ខេត្តតាកែវ ៖ ពលរដ្ឋថា ក្រុមប្រឹក្សាឃុំព្រែកផ្ទោលម្នាក់ កំពុងរត់ការច្បាប់កាយត្រពាំងបុរាណមួយនៅភូមិភ្នំបាទេព ខណៈអភិបាលស្រុកថា មិនអនុញ្ញាតិឲ្យឈ្មួញណាម្នាក់កាយនោះទេ។ បើតាមសេចក្តីរាយការណ៍មួយបានឲ្យដឹងថា កាលពីពេលថ្មីៗនេះ សមាជិកក្រុមប្រឹក្សាឃុំព្រែកផ្ទោលម្នាក់ គឺលោក អឹម សូលីដា កំពុងរត់ការសុំសិទ្ធកាយយកអាចម៍ដីពីក្រុង ត្រពាំង បេតិភ័ណ្ឌបុរាណប្រវត្តិសាស្ត្រ ស្ថិត ក្នុង ភូមិ បាទេព យកទៅលក់ក្រោមលេសស្ដារត្រពាំង។
សេចក្តីរាយការណ៍ថា លោក អឹម សូលីដា បានរត់ការច្បាប់ពីលោកមេភូមិនិងលោកមេឃុំរួចហើយ នៅតែការចុះហត្ថលេខាពីលោក ឌឹម គឹមសាន្ត អភិបាលស្រុកអង្គរបូរី តែប៉ុណ្ណោះ គេ នឹងដាក់គ្រឿងចក្រដំណើរការកាយយកអាចម៏ដីក្នុងត្រពាំងប្រវត្តិសាស្ត្រនោះហើយ។ សូមបញ្ជាក់ថា ត្រពាំងបុរាណនោះ មានទំហំប្រមាណ៣ហិកតា ត្រូវបានគ្រប់គ្រងដោយ ក្រសួងវប្បធម៌ និងវិចិត្រ សិល្បៈ ក្រោយ ពី គេ រកឃើញថា ត្រពាំងនោះ គឺជា ត្រពាំងប្រវត្តិសាស្ត្រ។
ជុំវិញករណីនេះ លោក ណុប ឌល មេឃុំព្រែកផ្ទោលបានទទួលស្គាល់ថា លោកពិតជាបានចុះហត្ថលេខាលើឯកសារតាមការស្នើសុំរបស់លោក អឹម សូលីដា សមាជិកក្រុមប្រឹក្សាឃុំព្រែកផ្ទោលមែន តែរឿងអនុញ្ញាតិតាមកាស្នើសុំ គឺអាស្រ័យនៅខាងស្រុកដែលមានជំនាញពាក់ពន្ធ័ច្រើន។ លោកមេឃុំបន្តថា រឿងត្រពាំងល្បើក គឺពិតជាត្រពាំងបុរាណប្រវត្តិសាស្ត្រពិតមែន និងជាទ្រព្យសម្បត្តិរបស់រដ្ឋគ្មានកម្មសិទ្ធិរបស់អ្នកណាម្នាក់ទេ តែការស្នើសុំស្ដារគឺដើម្បីបានទឹកស្រោចស្រពដំណាំអ្នកដែលកំពុងអាស្រ័យផលនៅលើដីត្រពាំងល្បើកនេះ ហើយលោកមេឃុំបានបញ្ជាក់ទៀតថា ត្រពាំងនេះជាត្រពាំងបុរាណដូច្នេះទំនងជាមានវត្ថុបុរាណ ឬវត្ថុអាថ៌កំបាំងអ្វីខ្លះលោកអត់ដឹងដែរ តែទុកឲ្យ ខាងថ្នាក់ស្រុកស្រាវជ្រាវតាមហ្នឹងទៅ។
ចំណែកលោក ឌឹម គឹមសាន្ត អភិបាលស្រុកអង្គរបុរីបានឲ្យ ដឹងថា ចំពោះការស្នើរសុំស្ដារត្រពាំងល្បើកជាត្រពាំងបុរាណប្រវត្តិសាស្ត្រខាងលើ គឺលោកមិនអនុញ្ញាតិឲ្យ កាយជាដាច់ខាត ព្រោះវាជាទ្រព្យសម្បត្តិវប្បធម៏របស់ជាតិ៕
ចែករំលែកព័តមាននេះ