រាជធានីភ្នំពេញ ៖ ដោយមើលឃើញពីការកាប់ឈើច្រើន នៅតំបន់ព្រៃឡង់សហរដ្ឋអាមេរិកបានសម្រេចផ្តាច់ជំនួយថវិកាដែលឲ្យរដ្ឋាភិបាលទៅឲ្យ វិស័យឯកជន សង្គមស៊ីវិលដែលធ្វើការងាររបស់សហគមន៍មូលដ្ឋានវិញ ។ នេះបើតាមស្ថានទូតអាមេរិកនៅកម្ពុជា ។ យោងតាមសេចក្តីថ្លែងការណ៍របស់ស្ថានទូតអាមេរិកនៅកម្ពុជាស្តីពីការបង្វែរថវិកានៃគម្រោងព្រៃឡង់បៃតង…
រាជធានីភ្នំពេញ ៖ ដោយមើលឃើញពីការកាប់ឈើច្រើន នៅតំបន់ព្រៃឡង់សហរដ្ឋអាមេរិកបានសម្រេចផ្តាច់ជំនួយថវិកាដែលឲ្យរដ្ឋាភិបាលទៅឲ្យ វិស័យឯកជន សង្គមស៊ីវិលដែលធ្វើការងាររបស់សហគមន៍មូលដ្ឋានវិញ ។ នេះបើតាមស្ថានទូតអាមេរិកនៅកម្ពុជា ។
យោងតាមសេចក្តីថ្លែងការណ៍របស់ស្ថានទូតអាមេរិកនៅកម្ពុជាស្តីពីការបង្វែរថវិកានៃគម្រោងព្រៃឡង់បៃតង របស់ទីភ្នាក់ងារជំនួយអាមេរិក USAID នៅថ្ងៃទី១៧ មិថុនា ឆ្នាំ២០២១ បានលើកឡើងថាប្រជាជនអាមេរិក និងកម្ពុជា មានបំណងដូចគ្នា ក្នុងការការពារធនធានធម្មជាតិដ៏មានតម្លៃនៅលើផែនដី ដើម្បីធ្វើឲ្យមានការអភិវឌ្ឍន៍ប្រកបដោយនិរន្តរភាព បង្វែរនិន្នាការនៃបម្រែបម្រួលអាកាសធាតុ និងអភិរក្សសត្វព្រៃ និងជីវសាស្ត្រចម្រុះ សម្រាប់មនុស្សជំនាន់ក្រោយ ។
សហរដ្ឋអាមេរិកបានធ្វើការចំណាយថវិកាចំនួនជាង ១០០ លានដុល្លារ លើកម្មវិធីមួយចំនួន សម្រាប់ប្រយុទ្ធប្រឆាំងនឹងបញ្ហាទាំងនេះ នៅកម្ពុជាតាមរយៈទីភ្នាក់ងារជំនួយអាមេរិក USAID ។ ថ្វីបើប្រទេសកម្ពុជាសម្រេចបាននូវដំណើរចម្រើនទៅមុខខ្លះ នៅក្នុងការការពារបរិស្ថានក្តី តែសហរដ្ឋអាមេរិកបាន សម្តែងនូវកង្វល់ម្តងហើយម្តងទៀតលើការកាប់បំផ្លាញព្រៃឈើ ដែលនៅតែមានច្រើន នៅក្នុងតំបន់ការពារ ពិសេសនៅដែនជម្រកសត្វព្រៃនៅព្រៃឡង់ ជាទីដែលទីភ្នាក់ងារជំនួយអាមេរិក USAID បានចំណាយធនធានជាច្រើន ។
ថ្លែងការបញ្ជាក់ថា«យើងបានអំពាវនាវឲ្យមានកិច្ចសហប្រតិបត្តិការច្រើនថែមទៀត រវាងរដ្ឋាភិបាលកម្ពុជា សហគមន៍មូលដ្ឋាន និងសង្គមស៊ីវិល ដើម្បីរកដំណោះស្រាយដើម្បីការពារព្រៃឡង់ និងបេតិកភណ្ឌធម្មជាតិនៃព្រះរាជាណាចក្រកម្ពុជា ដើម្បីជាប្រយោជន៍របស់ប្រជាជនកម្ពុជាទាំងអស់ និងពិភពលោក» ។
ជាមួយគ្នានោះដែរ សេចក្តីថ្លែងការណ៍ក៏លើកឡើងថា វាជាការគួរឲ្យស្តាយ ដែលស្ថានភាពកំពុងតែកាន់តែអាក្រក់ទៅ ។ តាំងពីឆ្នាំ ២០១៦ មក ទោះបីជាមានការគាំទ្ររបស់ទីភ្នាក់ងារជំនួយអាមេរិក USAID ដើម្បីឲ្យមានការដើរល្បាត ការបណ្តុះបណ្តាលដល់ផ្នែកអនុវត្តច្បាប់ច្រើនថែមទៀត និងការរៀបចំបង្កើតប្រព័ន្ធគ្រប់គ្រងតំបន់ការពារថ្នាក់ជាតិក៏ដោយ ក៏តំបន់ដែនជម្រកសត្វព្រៃនៅព្រៃឡង់ នៅតែបានបាត់បង់ដដែល នូវផ្ទៃដីព្រៃប្រមាណ ៣៨ ០០០ ហិកតា គឺជិត ៩% នៃគម្របព្រៃឈើនៅទីនោះ។
ការកាប់ឈើខុសច្បាប់ដែលត្រូវបានបញ្ជាក់ច្បាស់នៅតែបន្តមាន នៅក្នុង និងជុំវិញដែនជម្រកសត្វព្រៃនៅព្រៃឡង់ ហើយអាជ្ញាធរ កម្ពុជាមិនបានធ្វើការកាត់ទោសបានសមល្មមចំពោះបទល្មើសសត្វព្រៃ ឬបញ្ឈប់សកម្មភាពខុសច្បាប់ទាំងនេះឡើយ ។
លើសពីនេះទៀត អាជ្ញាធរបានបន្តបំបិទសម្លេង ហើយធ្វើទុក្ខសហគមន៍មូលដ្ឋាន និងសង្គមស៊ីវិលដែលជាដៃគូរបស់គេដែលបង្ហាញកង្វល់ដ៏សមហេតុផល លើការបាត់បង់ធនធានធម្មជាតិរបស់គេ ។ ថ្លែងការគូសបញ្ជាក់ថា« ដោយសារមានបញ្ហាទាំងនេះដែលមិនត្រូវបានដោះស្រាយសហរដ្ឋអាមេរិក សូមបញ្ចប់ជំនួយដល់ស្ថាប័នរដ្ឋាភិបាលនៅក្រោមគម្រោងព្រៃឡង់បៃតងដែលទ្រទ្រង់ដោយទីភ្នាក់ងារជំនួយអាមេរិក USAID ។
ជំនួយរបស់សហរដ្ឋអាមេរិកនឹងត្រូវបង្វែរទៅជួយវិស័យឯកជន សង្គមស៊ីវិល និងការងាររបស់សហគមន៍មូលដ្ឋាន ដើម្បីកែលម្អមុខរបរប្រកបជីវភាពរស់នៅ និងពង្រីកកសិកម្មដែលមិនប៉ះពាល់បរិស្ថាន ។
សហរដ្ឋអាមេរិកនឹងបន្តធ្វើការជាមួយរាជរដ្ឋាភិបាលកម្ពុជាលើបញ្ហាបរិស្ថាន និងបម្រែបម្រួលអាកាសធាតុដែលជាកង្វល់រួមរបស់យើង និងរបស់ពិភពលោកដោយរួមទាំងការធ្វើការតាមរយៈកិច្ចសហការជាដៃគូរវាងសហរដ្ឋអាមេរិក និងតំបន់ទន្លេមេគង្គ» ។
ប្រភពលើកឡើងថា ក្នុងពេលដែលយើងធ្វើការអបអរទិវាបរិស្ថានពិភពលោកនៅខែនេះយើងដឹងថា ការគ្រប់គ្រងបរិស្ថានដែលមានប្រសិទ្ធភាពទាមទារឲ្យមានអភិបាលកិច្ចប្រកបដោយតម្លាភាព និងគណនេយ្យភាព ។
សហរដ្ឋអាមេរិក សូមបញ្ជាក់ពីតួនាទីចាំបាច់នៃសេរីភាពនៃការបញ្ចេញមតិ ការតវ៉ាដោយសន្តិវិធី និងការទទួលខុសត្រូវរបស់រដ្ឋាភិបាល ចំពោះពលរដ្ឋ នៅក្នុងការរក្សាឲ្យមានការអនុវត្តរឹងមាំតាមលទ្ធិប្រជាធិបតេយ្យ នៅក្នុងគ្រប់វិស័យទាំងអស់នៃការអភិវឌ្ឍ ដែលរួមមានផងដែរ នូវការការពារធនធានធម្មជាតិដ៏មានតម្លៃរបស់ព្រះរាជាណាចក្រកម្ពុជា៕
ចែករំលែកព័តមាននេះ