ខេត្តកំពង់ចាម៖ ពិតជារីករាយដោយក្តីរំភើប ព្រោះសម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានផ្ដល់វ៉ាក់សាំងប្រឆាំង Covid-19 ដល់ប្រជាពលរដ្ឋ ចំនួន…
ខេត្តកំពង់ចាម៖ ពិតជារីករាយដោយក្តីរំភើប ព្រោះសម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានផ្ដល់វ៉ាក់សាំងប្រឆាំង Covid-19 ដល់ប្រជាពលរដ្ឋ ចំនួន ៤ ស្រុក ក្នុងនោះ រួមមាន៖ បាធាយ ជើងព្រៃ ព្រៃឈរ និងកំពង់សៀម ស្មើនឹងចំនួន ៣២ម៉ឺននាក់។ នេះបើតាមឯកឧត្តម អ៊ុន ចាន់ដា អភិបាលខេត្តកំពង់ចាម។
ឯកឧត្តមអភិបាលខេត្ត បានថ្លែងដូច្នេះ នៅក្នុងកិច្ចប្រជុំក្រុមប្រឹក្សាខេត្ត កាលពីព្រឹកថ្ងៃទី៨ ខែមិថុនា ឆ្នាំ២០២១ នៅសាលាខេត្តកំពង់ចាម ដោយមានការចូលរួមពីស្ថាប័នពាក់ព័ន្ធ នៅក្នុងខេត្ត។
ឯកឧត្តម អ៊ុន ចាន់ដា ឲ្យដឹងថា ពលករ ដែលធ្វើដំណើរមកពីប្រទេសថៃ នាពេលកន្លងទៅថ្មីៗ ត្រូវបានរកឃើញវិជ្ជមានកូវីដ១៩ ដែលជាប្រភេទជំងឺបំលែងថ្មី ឆ្លងលឿនរហ័សជាងចាស់ រហូតដល់ ៤០%។ បើឆ្លងហើយ វាងាយនឹងស្លាប់ ប្រសិនណាយឺតយ៉ាវ យកមកព្យាបាល។ ក្នុងនោះ សម្តេចប្រមុខរាជរដ្ឋាភិបាល ក៏ដូចជាស្ថាប័នក្រសួងសុខាភិបាល បានបង្កើនការយកចិត្តទុកដាក់អ្នកជំងឺឆ្លង Covid នៅតាមបណ្ដារាជធានីខេត្ត ក្នុងប្រទេសកម្ពុជា ពោលគឺមិនអាចធ្វេសប្រហែស បាននោះទេ។
ឯកឧត្តម អ៊ុន ចាន់ដា បន្តថា ជាមួយនោះ សម្រាប់ខេត្តកំពង់ចាម គឺត្រូវដាក់ផែនការ ដើម្បីប្រជាជាតិ ប្រឆាំងនឹងជំងឺកូវីដ ក្នុងនោះ រួមមាន៖ ១.ស្រាវជ្រាវឲ្យបានឆាប់រហ័ស ក្នុងនោះ មានអ្នកពាក់ព័ន្ធដោយផ្ទាល់ និងប្រយោល។ ២.ធ្វើតេស្តរហ័សយកអ្នកសង្ស័យ មកពិនិត្យភ្លាម តាមរយៈឧបករណ៍ Rapit Test ដែលផ្ដល់ដោយក្រសួងសុខាភិបាល និងមួយផ្នែកទៀតរបស់ឯកឧត្តម ហ៊ុន ម៉ាណែត ក្នុងករណីឃើញហើយ ត្រូវយកមកព្យាបាលជាបន្ទាន់ ដោយមិនបង្អង់នោះទេ។ ៣.ព្យាបាលរហ័ស ឆាប់យកមកព្យាបាលភ្លាម មិនរង់ចាំលទ្ធផលពីភ្នំពេញនោះទេ ការពន្យារពេល នាំឲ្យអត្រាឆ្លងជំងឺនេះ លឿនផ្ទុះតែចូលក្នុងសហគមន៍ ឲ្យតែពិនិត្យឃើញតាមឧបករណ៍តេស្តរហ័ស ត្រូវប្រញាប់យកមកព្យាបាលជាបន្ទាន់នៅមន្ទីរពេទ្យ និងរងចាំលទ្ធផលបីថ្ងៃក្រោយពីផ្ទៀងផ្ទាត់ NIPH។
ឯកឧត្តម បន្តថា ក្នុងនោះ ក៏ត្រូវធ្វើចត្តាឡីស័ករហ័ស អ្នកពាក់ព័ន្ធ ត្រូវយកមកធ្វើចត្តាឡីស័កឲ្យបានលឿននៅមណ្ឌលចត្តាទ្បីស័ក ដែលមាននៅតាមបណ្ដាលស្រុក និងក្រុងកំពង់ចាម។ ក្នុងនោះ អ្នកប៉ះពាល់ដោយប្រយោល និងធ្វើចត្តាឡីស័កនៅតាមផ្ទះ ហើយសូមឲ្យកម្លាំងប៉ុស្តិ៍រដ្ឋបាល ត្រូវត្រួតពិនិត្យឲ្យបានជាប់ជាប្រចាំផងដែរ។
ឯកឧត្តម អ៊ុន ចាន់ដា បញ្ជាក់ថា តាមរយៈឯកឧត្តមឧបនាយករដ្ឋមន្ត្រី យឹម ឆៃលី ប្រធានក្រុមការងារថ្នាក់ជាតិ ចុះជួយខេត្តកំពង់ចាម និងឯកឧត្តម ហ៊ុន ណេង បានឲ្យរូបលោក (អ៊ុន ចាន់ដា) ស្នើសុំត្រង់ទៅសម្ដេចតេជោ ព្រោះថានៅក្នុងខេត្តកំពង់ចាម បានផ្ទុះឡើង ចូលក្នុងសហគមន៍ ក្នុងនោះ មានប្រជាពលរដ្ឋ និងកម្មករកម្មការិនី បានឆ្លង Covid រហូតដល់ជាង ១.០០០នាក់ហើយ។ ដោយមានទឹកចិត្តមនុស្សធម៌ដ៏ថ្លៃថ្លា សម្ដេចតេជោ សែន បានសម្រេចផ្ដល់វ៉ាក់សាំងប្រឆាំងនឹងជំងឺកូវីដ១៩ ដែលនឹងត្រៀមចាក់ជូនដល់ប្រជាពលរដ្ឋ រួមទាំងកម្មករកម្មការិនី នៅស្រុកចំនួន ៤ ក្នុងនោះ មានស្រុកបាធាយ ជើងព្រៃ ព្រៃឈរ និងស្រុកកំពង់សៀម សរុបមានប្រជាពលរដ្ឋប្រមាណ ៣២ម៉ឺននាក់។ ការចាក់វ៉ាក់សាំង នៅស្រុកទាំង ៤នេះ នឹងធ្វើឡើងក្នុងពេលខាងមុខដ៏ឆាប់។
ឯកឧត្តមអភិបាលខេត្ត បន្តថា សម្រាប់នៅស្រុកបាធាយ និងជើងព្រៃ ត្រូវបានប្រគល់ជូនពេទ្យយោធា។ ចំណែកនៅស្រុកព្រៃឈរ និងកំពង់សៀម គឺមានក្រុមគ្រូពេទ្យខេត្តកំពង់ចាម ដែលមានចំនួន ៥០ក្រុម ត្រូវបានបែងចែក សម្រាប់បំពេញការងារ តាមគោលដៅនីមួយៗ។ សកម្មភាពចាក់វ៉ាក់សាំងនេះ ត្រូវប្រើពេល ១៤ថ្ងៃ សម្រាប់ដុសទី១ និងដុសទី២ គឺមានរយៈពេល ចន្លោះពី ១៤ថ្ងៃ ទៅ ២៨ថ្ងៃ គិតចាប់ពីថ្ងៃចាក់ដូសទី១។
ទោះបីជាចាក់វ៉ាក់សាំងហើយក៏ដោយ ក៏ឯកឧត្តមអភិបាលខេត្ត បានផ្តាំផ្ញើថា ត្រូវអនុវត្តបីកុំ បីការពារ ត្រូវតែពាក់ម៉ាស ឲ្យបានជាប់ជាប្រចាំ តាមវិធានរបស់ក្រសួងសុខាភិបាល៕ ចាន់ ថេត
ចែករំលែកព័តមាននេះ