រាជធានីភ្នំពេញ ៖ ផ្ទះទឹកបែចិញ្ចឹមត្រី ផ្ទះតូចៗ និងសំណង់មិនរៀបរយនៅលើផ្ទៃទឹកទន្លេសាប ព្រមទាំងច្រាំងទន្លេ មេគង្គនៅក្បាលជ្រោយចង្វារ ក្នុងមូលដ្ឋានខណ្ឌជ្រោយចង្វារ ត្រូវបានរដ្ឋបាលខណ្ឌប្រើកម្លាំងរុះរើខ្ទេចអស់ ក្នុងរយៈពេលប៉ុន្មានថ្ងៃ…
រាជធានីភ្នំពេញ ៖ ផ្ទះទឹកបែចិញ្ចឹមត្រី ផ្ទះតូចៗ និងសំណង់មិនរៀបរយនៅលើផ្ទៃទឹកទន្លេសាប ព្រមទាំងច្រាំងទន្លេ មេគង្គនៅក្បាលជ្រោយចង្វារ ក្នុងមូលដ្ឋានខណ្ឌជ្រោយចង្វារ ត្រូវបានរដ្ឋបាលខណ្ឌប្រើកម្លាំងរុះរើខ្ទេចអស់ ក្នុងរយៈពេលប៉ុន្មានថ្ងៃ គីនៅសល់ តែរោងដេកចាំទូកនេសាទ និងស៊ូរ៉ាវមួយរបស់ជនជាតិអ៊ីស្លាមនៅក្បាលជ្រោយចង្វារ ត្រូវបានម្ចាស់ធ្វើកិច្ចសន្យារុះរើដោយខ្លួន ដោយទុករយៈពេល៣ថ្ងៃ យ៉ាងយូរថ្ងៃទី២០ ខែមិថុនា ឆ្នាំ២០២១នេះ ។
នេះជាជោគជ័យមួយដែលទទួលបាននូវការគាំទ្រពីមហាជន ក្រោមការដឹកនាំ និងបញ្ជាផ្ទាល់ក្នុងការអនុវត្តវិធានការរដ្ឋបាល នេះពីសំណាក់លោក ឃ្លាំង ហួត ជំនួយការសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាអភិបាលខណ្ឌជ្រោយចង្វារ ។
តាមព័ត៌មានអោយដឹងថា នៅក្នុងមូលដ្ឋានខណ្ឌជ្រោយចង្វារមានបែចិញ្ចឹមត្រី ផ្ទះបណ្តែតទឹក ផ្ទះទូកតូចៗ និងសំណង់មិនរៀបរយនៅលើផ្ទៃទន្លេសាបចំនួន១០៨ខ្នង និងពីររោងស្នាក់នៅច្រាំងទន្លេ របស់ជនជាតិអ៊ីស្លាមនៅក្បាលជ្រោយចង្វារចំនួន៧៤ខ្នង សរុបទាំងអស់ចំនួន១៨២ខ្នង ។
បន្ទាប់ពីរដ្ឋបាលរាជធានីភ្នំពេញ និងរដ្ឋបាលខណ្ឌជូនដំណឹងអោយរុះរើដោយទុករយៈពេល១សប្តាហ៍ គិតចាប់ពីថ្ងៃទី២ ខែមិថុនា ឆ្នាំ២០២១ ដល់ថ្ងៃផុនឱសានវាទ អាជ្ញាធរខណ្ឌជ្រោយចង្វារ ដឹកនាំដោយលោក ឃ្លាំង ហួត ជំនួយការសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាអភិបាលខណ្ឌជ្រោយចង្វារបានប្រើកម្លាំង អនុវត្តវិធានការរដ្ឋាបាលចុះរុះរើ នៅព្រឹកថ្ងៃទី១៣ ខែមិថុនា ឆ្នាំ២០២១ ។
តាមព័ត៌មានអោយដឹងថា នៅក្នុងការអនុវត្តវិធានការរដ្ឋបាលនេះ អាជ្ញាធរបានណែនាំអោយម្ចាស់ផ្ទះបណ្តែតទឹក បែត្រីចិញ្ចឹមចំនួន ១០៨ខ្នង ក្នុងនោះរុះរើដោយខ្លួនឯងបាន២៧ខ្នង,កំពុងរុះរើបានចំនួន៥៤ខ្នង ,មិនទាន់រុះរើ០៨ទីតាំង និងផ្ទះទឹកបែត្រី១៩បែត្រូវបានម្ចាស់អូសចេញពីក្នុងមូលដ្ឋានខណ្ឌ ។
លុះក្រោយមករហូតមកដល់ថ្ងៃទី១៨ ខែមិថុនា ផ្ទះទឹកដែលនៅសល់ទាំងនោះបានបន្តរុះរើទាំងអស់ចេញពីលើផ្ទះទឹកក្នុងមូលដ្ឋានខណ្ឌជ្រោយចង្វារ ។
ដោយឡែក ចំណែករោងស្នាក់នៅនេសាទចំនួន៧៤រោង នៅក្នុងភូមិ១ក្បាល ជ្រោយចង្វារខាងកើតសណ្ឋាគារសុខាក្នុងសង្កាត់ជ្រោយចង្វារ កំពុងតែរុះរើចេញបណ្តើរៗអស់មួយចំនួនធំនៅសល់តែចំនួន៣០ខ្នង និងស៊ូរ៉ាវមួយខ្នងតែប៉ុណ្ណោះ ហើយត្រូវបានម្ចាស់ធ្វើសន្យារុះរើដោយខ្លួនឯង ។
តាមព័ត៌មានអោយដឹងថា រោងដែលនៅសល់ និងស៊ូរ៉ាវមួយត្រូវបានអាជ្ញាធរ ខណ្ឌជ្រោយចង្វារដឹកនាំដោយលោក ហ៊ុយ សារុណអភិបាលរង និងលោកកៅ សារ៉ាវុធ អភិបាលរងខណ្ឌជ្រោយចង្វារក៏បានចុះទៅធ្វើកិច្ចសន្យារុះរើ កាលពីវេលាព្រឹក ថ្ងៃទី១៧ ខែមិថុនា នៅក្នុងឱកាសនោះមានការចូលរួមពីលោក ណូ ម៉ាត់សាត សមាជិកគណៈដឹកនាំជាន់ខ្ពស់នៃសាសនាអ៊ីស្លាមកម្ពុជា និង លោក អ៊ី យូតំណាង សមាគមខ្មែរអ៊ីស្លាមផងដែរ ។
នៅក្នុងកំណត់ហេតុបានអោយដឹងថា នៅពេលដែលក្រុមការងារបានចុះមកធ្វើការប្រុងរុះរើប្រភេទសំណង់ខាងលើ ដែលនៅសល់រោងចំនួន៣០ និងស៊ូរ៉ាវមួយដែលធ្វើពីឈើប្រក់សង្កសី ។ ពេលនោះ ក្រុមការងារបានជួបជាមួយលោក ណូ ម៉ាតសាត សមាជិក គណៈដឹកនាំអ៊ីស្លាមជាន់ខ្ពស់ នៃសាសនាអ៊ីស្លាម និងតំណាងសហគមន៍បានសុំសន្យាធ្វើការរុះរើនូវសំណង់ទាំងអស់ តាមចំនួនរៀបរាបខាងលើចេញអោយអស់ពីទីតាំង ក្នុងរយៈពេល៣ថ្ងៃដែលគិតចាប់ពីថ្ងៃទី១៨ ខែមិថុនា ដល់ថ្ងៃទី២០ ខែមិថុនា ឆ្នាំ២០២១។
បើការរុះរើមិនអស់អាជ្ញាធរនឹងចុះអនុវត្តិវិធានការរដ្ឋបាលដោយតំណាងសហគមន៍ និងប្រជាពលរដ្ឋទាំងអស់មិនមានការប្រឆាំងអ្វីឡើយ ។
គួរបញ្ជាក់ថា នៅក្នុងរយៈពេលអនុវត្តវិធានការរដ្ឋបាលរុះរើបែចិញ្ចឹមត្រី ផ្ទះបណ្តែតទឹក ផ្ទះតូចៗ និងសំណង់មិនរៀបរយនៅលើផ្ទៃទន្លេនៅក្នុងមូលដ្ឋានខណ្ឌជ្រោយចង្វារសម្រេចបានដោយជោគជ័យស្ទើរ១០០ភាគរយ ក្នុងចំណោមបែចិញ្ចឹមត្រី ផ្ទះបណ្តែតទឹក ផ្ទះតូចៗ និងសំណង់មិនរៀបរយ នៅលើផ្ទៃទន្លេ និងនៅច្រាំងទន្លេទាំងអស់ ចំនួន១៨២ខ្នង មានតែ១៩បែ បានអូសចេញ សង្ស័យទៅប្រមូលផ្តុំនៅជិតព្រំប្រគល់ស្រុកពញាឮបណ្តោះអាសន្នសិន ក្រៅពីនោះរុះរើខ្ទេចគ្មានសល់ឡើយ ៕
ចែករំលែកព័តមាននេះ