ប្រទេសចិន ៖ ទូរទស្សន៍ចិនរាយការណ៍កាលពីថ្ងៃទី៧ ខែមិថុនា ឆ្នាំ២០២១ថា រថយន្តកាំមីញ៉ុងបែនជាច្រើនគ្រឿង ត្រូវបានចតបន្តកន្ទុយគ្នានៅតាមក្បែរតំបន់លំនៅឋាននាភាគនិរតីចិន ដើម្បីរារាំងហ្វូងដំរីព្រៃដែលដើរអុកឡុក ក្រោយពីពួកវាចាកចេញពីតំបន់អភិរក្សមួយ ដោយហ្វូងដំរីនោះបង្កការបំផ្លិចបំផ្លាញ គិតជាប្រាក់ច្រើនលានយន់រួចមកហើយ ។
ហ្វូងដំរីដែលមានប្រមាណជា៥០ក្បាល ក្នុងនោះមានទាំងកូនៗផង បានចាកចេញកាលពីពាក់កណ្ដាលខែមេសា ពីតំបន់អភិរក្ស XISHUANG BANNA ជាតំបន់ នៅព្រំដែនឡាវនិងមីយ៉ាន់ម៉ា ហើយនាំគ្នាដើរសំដៅមកទិសខាងជើង ក្នុងចម្ងាយផ្លូវប្រមាណជា៥០០គីឡូម៉ែត្រ ។
រឿងហ្វូងដំរីព្រៃនោះ ទាក់ទាញការចាប់អារម្មណ៍ខ្លាំងតាមបណ្ដាញសង្គម ហើយបង្កការរំខានដល់ប្រទេសចិន ។ ហេតុផលនៃការធ្វើអន្តោប្រវេសន៍របស់ហ្វូងដំរីនោះនៅតែជាអាថ៌កំបាំង តែពួកដំរីទាំងនេះបានបង្កការបំផ្លិចបំផ្លាញតាមផ្លូវវាត្រាច់ចរ ដូចជាបំផ្លាញចំការពោតនិងចំការផ្សេងៗទៀត នាំឲ្យមានការខូចខាតសម្ភារជាច្រើន ។
កាលពីថ្ងៃទី៦ ខែមិថុនានេះ ទូរទស្សន៍ចិន CCTV បានចេញផ្សាយបណ្ដារូបភាពនៃក្បួនរថយន្តកាំមីញ៉ុង ដែលយកទៅចតតាមបណ្ដោយផ្លូវថ្នល់មួយនៅទីជនបទប៉ុនប៉ងបញ្ចៀសការអុកឡុករបស់ហ្វូងដំរីចូលក្នុងតំបន់មានមនុស្សរស់នៅច្រើន ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ