនួន៧៧នាក់ ក្នុងនោះមានកុមារចំនួន៥នាក់ត្រូវបានបញ្ជូនមកព្យាបាលនៅមន្ទីរពេទ្យមេគង្គក្រុងកំពង់ចាម ។
សូមបញ្ជាក់ថា ក្នុងចំណោមអ្នកជំងឺទាំងអស់ គឺស្លា.ប់ចំនួន៣នាក់សុទ្ធតែជាមនុស្សចាស់ មានអាយុចាប់ពី៦០ឆ្នាំឡើងដោយសាច់ញាតិនាំទៅព្យាបាលនៅខេត្តសៀមរាប និងរាជធានីភ្នំពេញ ។
លោកថោ វុទ្ធី មេឃុំមេសរជ្រៃ បញ្ជាក់ថា ជាមួយនោះមានគ្រួសារនៃសពនៅភូមិដីក្រហម ឃុំសុភាស បានធ្វើបុណ្យសពមកទិញឥវ៉ាន់នៅផ្សារមេសរជ្រៃ ព្រមទាំងបានចម្លងជំងឺកូវីដ១៩ ទៅដល់អ្នកលក់ ចំណែកគ្រួសារនៃសពធ្វើតេស្តក៏ឃើញវិជ្ជមានកូវីដផងដែរ ។
អ្នកខ្លះត្រូវបានរកឃើញក្នុងហាងកាហ្វេ ដែលមានការជួបជុំគ្នាច្រើនភ្នាល់លេងល្បែងបញ្ជល់មាន់តាមទូរទស្សន៍ជាដើម ។ ក្នុងពេលអញ្ជើញចុះចែកអំណោយជូនដល់ប្រជាពលរដ្ឋនៅតំបន់បិទខ្ទប់ ឯកឧត្តមអ៊ុនចាន់ដាអភិបាលខេត្ត បានក្រើនរំលឹកឱ្យប្រជាពលរដ្ឋត្រូវយកចិត្តទុកដាក់ថែរក្សាសុខភាពឲ្យបានល្អ ពិសេសក្នុងពេលធ្វើដំណើរចេញទៅក្រៅផ្ទះត្រូវតែពាក់ម៉ាស់និងឧស្សាហ៍លាងដៃជាមួយសាប៊ូឬជែល ។
សូមបញ្ជាក់ថា នាពេលព្រឹកថ្ងៃទី១០ កក្កដា ឯកឧត្តមអភិបាលខេត្តបានចែកអំណោយជូនដល់ប្រជាពលរដ្ឋដែលមានជីវភាពខ្វះខាតចំនួន ២០០គ្រួសារនៅក្នុងបរិវេណសាលាស្រុកស្ទឹងត្រង់បន្ទាប់មកទើបអញ្ជើញចុះចែកនៅតំបន់បិទខ្ទប់ខាងលើ៕
ចែករំលែកព័តមាននេះ