ខេត្តតាកែវ ៖ បើតាមសេចក្តីរាយការណ៍បានឲ្យដឹងថា មានយានដ្ឋានកាត់តកែច្នៃដំឡើងរថយន្ដជាច្រើន ទីតាំងកំពុងដំណើរការនៅក្នុងស្រុកបាទី ដោយមានការជួយជ្រោមជ្រែងពីលោកអនុប្រធានមន្ទីរសាធារណការ និងដឹកជញ្ជូនខេត្តតាកែវម្នាក់។
តាមម្ចាស់យានដ្ឋានមួយកន្លែង ស្ថិតនៅឃុំក្រាំងធ្នង់បាននិយាយថា ការតម្លើងកែច្នៃរថយន្តចង្កូតស្តាំនេះ គឺខ្លួនទទួលបានការអនុញ្ញាត ពី លោកអ៊ុ ចាន់ធូ អនុប្រធាន មន្ទីរ សាធារណការ និង ដឹកជញ្ជូនខេត្តតាកែវ ទទួលបន្ទុកគ្រប់គ្រងយានដ្ឋាន, ហើយថា នៅក្នុងស្រុកបាទីនេះ មានទីតាំងដំឡើងឡានបែនចង្កូតស្តាំនេះជាច្រើនទៀត។
បើតាមសេចក្តីរាយការណ៍ថា អ្នកកែច្នៃរថយន្តទាំងនោះ គឺគេបានទិញក្បាលរថយន្តរួចហើយមកកាត់តកែច្នៃ តម្លើងជារថយន្ត បែនដាក់លក់តែម្តង ប៉ុន្តែកុំភ្លេចបង់លុយទៅឲ្យសមត្ថកិច្ចក្នុង១ក្បាលឡាន ចំនួន១៥០ដុល្លារ ដើម្បីគេយកទៅចាត់ចែងដោយមិនចុះទៅបង្ក្រាប។
ជាមួយគ្នានេះដែរ ម្ចាស់យានដ្ឋានកែច្នៃរថយន្តចង្កូតស្តាំខុសច្បាប់ទាំងនោះ ក៏ត្រូវត្រៀម កញ្ចប់ខ្លះជូន ដល់ ក្រុម នៃមន្ទីរសាធារណការ និង ដឹកជញ្ជូនខេត្តតាកែវ ដឹកនាំដោយ លោក អ៊ុ ចាន់ធូ អនុប្រធានមន្ទីរ ទទួលបន្ទុកគ្រប់គ្រងយានដ្ឋាន នៅពេលចុះទៅពិនិត្យ ម្តងៗផង ហើយ បើតាម ដឹង មាន យានដ្ឋាន ខ្លះ ត្រូវ បង់លុយជាខែឲ្យ លោកអ៊ុ ចាន់ធូ ទៀតផង ដោយលោកថា គាត់ត្រូវយកទៅបង់ឲ្យ ថ្នាក់លើទៀត។
ចំពោះការចោទប្រកាន់នេះ លោក អ៊ុ ចាន់ធូ អនុប្រធានមន្ទីសាធារណៈការ និង ដឹកជញ្ជូន ខេត្តតាកែវ បានថ្លែងបដិសេធដោយថា កន្លងមកលោកបានចុះតាមយានដ្ឋាននៅស្រុកបាទីជាញឹកញាប់មែន តែលោកចុះទៅអប់រំឲ្យ ម្ចាស់យានដ្ឋានអនុវត្តទៅតាមផ្លូវច្បាប់ និងឲ្យ ពួកគេ បង់ពន្ធចូលរដ្ឋទេ។ ដោយ ឡែក ចំពោះរថយន្តបែនចង្កួតស្ដាំគ្មានការបង់ពន្ធវិញ គឺមិនពាក់ពន្ធ័នឹងលោកទេ វាគឺជាជំនាញរបស់គយ និងរដ្ឋករ ចំណែករឿងយកលុយជាថ្នូរឲ្យ ម្ចាស់យានដ្ឋានប្រព្រឹត្តល្មើសច្បាប់ គឺលោកមិនពាក់ពន្ធ័ឡើយ។
ដោយឡែក ពាក់ព័ន្ធនឹងសមត្ថកិច្ច ចុះទៅយកលុយ ក្បាលឡានពីម្ចាស់យានដ្ឋានវិញ លោកឆាយ កែវមុន្នី អធិការនគរបាលស្រុកបាទី បានថ្លែងថា សមត្ថកិច្ចរបស់លោកមិនដែលបានផលអីបន្តិចពីរឿងលុយកាក់ម្ចាស់យានដ្ឋានទាំងនោះទេ ។
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ