រាជធានីភ្នំពេញ ៖ អង្គភាពការពារកុមារ ហៅកាត់ (CPU) កាលពីវេលាម៉ោង០៣រសៀលថ្ងៃទី៣០ ខែមិថុនា ឆ្នាំ២០២១ បានចុះធ្វើការស៊ើបអង្កេតទៅលើករណីឃា.តកម្ម ទៅលើកុមារអាយុ ០២ឆ្នាំ នៅក្នុងសង្កាត់ស្ទឹងមានជ័យ២ រាជធានីភ្នំពេញ ។
ការចុះស៊ើបអង្កេតនេះ ក្រោយពីបានទទួលដំណឹងអំពីការស្លាប់របស់កុមារីអាយុ០២ឆ្នាំម្នាក់ ដោយមានការសង្ស័យច្រើន ទើបក្រុមការងារស៊ើបអង្កេតបទល្មើសឃាតកម្ម (HIT) និងក្រុមការងារបច្ចេកទេស និងវិទ្យាសាស្ត្រ (FST) នៃអង្គភាពការពារកុមារ (CPU) រួមសហការជាមួយការិយាល័យបច្ចេកទេស និងវិទ្យាសាស្ត្រ និងការិយាល័យព្រហ្មទណ្ឌនៃស្នងការដ្ឋាននគរបាលរាជធានីភ្នំពេញ បានធ្វើការពិនិត្យផ្ទាល់ នៅកន្លែងកើតហេតុតែម្តង ។
ពេលចុះទៅដល់កន្លែងកើតហេតុភ្លាម ត្រូវបានហ៊ុំព័ទ្ធ និងចាប់ផ្តើម ធ្វើការស៊ើបអង្កេត ដោយក្រុមការងារស៊ើបអង្កេតបទល្មើសឃាតកម្ម HIT បានប្រទះឃើញសាកសពកុមារី អាយុ០២ឆ្នាំនេះ នៅក្នុងបន្ទប់ជួលតូចមួយ ។
តាមការពិនិត្យសាកសពបឋម បានបង្ហាញថា កុមាររងគ្រោះបានរងរបួសធ្ងន់ធ្ងរជាច្រើនកន្លែង នៅលើដងខ្លួន ។ អង្គភាពការពារកុមារ (CPU) ក្នុងកិច្ចសហប្រតិបត្តិការជាមួយនាយកដ្ឋាននគរបាលបច្ចេកទេស និងវិទ្យាសាស្ត្រនៃក្រសួងមហាផ្ទៃ រួមជាមួយលោកវេជ្ជបណ្ឌិត នង សុវណ្ណរតន៍ បានរួមគ្នាធ្វើកោសល្យវិច័យទៅលើសាកសព ដើម្បីបញ្ជាក់អំពីទម្ងន់ នៃស្នាមរបួសមាននៅលើដងខ្លួន ដែលរបួសទាំងនេះហើយ បានបណ្តាលឲ្យកុមារីរងគ្រោះ ទទួលមរណភាព ។
បុរសអាយុ២៩ឆ្នាំម្នាក់ ត្រូវជាឪពុកចុង របស់សពកុមារី ត្រូវបានកម្លាំងសមត្ថកិច្ចឃាត់ខ្លួន និងបញ្ជូនទៅកាន់ប៉ុស្តិ៍នគរបាលរដ្ឋបាលស្ទឺងមានជ័យ២ ដើម្បីសួរនាំបន្ថែម ។
គួរម្លឹកឡើងវិញថា កុមារីតូចម្នាក់បានស្លា.ប់ ដោយសារតែត្រូវបុរសជាឪពុកចុងដួលសង្កត់ពីលើ (នេះបើតាមការអះអាងរបស់បុរសអាយុ២៩ឆ្នាំត្រូវជាឪពុកចុង) បង្កឲ្យមានការភ្ញាក់ផ្អើលកាលពីវេលា២និង៣០នាទីរសៀល ថ្ងៃទី៣០ ខែមិថុនា ឆ្នាំ២០២១ នៅចំណុចបន្ទប់ផ្ទះជួលមួយកន្លែង ស្ថិតតាមបណ្តោយផ្លូវលំ ក្នុងក្រុមទី៧ ភូមិឬស្សី៣ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។
កុមារីរងគ្រោះ មានឈ្មោះ នាន់ ស្រីនិច អាយុ២ឆ្នាំនិង៨ខែ ស្នាក់នៅជាមួយយាយតាបង្កើត នៅចំណុចកើតហេតុខាងលើ ។ ចំណែកបុរសជាឪពុកចុង មានឈ្មោះ សុខ រដ្ឋា អាយុ២៩ឆ្នាំ ស្នាក់នៅផ្ទះជួលម្តុំៗគ្នា ជាមួយស្ត្រីម្តាយបង្កើតកុមារីរងគ្រោះមានឈ្មោះ នាន់ ស្រីនិច អាយុ២៤ឆ្នាំ ។
ប្រភពព័ត៌មានពីកន្លែងកើតហេតុ បានអោយដឹងជាបឋមថា នៅវេលាយប់ថ្ងៃទី២៩ ខែមិថុនា ឆ្នាំ២០២១ ម្តាយបង្កើតកុមារីរងគ្រោះ និងរូបខ្លួន បានទៅយកកូនស្រីពីយាយតា ទៅបន្ទប់ជួលរបស់ខ្លួនមួយថ្ងៃ ព្រោះខានជួបកូនយូរ ហាក់នឹកនា ។ លុះរហូតដល់ម៉ោង១រសៀល ថ្ងៃទី៣០ ខែឆ្នាំដដែល បុរសជាឪពុកចុង បានជូនកូនស្រីមកអោយយាយតាវិញ ។ បន្ទាប់មក នៅរសៀលថ្ងៃខែដដែល កុមារីរងគ្រោះបានរត់លេងក្បែរបន្ទប់ជួល ហើយបុរសជាឪពុកចុង បានដើរទៅហៅអោយត្រឡប់មកបន្ទប់វិញ តែពេលនោះ ដោយសារតែខ្លួនមិនបានប្រយ័ត្ន ក៏បានរអិលជើង ហើយក៏ដួលទាំងជំហរ សង្កត់ទៅលើកូនស្រីចុង បណ្តាលអោយរងរបួសធ្ងន់ ភ្លាមៗនោះ រូបគេ(បុរសជាឪពុកចុង) បានបីកុមារីរងគ្រោះមកបន្ទប់ជួលរបស់យាយតា ហើយប្រាប់ថា កុមារីរងគ្រោះរងគ្រោះ ត្រូវរូបគេដួលសង្កត់ពីលើ ។ ក្រោយមកមិនបានប៉ុន្មានផង កុមារីរងគ្រោះក៏ត្រូវដាច់ដង្ហើមស្លា.ប់តែម្តង ។
បន្ទាប់ពីកើតមានរឿងហេតុហើយនោះ កម្លាំងសមត្ថកិច្ចមូលដ្ឋាន បានចុះអន្តរាគមន៍ និងបានធ្វើការឃាត់ខ្លួនបុរសជាឪពុកចុងភ្លាមៗ យកទៅកាន់ប៉ុស្តិ៍រដ្ឋបាលនគរបាលស្ទឹងមានជ័យ២ ដើម្បីធ្វើការសាកសួរដំណើររឿងហេតុ ។
ដោយឡែក ចំពោះសាកស.ពកុមារីរងគ្រោះ ត្រូវបានក្រុមគ្រូពេទ្យធ្វើតេស្តសំណាករកមេរោគកូវីដ១៩ ជាមុនសិន មុនពេលឈានដល់ការធ្វើកោសល្យវិច័យសព ពិនិត្យអោយបានច្បាស់លាស់ថា តើជាករណីឪពុកចុងដួលដោយអចេតនាសង្កត់លើ ឬជាករណីអ្វីផ្សេង ក្រៅពីនេះ ?
ជុំវិញរឿងហេតុខាងលើនេះដែរ តាមការអោយដឹងពីសំណាក់យាយតាបង្កើតរបស់កុមារីរងគ្រោះ បញ្ជាក់ថា ៖ ស្ត្រីជាម្តាយបង្កើតរបស់កុមារីរងគ្រោះបានផ្តាច់ចំណងប្តីប្រពន្ធជាមួយប្តីដើមតាំងពីកូនស្រីនៅក្នុងផ្ទៃបានប៉ុន្មានខែមកម្ល៉េះ ។ លុះក្រោយពេលចាប់កំណើតកូនស្រីមក កូនស្រីត្រូវបានយាយតាជាអ្នកទទួលរ៉ាប់រងចិញ្ចឹម ចំណែកស្ត្រីជាម្តាយបានទៅនៅផ្ទះជួលម្នាក់ឯង ដោយប្រកបការងារជាកម្មការិនីរោងចក្រ ។ ក្រោយមកក៏បានមានទំនាក់ទំនងជាមួយបុរសម្នាក់ ដោយបានរួមរស់នៅជាមួយគ្នាទើបបាន៣ខែប៉ុណ្ណោះ ក៏កើតមានរឿងហេតុចង្រៃនេះកើតឡើងតែម្តងទៅ ៕
ចែករំលែកព័តមាននេះ