នៅក្នុងយុទ្ធនាការអនុវត្តវិធានការរដ្ឋបាលរុះរើផ្ទះទឹកបែចិញ្ចឹមត្រី ផ្ទះតូចៗ និងសំណង់មិនរៀបរយនៅលើផ្ទៃទឹកទន្លេប៉ុន្មានថ្ងៃនេះ ទទួលបាននូវការគាំទ្រពីមហាជន ខណៈពេលដែលម្ចាស់ផ្ទះទឹកទាំងនេះបាន
រាជធានីភ្នំពេញ ៖ នៅក្នុងយុទ្ធនាការអនុវត្តវិធានការរដ្ឋបាលរុះរើផ្ទះទឹកបែចិញ្ចឹមត្រី ផ្ទះតូចៗ និងសំណង់មិនរៀបរយនៅលើផ្ទៃទឹកទន្លេប៉ុន្មានថ្ងៃនេះ ទទួលបាននូវការគាំទ្រពីមហាជន ខណៈពេលដែលម្ចាស់ផ្ទះទឹកទាំងនេះ បានរុះរើជាបន្តបន្ទាប់ដោយខ្លួនឯង និងមួយចំនួនទៀតត្រូវបានអាជ្ញាធរជួយរុះចេញពីក្នុងទន្លេ ។
ចាប់តាំងពីថ្ងៃទី១២ ខែមិថុនា ដែលជាថ្ងៃអនុវត្តវិធានការរុះរើ រហូតមកដល់ថ្ងៃទី១៥ ខែមិថុនា ឆ្នាំ២០២១នេះ គេសង្កេតឃើញ ផ្ទះទឹក បែចិញ្ចឹមត្រី ទាំងនោះបានបាត់ខ្លួនស្ទើរអស់ពីកន្លែងដើម នៅសល់តែមួយចំនួនតូចកំពុងតែរុះរើដោយរលូន ។
ទន្ទឹមការរុះរើអស់ពីកន្លែងដើម ស្រាប់តែគេឃើញបែត្រីផ្ទះទឹកទាំងនោះលេចមុខត្រៀមត្រា ពេញផ្ទៃទឹក នៅចំណុចព្រំប្រទល់ក្នុងភូមិ គ្រួសសង្កាត់សំរោង ខណ្ឌព្រែកព្នៅ ដែលទីតាំងនេះពីមុនមកមិនធ្លាប់មាន ផ្ទះទឹក បែចិញ្ចឹមត្រី នោះទេ ។
ទាក់ទិនការប្រមូលផ្តុំនេះត្រូវបានអាជ្ញាធរមូលដ្ឋានបានអោយដឹងថា បែទាំងនោះ សុទ្ធតែជាបែចិញ្ចឹមត្រីដែលត្រីតូចៗ ហើយអាជ្ញាធរ ទុកពេលអោយមួយរយៈពេលសិន ។
តាមព័ត៌មានអោយដឹងថា នៅក្នុងយុទ្ធនាការរុះរើរយៈពេល៣ថ្ងៃនេះ គេឃើញអាជ្ញាធរបានប្រើកម្លាំងរាប់រយនាក់រុះរើហើយម្ចាស់ ផ្ទះទឹកបែចិញ្ចឹមត្រី ផ្ទះតូចៗ និងសំណង់មិនរៀបរយលើផ្ទៃទឹកបានបង្ខំចិត្តរុះរើជាបន្តបន្ទាប់ និងមួយចំនួនដែលត្រីនៅតូចត្រូវបានអាជ្ញាធរអោយអូសចេញយកទៅប្រមូលផ្តុំគ្នានៅព្រំប្រទល់ ស្រុកពញាឮ ខេត្តកណ្តាល ។
តាមព័ត៌មានអោយដឹងទៀតថា ការប្រើវិធានការរដ្ឋបាលនេះបានប្រព្រឹត្តទៅដោយរលូន ហើយម្ចាស់ផ្ទះទឹកបែចិញ្ចឹមត្រី និងផ្ទះតូច ៗមិនរៀបរយទាំងនោះបានបន្តរុះរើចេញជាបន្តបន្ទាប់ដែលរហូតមកដល់ថ្ងៃទី១៥ ខែមិថុនានេះ គេសង្កេតឃើញតាមដងទន្លេ ចាប់ពីស្ពានជ្រោយចង្វារ រហូតដល់ស្ពានព្រែកព្នៅទាំងផ្នែកខាងកើត ក្នុងមូលដ្ឋាន ខណ្ឌជ្រោយចង្វារ និងផ្នែកខាងលិចក្នុងមូលដ្ឋាន ខណ្ឌឬស្សីកែវ ផ្ទះទឹក បានបាត់មុខ សល់តែទូក , បែ ក្បួនឬស្សី, ធុងទឹក និងដំបូលកំពុងតែរុះរើបណ្តើរៗ ។
ចំណែកចាប់ពីស្ពានព្រែកព្នៅ រហូតដល់វត្តគ្រួស ក្នុងសង្កាត់ព្រែកព្នៅ និងសង្កាត់សំរោងខណ្ឌព្រែកព្នៅ ផ្ទះទឹក ក៏បានកំពុងតែរុះរើស្ទើរបាត់រូបរាងពីច្រាំងទន្លេទៅហើយ ។
ដោយឡែកនៅខាងជើង វត្តគ្រួស ក្នុងសង្កាត់សំរោង ខណ្ឌព្រែកព្នៅដែលពីមុខអត់មានផ្ទះទឹក បែជាកន្លែងប្រមូលផ្តុំទៅដោយ បែចិញ្ចឹមត្រី ផ្ទះទឹក ពេសពេញផ្ទៃទន្លេទៅវិញ ។
តាមអាជ្ញាធរ ខណ្ឌព្រែកព្នៅ ក៏បានអោយដឹងថា ផ្ទះទឹកទាំងនោះសុទ្ធជាបែចិញ្ចឹមត្រីនៅតូចដែលបានចល័តខ្លួនចេញពីខណ្ឌនានានៅក្នុងរាជធានីភ្នំពេញទៅតំបន់នោះ តាមការណែនាំ របស់អាជ្ញាធរដែលបានទុកពេលអោយមួយរយៈ ។
ទោះបីជាយ៉ាងណា តាមជំហរបស់រដ្ឋបាលរាជាធានីភ្នំពេញមិនលើកលែងដល់ម្ចាស់បែចិញ្ចឹមត្រីបន្តទៀតឡើយ ទោះបីម្ចាស់ទើបទំលាក់កូនត្រីចូលបែក៏ដោយ លោកម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញកន្លងមកបានឱ្យកោះសន្តិភាពដឹងថា អាជ្ញាធរមិនអនុញ្ញាតឱ្យបន្តទុកបែត្រីយ៉ាងអនាធិបតេយ្យពាសវាលពាសកាលតាមដងទន្លេនៅកន្លែងចាស់ដូចសព្វថ្ងៃនេះទៀតទេ ។
ម្ចាស់បែចិញ្ចឹមត្រីមួយចំនួនទើបតែទំលាក់កូនត្រីចូលបែក៏ត្រូវតែរុះរើចាកចេញអោយអស់ ប៉ុន្តែអាចរៀបចំចិញ្ចឹមត្រីជាបណ្តោះអាសន្ន នៅភាគខាងជើងក្នុងខណ្ឌព្រែកព្នៅ ជាប់ព្រំប្រទល់ខេត្តកណ្តាលដោយមានកិច្ចសន្យាត្រឹមត្រូវ និងការរៀបចំឲ្យមានសណ្តាប់ធ្នាប់ របៀបរៀបរយពុំមានបង្កផលប៉ះពាល់ណាមួយពិសេសបរិស្ថានទន្លេ ។
លោក ម៉េត មាសភក្តី បានឱ្យដឹងទៀតថា បែចិញ្ចឹមត្រី ផ្ទះបណ្តែតទឹក និងសំណង់គ្មានសណ្តាប់ធ្នាប់នៅក្នុងតំបន់មិនរៀបរយជាច្រើន លើផ្ទៃទឹកក្នុងមូលដ្ឋានខណ្ឌជាប់ព្រំប្រទល់ទន្លេទាំង៧ រួមមាន ខណ្ឌព្រែកព្នៅ ជ្រោយចង្វារ ឫស្សីកែវ ដូនពេញ ចំការមន ច្បារអំពៅ និងខណ្ឌមានជ័យ ត្រូវបានម្ចាស់រុះរើ និងខ្លះទៀតបានចល័តចេញដោយស្ម័គ្រចិត្ត គិតចាប់ពីថ្ងៃដែលរដ្ឋបាល រាជធានីភ្នំពេញ ចេញសេចក្តីជូនដំណឹងកាលពីថ្ងៃទី០២ ខែមិថុនា ឆ្នាំ២០២១ និងកំពុងរើចេញជាបន្តបន្ទាប់រហូតមកដល់ថ្ងៃនេះ៕
ចែករំលែកព័តមាននេះ