ខេត្តបាត់ដំបង ៖ គេមិនទាន់ឃើញអាជ្ញាធរ ឬមន្ត្រីស្ថាប័នជំនាញណាមួយចុះពិនិត្យ ឬវាយតម្លៃទៅលើការបង្ហូរទឹកសំអុយចេញពីហាងលក់គុយទាវមួយកន្លែង នៅចុងខាងកើត«ស្ពានថ្ម១៣មករា»ខាងមុខសាលាខេត្ត ចូលក្នុងស្ទឹងសង្កែ ដែលកំពុងមានសន្ទុះហក់ឡើងខ្លាំង នៅព្រឹកថ្ងៃទី១៥ មិថុនា…
ខេត្តបាត់ដំបង ៖ គេមិនទាន់ឃើញអាជ្ញាធរ ឬមន្ត្រីស្ថាប័នជំនាញណាមួយចុះពិនិត្យ ឬវាយតម្លៃទៅលើការបង្ហូរទឹកសំអុយចេញពីហាងលក់គុយទាវមួយកន្លែង នៅចុងខាងកើត«ស្ពានថ្ម១៣មករា»ខាងមុខសាលាខេត្ត ចូលក្នុងស្ទឹងសង្កែ ដែលកំពុងមានសន្ទុះហក់ឡើងខ្លាំង នៅព្រឹកថ្ងៃទី១៥ មិថុនា នេះ ។
គេឃើញបុរសវ័យចំណាស់ម្នាក់ ទំនងត្រូវបានគេជួលឲ្យកាប់កកាយបង្ហូរទឹកស្អុយនោះ ចូលទៅក្នុងស្ទឹងសង្កែ ដែលស្ថិតនៅខាងសាលាខេត្ត ត្រើយខាងកើត ។ បុរសនោះបាននិយាយថា ម្ចាស់ហាងគុយទាវនៅក្បែរនោះ បានជួលឲ្យគាត់គាស់កកាយប្រព័ន្ធលូបង្ហូរទឹកតូមួយដែលស្រាប់យូរហើយ ដើម្បីបង្ហូរទឹកកខ្វក់ចេញពីហាងគុយទាវរបស់គាត់ចូលស្ទឹងសង្កែ។
គាត់និយាយថា ម្ចាស់ហាងគុយទាវបានប្រាប់គាត់ថា ប្រព័ន្ធបង្ហូរទឹកកខ្វក់ចេញពីហាងគុយទាវនោះ មានយូរហើយ តែត្រូវបានគេបុកគ្រឹះធ្វើក្បាលស្ពាន១៣មករា និង បុកគ្រឹះធ្វើច្រាំងស្ទឹងបិទជិតមុខលូ ទើបធ្វើឲ្យលូស្ទះលិចពាសវាលពាសកាលក្នុងហាងគុយទាវនៅក្បាលស្ពាននោះ។
ឆ្លើយនឹងសំណួរថា តើពេលលោកពូជីកបង្ហូរទឹកស្អុយចូលស្ទឹងបែបនេះ មានមន្ត្រីឬសមត្ថកិច្ចចុះមកសួរនាំទេ ? គាត់បានគ្រវីក្បាល ជាមួយនឹងចម្លើយពីរម៉ាត់ថា«អត់ទេ»។ បើតាមការពិនិត្យជាក់ស្ដែង គេឃើញប្រព័ន្ធលូបង្ហូរទឹកតូចមួយត្រូវបានគេជីកបង្កប់ក្រោមថ្នល់ ដែលគេសណ្ធានបានថា មានប្រភពចេញពីម្ដុំហាងលក់គុយទាវនៅក្បែរនោះ។ ទឹកដែលបានបង្ហូរចេញពីកូនលូនោះ មានស្ថានភាពកខ្វក់ខ្លាំងនិងមានក្លិនស្អុយច្រាសខ្យល់ ដែលអាចបង្កផលប៉ះពាល់យ៉ាងធ្ងន់ធ្ងរដល់បរិស្ថាន និង ទឹកស្ទឹងសង្កែ។
ដូច្នេះ អាជ្ញាធរឬមន្ទីរពាក់ព័ន្ធគួរចុះទៅពិនិត្យ ដើម្បីទប់ស្កាត់ផលប៉ះពាល់នេះ មិនគួរបណ្ដែតបណ្ដោយឲ្យម្ចាស់ហាងគុយទាវបង្ហូរទឹកស្អុយចូលស្ទឹងបែបនេះទេ ។
ចែករំលែកព័តមាននេះ