ព្រះសម្មាសម្ពុទ្ធត្រាស់ថា អ្នកដឹកនាំត្រូវតម្កល់ខ្លួនស្ថិតនៅក្នុងធម៌អវិហិង្សាជានិច្ច ។ អវិហិង្សា មានន័យថា មិនបៀតបៀនធ្វើឲ្យអ្នកដទៃក្ដៅក្រហាយ កើតទុក្ខដោយសារខ្លួន ជាពិសេសលើពលរដ្ឋរបស់ខ្លួនឯង ។
មេដឹកនាំមិនត្រូវយកអំណាចតួនាទីរបស់ខ្លួនទៅគាបសង្កត់ជិះជាន់គំរាមកំហែងប្រជាពលរដ្ឋ ដើម្បីតែផលប្រយោជន៍ផ្ទាល់ខ្លួន ឬផលប្រយោជន៍បក្សពួកខ្លួននោះទេ ។ មេដឹកនាំត្រូវគោរពសិទ្ធិពលរដ្ឋ កុមារ ចាស់ទុំ និងស្ដ្រីភេទ ។
មេដឹកនាំមិនត្រូវប្រើអំពើហិង្សាចំពោះជនរួមជាតិឡើយ ត្រូវប្រកាន់យកប្រជាធិបតេយ្យ យកប្រជាពលរដ្ឋជាធំ ។ មេដឹកនាំត្រូវឲ្យអភ័យ និងលើកលែងទោសចំពោះអ្នកដើរតាម ឬប្រជាពលរដ្ឋរបស់ខ្លួនដែលធ្វើខុសតាមតែអាចធ្វើទៅបាន គឺមិនមែនខុសដៃយកដៃ ខុសជើងយកជើងទេ ។
ត្រូវចាំថា អ្នកដើរតាមលំអានមេដឹក និងប្រជាពលរដ្ឋ ពួកគេគ្មានកំហុសទេ ខុសឬត្រូវគឺជាលទ្ធផលរបស់មេដឹកនាំ ព្រោះមេដឹកនាំជាអ្នកទទួលខុសត្រូវគ្រប់ការងារតូចធំទាំងអស់ ។ ប្រជាពលរដ្ឋប្រៀបដូចជាកូន ដែលពួកគេមិនដឹងអ្វីទេ ។
ហេតុនេះហើយ មេដឹកនាំត្រូវធ្វើការអប់រំ បណ្ដុះបណ្ដាលពលរដ្ឋឲ្យមានចំណេះដឹង និងសមត្ថភាពគ្រប់ៗគ្នា ។ បើអ្នកក្រោមឱវាទធ្វើខុស ឬបរាជ័យក្នុងកិច្ចការអ្វីមួយ កំហុសត្រូវធ្លាក់លើមេដឹកនាំជាអ្នកខុស មិនត្រូវដាក់កំហុស ឬដាក់ទោសលើអ្នកក្រោមបង្គាប់នោះឡើយ ។
មេដឹកនាំជាអ្នកសម្រេចចិត្ដលើកិច្ចការគ្រប់យ៉ាង ទាំងការប៉ាន់ប្រមាណស្ថានការណ៍ ការរៀបចំផែនការ ការអនុវត្ដ ការដឹកនាំធ្វើ និងការត្រួតពិនិត្យជាដើម មេដឹកនាំជាអ្នកទទួលខុសត្រូវទាំងស្រុង ៕ សាន សារិន
ចែករំលែកព័តមាននេះ