ពុទ្ធឱវាទបានទូន្មានថា ខន្ដីគឺការអត់ធន់ មេដឹកនាំនឹងទទួលបានជោគជ័យលើកិច្ចការងារទាំងពួង បើសិនជាមេដឹកនាំនោះមានខន្ដី គឺសេចក្ដីអត់ធន់ ។
តើមេដឹកនាំត្រូវអត់ធន់នឹងអ្វីខ្លះ ? មេដឹកនាំត្រូវអត់ធន់នឹងសេចក្ដីលំបាក សេចក្ដីវេទនា ការឈឺចាប់ទាំងពួង ការិះគន់ ការមើលងាយ មិនលើកទឹកចិត្ដ ។ល។ មេដឹកនាំត្រូវអត់ធន់នឹងតណ្ហា ឬមហិច្ឆតាផ្ទាល់ខ្លួនដែលគាបសង្កត់ជំរុញឲ្យប្រព្រឹត្ដអំពើមិនត្រឹមត្រូវ អំពើទុច្ចរិត ។
មេដឹកនាំមិនធ្វើតាមតែអារម្មណ៍ ឬចិត្ដរបស់ខ្លួននោះឡើយ ។ មេដឹកនាំត្រូវអត់ធន់ ដុសខាត់ភាពល្ងង់ខ្លៅរបស់ខ្លួន និងភាពល្ងង់ខ្លៅរបស់ប្រជាពលរដ្ឋ ឬអ្នកក្រោមបង្គាប់ ។ មេដឹកនាំត្រូវអត់ធន់ចំពោះការងាររបស់ខ្លួន ពាក្យណែនាំ ឬការប្រឹក្សាពីអ្នកផងទាំងពួង មិនថាអ្នកក្រោមបង្គាប់ ឬជាគ្រូអាចារ្យឡើយ ។
មេដឹកនាំត្រូវអត់ធន់ចំពោះការត្មះតិះដៀល ការប្រឆាំងពីសង្គម និងចំពោះពេលវេលាដែលធ្វើការងារមិនបានសម្រេច ។ ចំណុចពិសេសមួយទៀត មេដឹកនាំត្រូវមានអំណត់ចំពោះការស្ដាប់ ការជឿ ។ មិនត្រូវជឿងាយ ខឹងងាយ ផ្ដេសផ្ដាស ឬហៅថាត្រចៀកសឡើយ ។ ឮមួយរយដង មិនស្មើនឹងឃើញម្ដង ការឃើញមួយរយដង មិនស្មើបានប៉ះម្ដង ទោះជាមានហេតុផលក៏ដោយ ក៏មិនត្រូវដាក់ចិត្ដជឿភ្លាមដែរ ។
មេដឹកនាំត្រូវចុះមើលស្ថានការណ៍ពិតជាក់ស្ដែងដោយខ្លួនឯង និងបង្កើតទម្លាប់នេះដល់អ្នកក្រោមបង្គាប់ ។ តោងគោរពប្រណិប័តន៍តាមព្រះពុទ្ធបរមគ្រូនៃយើង ដែលព្រះអង្គអត់ធន់ស្វែងរកមាគ៌ាដ៏ត្រឹមត្រូវប្រោសសត្វលោករហូតបានសម្រេចព្រះនិញ្វន ៕ សាន សារិន
ចែករំលែកព័តមាននេះ