កម្ពុជាបន្តទទួលសម្ភារៈ និងឧបករណ៍កីឡាពីជប៉ុន ត្រៀមស៊ីហ្គេម2023
- ភ្នំពេញ
រាជធានីភ្នំពេញ ៖ ខណៈដែលព្រឹត្តិការណ៍ស៊ីហ្គេម កាន់តែរំកិលជិតដល់ គេកត់សម្គាល់ថា បណ្ដាសហព័ន្ធមួយចំនួនបានស្វះស្វែង
រាជធានីភ្នំពេញ ៖ ខណៈដែលព្រឹត្តិការណ៍ស៊ីហ្គេម កាន់តែរំកិលជិតដល់ គេកត់សម្គាល់ថា បណ្ដាសហព័ន្ធមួយចំនួនបានស្វះស្វែងទទួលជំនួយជាសម្ភារៈ និងឧបករណ៍កីឡាជាបន្តបន្ទាប់ដើម្បីបំពេញសេចក្ដីត្រូវការ ។ ក្នុងនោះគេឃើញភាគីជប៉ុនក៏ជាប្រទេសដែលបានបរិច្ចាគជំនួយជួយដល់កម្ពុជាបានច្រើនផងដែរ ដោយកំពុងតែបន្តផ្ដល់អោយ។ ជាក់ស្ដែង ក្នុងចំណោមសហព័ន្ធមួយចំនួន ដែលទទួលបានឧបករណ៍ និងសម្ភារៈកីឡា គឺសហព័ន្ធកីឡាកាយសម្ព័ន្ធកីឡាកម្ពុជាក៏ទើបតែត្រូវបានជប៉ុនផ្ដល់ជូនអោយផងដែរ ដែលការផ្ដល់ជូនមុននេះ បានទទួលសម្ភារហ្វឹកហាត់កីឡាកាយសម្ព័ន្ធ១ម៉ឺនដុល្លារ។ នេះជាអំណោយពីសហព័ន្ធកីឡាកាយសម្ព័ន្ធជប៉ុន ដោយភាគីជប៉ុននឹងក្លាយជាដៃគូមួយដែលជួយផ្ដល់សម្ភារៈកីឡាបន្តទៀត ដើម្បីជួយអោយកម្ពុជា រៀបចំស៊ីហ្គេមបានសមរម្យ។
លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជាគូសបញ្ជាក់ថា សហព័ន្ធកីឡាកាយសម្ព័ន្ធជប៉ុន បានផ្តល់ជំនួយនូវសម្ភារកីឡាកាយសម្ព័ន្ធមួយដល់សហព័ន្ធកម្ពុជា ដែលមានតម្លៃប្រមាណ១ម៉ឺនដុល្លារនេះ រួមមាន៖ ១-ឧបករណ៍កង (Ring) ១សិត, សេះកង (Pommel Horse) ១សិត, ៣-របារនឹង (High Bar) ១សិត ៤-ស្នួរលំនឹង (Beam) ១ ៥-របារទាបខ្ពស់ (Uneven Bars) ១ ៦-ក្តារឈ្នាន់ (Spring Board) ចំនួន៥។ អគ្គលេខាធិការរូបនេះសង្កត់ធ្ងន់ថា «តាមពិតសម្ភារហ្វឹកហាត់កីឡាកាយសម្ព័ន្ធទាំងអស់នេះ បានយកទៅរក្សាទុកនៅសាលហ្វឹកហាត់កីឡាប្រដាល់នៃពហុកីឡដ្ឋានជាតិអូឡាំពិកជាបណ្តោះអាសន្ន មិនទាន់បានដំឡើងនៅឡើយទេ ដោយសារសាលហ្វឹកហាត់កីឡាកាយសម្ព័ន្ធបច្ចុប្បន្នកំពុងព្យាបាលអ្នកជំងឺកូវីដ-១៩កម្រិតស្រាល ហើយនៅពេលដែលរៀបចំឡើងវិញទើបយើងដំឡើងសម្រាប់ការហ្វឹកហាត់របស់កីឡាករ កីឡាការិនី»។
លោក ណយ ផាណា លើកឡើងថា កាលណាយើងដំឡើងសម្ភារហ្វឹកហាត់បានត្រឹមត្រូវតាមក្បួនខ្នាតបច្ចេកទេស នោះមានន័យថា វានឹងជួយជំរុញដល់គុណភាពបច្ចេកទេសរបស់កីឡាករ កីឡាការិនីបាន។ ហេតុដូច្នេះហើយ គ្រប់ប្រភេទកីឡាទាំងអស់ ចំបាច់ត្រូវមានសម្ភារបច្ចេកទេស ដើម្បីការហ្វឹកហាត់ និងបង្កើនគុណភាពសិទ្ធផលឲ្យបានល្អប្រសើរ ហើយបើកាលណាយើងខ្វះខាតសម្ភារបច្ចេកទេស នោះមានន័យថា យើងធ្វើអ្វីក៏មិនកើតដែរ។ លោកបន្ថែមថា តាមរយៈការទទួលបាននូវសម្ភារកីឡាកាយសម្ព័ន្ធកាន់តែច្រើនបន្ថែមទៀតនេះ នឹងជួយជំរុញឲ្យការហ្វឹកហាត់របស់កីឡាករ កីឡាការិនីជម្រើសជាតិរបស់ខ្លួនបានបង្កើនបច្ចេកទេស ដើម្បីត្រៀមឆ្ពោះទៅចូលរួមប្រកួតប្រជែងនៅក្នុងការប្រកួតកីឡាស៊ីហ្គេម លើកទី៣១ នៅប្រទេសវៀតណាម បើទោះជាត្រួវលើកពេល។ តែអ្វីដែលចាំបាច់ចំបង គឺដើម្បីអោយកីឡាករកម្ពុជាត្រៀមឆ្ពោះទៅទទួលរៀបចំធ្វើជាម្ចាស់ផ្ទះ ការប្រកួតកីឡាស៊ីហ្គេម លើកទី៣២ ឆ្នាំ២០២៣តែម្ដង។
លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានសហព័ន្ធកីឡាកាយសម្ព័ន្ធកម្ពុជា បានបញ្ជាក់ថា ការផ្ដល់សម្ភារៈកីឡាជូនដល់សហព័ន្ធទាំងឡាយរបស់កម្ពុជា នៅក្នងពេលនេះ គឺជារឿងដ៏សំខាន់ ដោយសារតែបណ្ដាសហព័ន្ធទាំងឡាយ គឺសុទ្ធតែមានតម្រូវការសម្រាប់ស៊ីហ្គេម។ លោក ណយ ផាណា ផ្ទាល់ក៏បានសម្តែងនូវអំណរគុណយ៉ាងជ្រាលជ្រៅបំផុតចំពោះសហព័ន្ធកីឡាកាយសម្ព័ន្ធជប៉ុន ដែលបានផ្តល់ជំនួយជាសម្ភារហ្វឹកហាត់តាមការស្មើសុំរបស់សហព័ន្ធកីឡាកាយសម្ព័ន្ធកម្ពុជា ដើម្បីបន្តដំណើរការអភិវឌ្ឍវិស័យកីឡាកាយសម្ព័ន្ធនៅកម្ពុជា ឲ្យកាន់តែល្អប្រសើរឡើងបន្ថែមទៀត៕
ចែករំលែកព័តមាននេះ