ខេត្តកំពង់ចាម៖ គ្រោះធម្មជាតិ បាក់ច្រាំងទន្លេ នៅក្នុងស្រុកចំនួន ២ គឺកងមាស និងស្រីសន្ធរ ដែលធ្វើឱ្យប៉ះពាល់ដល់លំនៅដ្ឋានប្រជាពលរដ្ឋប្រមាណ ១.៤០០ខ្នងផ្ទះ។ ដោយមានការខិតខំប្រឹង…
ខេត្តកំពង់ចាម៖ គ្រោះធម្មជាតិ បាក់ច្រាំងទន្លេ នៅក្នុងស្រុកចំនួន ២ គឺកងមាស និងស្រីសន្ធរ ដែលធ្វើឱ្យប៉ះពាល់ដល់លំនៅដ្ឋានប្រជាពលរដ្ឋប្រមាណ ១.៤០០ខ្នងផ្ទះ។ ដោយមានការខិតខំប្រឹង ប្រែងរបស់អាជ្ញាធរ រួមនិងស្ថាប័នគ្រប់លំដាប់ថ្នាក់ បានបូមខ្សាច់ទប់ច្រាំងទន្លេ កុំឱ្យបាក់បន្តទៀត ធ្វើយ៉ាងណាឱ្យប្រជាពលរដ្ឋ រស់នៅតាមដងទន្លេ មានភាពកក់ក្តៅ និងសុវត្ថិភាពទាំងរដូវប្រាំង និងវស្សា។
លោក អ៊ុ ប៉ុណ្ណាកា នាយករងទីចាត់ការផែនការ និងវិនិយោគខេត្ត ប្រាប់ឲ្យដឹងថា ឯកឧត្តម អ៊ុន ចាន់ដា អភិបាលខេត្ត អមដំណើរដោយសហការីជាច្រើននាក់ នាព្រឹកថ្ងៃទី១៥ មិថុនា ២០២១ បានដឹកនាំក្រុមការងារបច្ចេកទេសអញ្ជើញចុះពិនិត្យមើលការងារសាងសង់ច្រាំងទន្លេចំនួន ៣កន្លែង ក្នុងនោះ មានឃុំកោះអណ្ដែត ឃុំឫស្សីស្រុក ក្នុងស្រុកស្រីសន្ធរ និងទីតាំងមួយកន្លែងទៀត នៅឃុំសូរគង ស្រុកកងមាស ដែលកំពុងដំណើរការសាងសង់ ដោយញាប់ដៃញាប់ជើង
ធ្វើយ៉ាងណា ឲ្យរួចរាល់ មុនទឹកដំឡើងមកដល់។
នាយករងទីចាត់ការផែនការ និងវិនិយោគខេត្ត រំលឹកឲ្យដឹងថា គ្រោះធម្មជាតិ បាក់ច្រាំងទន្លេមេគង្គ បានកើតឡើងជាបន្តបន្ទាប់ ដោយនៅក្នុងអំឡុងឆ្នាំ២០១៧ គឺច្រាំងបានចាប់ផ្ដើមបាក់ ដោយសារតែមានការដុះដីនៅកោះតូច ទីតាំងត្រង់កណ្ដាលទន្លេ ដែលជាហេតុធ្វើឲ្យចរន្តទឹកក្នុងរដូវវស្សាបាចសាចបុកច្រាំងទន្លេនៅក្នុងស្រុកចំនួនពីរខាងលើនេះ ដែលជាហេតុ បណ្ដាលឲ្យបាក់បន្តិចម្ដងៗ។ លុះមកដល់ឆ្នាំ២០១៨ ក្នុងអាណត្តិឯកឧត្តម គួច ចំរើន ជាអភិបាលខេត្ត បានបង្កើតគណៈកម្មការចម្រុះ ចុះមកត្រួតពិនិត្យ និងវាយតម្លៃពីផលប៉ះពាល់ ទៅថ្នាក់លើ ដើម្បីសុំកិច្ចអន្តរាគមន៍។ លុះមកដល់អាណត្តិ ឯកឧត្តម អ៊ុន ចាន់ដា អភិបាកខេត្ត បានអញ្ជើញចុះពិនិត្យបន្ថែមទៀត រួចបានធ្វើរបាយការណ៍លាយលក្ខណ៍អក្សរ ជូនដល់ប្រមុខរាជរដ្ឋាភិបាលកម្ពុជា គឺសម្ដេចតេជោ ហ៊ុន សែន។
ការស្នើសុំនេះ ត្រូវបានសម្ដេចតេជោ ឯកភាព និងឲ្យក្រុមហ៊ុនឯកជនមួយ ចុះមកអន្តរាគមន៍ ដោយបានរៀបចំបាវខ្សាច់ ដើម្បីទុបនៅបាតច្រាំង ក្នុងនោះ នៅឃុំឫស្សីស្រុក មានប្រវែង ១.០០០ម៉ែត្រ ដោយដំណើរការស្ថាបនា បានប្រមាណ ២០%ជាង និងឃុំកោះអណ្ដែត ប្រវែង ៥០០ម៉ែត្រ ដោយដំណើរការស្ថាបនា បានប្រមាណជាង ៧០% ចំពោះលំនៅដ្ឋានរបស់ប្រជាពលរដ្ឋ ដែលរងផលប៉ះពាល់ប្រមាណជាង ១.០០០ខ្នងផ្ទះ មានទីតាំងស្ថិតនៅក្នុងឃុំទាំងពីរនេះ នៅស្រុកស្រីសន្ធរ។
បន្ទាប់មក ថ្នាក់ដឹកនាំខេត្ត បានអញ្ជើញចុះពិនិត្យទីតាំងមួយកន្លែងទៀត នៅក្នុងឃុំសូរគង ស្រុកកងមាស ដែលស្ថិតនៅត្រើយម្ខាងទន្លេមេគង្គ ប្រឈមនឹងស្រុកស្រីសន្ធរ ដែលលំនៅដ្ឋានប្រជាពលរដ្ឋរស់នៅតាមដងទន្លេ រងផលប៉ះពាល់ប្រមាណជាង ៤០០ខ្នងផ្ទះ ដែលទីនោះច្រាំងទន្លេមានប្រវែង ៥០០ ម៉ែត្រ រហូតមកដល់ពេលនេះ ការស្ថាបនាទប់ច្រាំងទន្លេ សម្រេចបានប្រមាណ ៦០% សរុបទាំង ៣កន្លែង ស្មើនឹង ២.០០០ម៉ែត្រ។
លោក អ៊ុ ប៉ុណ្ណាកា នាយករងទីចាត់ការផែនការ និងវិនិយោគខេត្ត បញ្ជាក់ថា តាមរយៈការបូមដី ដែលដុះនៅកោះតូច កណ្ដាលទន្លេនោះ នឹងធ្វើឱ្យចរន្តទឹកហូរត្រង់ចុះទៅផ្នែកខាងក្រោម និងលែងជាបញ្ហាចោទបន្តទៀត។
តាមគោលការណ៍របស់ឯកឧត្តម អ៊ុន ចាន់ដា អភិបាលខេត្ត ក្រោយពីទីតាំងទាំង ៣ខាងលើ ស្ថាបនាទប់ច្រាំងទន្លេ កុំអោយបាក់រួចរាល់ នឹងបន្តទៅតំបន់ផ្សេងទៀត សំដៅធ្វើយ៉ាងណា ឲ្យលំនៅដ្ឋានប្រជាពលរដ្ឋ រស់នៅតាមដងទន្លេ មានភាពកក់ក្តៅ ដោយមិនបំលាស់ទី ទៅរស់នៅកន្លែងផ្សេង។
ក្នុងនាមអាជ្ញាធរខេត្ត ក៏ដូចជាប្រជាពលរដ្ឋទាំងពីរស្រុក លោកសូមថ្លែងអំណរគុណ ចំពោះសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានជួយអន្តរាគមន៍ ចាត់ឲ្យមន្ត្រីជំនាញរបស់ក្រសួងធនធានទឹក ចុះមកសិក្សា ទាន់ពេលវេលា និងបានទប់ច្រាំងទន្លេ មិនអោយបាក់បន្តទៀត ហើយក៏សូមឱ្យសម្ដេចតេជោ និងក្រុមគ្រួសារបុត្រាបុត្រី ទទួលបាននូវសុខភាពល្អ ដើម្បីបន្តដឹកនាំនាវាកម្ពុជាឆ្ពោះទៅរកការរីកចម្រើនឥតឈប់ឈរ៕ ចាន់ ថេត
ចែករំលែកព័តមាននេះ