ខេត្តកណ្តាល ៖ ម្ចាស់គណនីហ្វេសបុកមួយ(សុំមិនបញ្ចេញឈ្មោះ) បានផ្ញើសារចូលផេកស្នងការដ្ឋាននគរបាលខេត្តកណ្តាល មានខ្លឹមសារថា ៖ «តាំងពីដើមឡើយ ព្រំដីនៅខាងក្នុង ពេលវាស់ប្លង់ ម្ចាស់ដីបានវាស់រំលោភយកដីផ្លូវ ដោយមិនបានដាំបង្គោលទេ ទើបប្រជាជនអត់ដឹង តែនៅពេលលក់ឲ្យទៅម្ចាស់ថ្មី ម្ចាស់ថ្មី បានបោះបង្គោលតាមប្លង់ដី ដែលជាប្លង់រំលោភដីផ្លូវ ទើបប្រជាជនផ្អើលឲ្យមេភូមិជួយដោះស្រាយ តែឥឡូវមេភូមិថា ម្ចាស់ដីថ្មី បានឲ្យលុយទៅម្ចាស់ដីចាស់អស់ហើយ ហើយគេអាងប្លង់របស់គេ» ។
ក្រោយពីទទួលបានព័ត៌មាននេះបានភ្លាម លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្ត បានចាត់ឲ្យលោកវរសេនីយ៍ឯក មាន សំណាង អធិការនគរបាលស្រុកអង្គស្នួល ស្រាវជ្រាវករណីខាងលើ នៅតាំងដីនៅភូមិត្រពាំងនប់ ឃុំក្រាំងម្កាក់ ស្រុកអង្គស្នួល ខេត្តកណ្តាល ។
នៅថ្ងៃទី១៦ ខែមិថុនា ឆ្នាំ ២០២១ កម្លាំងនគរបាលប៉ុស្តិ៍ក្រាំងម្កាក់ នៃអធិការដ្ឋាននគរបាលស្រុកអង្គស្នួល បានសហការជាមួយសមាជិកក្រុមប្រឹក្សាឃុំក្រាំងម្កាក់ និងមេភូមិត្រពាំងនប់ បានចុះស្រាវជ្រាវ និងពិនិត្យទីតាំង ផ្លូវលំក្នុងភូមិត្រពាំងនប់ ឃើញថា ៖
ជាដីឡូត៍ជាប់ផ្លូវកែងខាងក្រោយ ដែលមានម្ចាស់ឈ្មោះ ជរ សុខលីន ភេទប្រុស អាយុ៣៩ឆ្នាំ នៅភូមិព្រៃទា២ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ មានទំហំ ៧០៦ម៉ែត្រការ៉េ ។
បើតាមការវាស់វែង យកតាមគំនូសប្លង់ ចេញដោយភូមិបាលស្រុកអង្គស្នួល គឺបង្គោលព្រំខាងក្រោយ គឺបោះចូលដីផ្លូវកែងខ្លាំង ដែលធ្វើឲ្យពិបាក បត់រថយន្តចេញចូល ។
ប្រជាពលរដ្ឋក្នុងភូមិ សំណូមពរ ឲ្យម្ចាស់ដី ខិតបង្គោលចូលក្នុងបន្តិច ។
ការសំណូមពរនេះ ត្រូវបានលោកមេភូមិត្រពាំងនប់ បានបញ្ជាក់ថា គាត់បានទូរស័ព្ទទំនាក់ទំនងទៅម្ចាស់ដីខាងលើរួចហើយ ដោយ ម្ចាស់ដី បានយល់ព្រមតាមសំណូមពររបស់ប្រជាពលរដ្ឋ ប៉ុន្តែថ្ងៃក្រោយ ពេលធ្វើរបងគាត់នឹងបង្ខិតបង្គោលចូលក្នុង ដើម្បីឲ្យបានផ្លូវកែងធំជាងមុន ៕
ចែករំលែកព័តមាននេះ