រាជធានីភ្នំពេញ ៖ ដើម្បីចូលរួមអភិវឌ្ឍន៍សេដ្ឋកិច្ចប្រទេសកម្ពុជាឱ្យមានការរីកចម្រើនប្រកបដោយចីរភាពរដ្ឋាភិបាលប្រទេសស្វីស តាមរយៈទីភ្នាក់ងារស្វីសសម្រាប់កិច្ចអភិវឌ្ឍន៍និងសហប្រតិបត្តិការ ( SDC ) ប្រចាំព្រះរាជាណាចក្រកម្ពុជា បានសម្រេចប្រកាសផ្ដល់នូវហិរញ្ញប្បទានឥតសំណងដល់កម្ពុជាចំនួន៥២លានដុល្លារអាមេរិក សម្រាប់អភិវឌ្ឍវិស័យអាទិភាពចំនួន៣…
រាជធានីភ្នំពេញ ៖ ដើម្បីចូលរួមអភិវឌ្ឍន៍សេដ្ឋកិច្ចប្រទេសកម្ពុជាឱ្យមានការរីកចម្រើនប្រកបដោយចីរភាពរដ្ឋាភិបាលប្រទេសស្វីស តាមរយៈទីភ្នាក់ងារស្វីសសម្រាប់កិច្ចអភិវឌ្ឍន៍និងសហប្រតិបត្តិការ ( SDC ) ប្រចាំព្រះរាជាណាចក្រកម្ពុជា បានសម្រេចប្រកាសផ្ដល់នូវហិរញ្ញប្បទានឥតសំណងដល់កម្ពុជាចំនួន៥២លានដុល្លារអាមេរិក សម្រាប់អភិវឌ្ឍវិស័យអាទិភាពចំនួន៣ ។
យោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា ក្រោយជំនួបរវាងលោកឈៀង យ៉ាណារ៉ា រដ្ឋមន្ត្រីប្រតិភូ អមនាយករដ្ឋមន្ត្រី អគ្គលេខាធិកាគណៈកម្មាធិការនិតិសម្បទា និងអភីវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា និង លោកម៉ាកឃឺស ប៊ឺលី នាយកទីភ្នាក់ងារស្វីសសម្រាប់កិច្ចអភិវឌ្ឍន៍ និងសហប្រតិបត្តិការ កាលពីល្ងាចថ្ងៃទី០៣ មិថុនា ២០២១ បានឱ្យដឹងថា ស្វីស គ្រោងផ្ដល់ហិរញ្ញប្បទានឥតសំណងសរុបប្រមាណ៥២លានដុល្លារ ដល់កម្ពុជាសម្រាប់រយៈពេល៤ឆ្នាំគិតចាប់បីឆ្នាំ២០២២ ដល់ឆ្នាំ ២០២៥ ឬប្រមាណ១៣លានដុល្លារអាមេរិកក្នុងមួយឆ្នាំ ដើម្បីគាំទ្រដល់កម្ពុជា អភិវឌ្ឍន៍វិស័យអាទិភាពសំខាន់ៗចំនួន៣ ។
យោងតាមសេចក្តីប្រកាសដដែលនេះបានឱ្យដឹងបន្តថា វិស័យសំខាន់ៗ៣ដែលកម្ពុជាគ្រោយនឹងជំរុញការអភិវឌ្ឍន៍ក្រោមជំនួយរបស់ស្វីសរួមមាន ១វិស័យអភិបាលកិច្ច និងការចូលរួមរបស់ប្រជាពលរដ្ឋ ( គាំទ្រដល់មន្ទីរពេទ្យគន្ធបុប្ផា លើកកម្ពស់ការផ្ដល់សេវាសាធារណៈ ផែនការអនុវត្តគណនេយ្យភាពសង្គម ការទទួលបានព័ត៌មាន និងការចូលរួមរបស់យុវជន ) ២ ការអភិវឌ្ឍសេដ្ឋកិច្ចប្រកបដោយបរិយាប័ន្ន ( គាំទ្រដល់ការអប់រំ បណ្ដុះបណ្ដាលបច្ចេកទេស និងវិជ្ជាជីវៈ និងការងារសមរម្យសម្រាប់យុវជន ) និងទី៣ ការប្រែប្រួលអាកាសធាតុ និងការគ្រប់គ្រងធនធានធម្មជាតិ ( គាំទ្រដល់ខ្សែសង្វាក់តម្លៃដំណាំសាកវប្បកម្ម ការរំដោះគ្រាប់មីន និងយុទ្ធភ័ណ្ឌមិនទាន់ផ្ទុះសម្រាប់ធ្វើកសិកម្ម សហគមន៍នេសាទ និងព្រៃឈើ កសិកម្មធន់នឹងការប្រែប្រួលអាកាសធាតុ និងការគ្រប់គ្រងទឹកសម្រាប់កសិកម្ម និងការប្រើប្រាស់ព្រៃឈើប្រកបដោយចីរភាព) ។
ក្រៅពីការផ្ដល់ជំនួយដល់កម្ពុជាចំនួន៥២លានដុល្លារអាមេរិកនេះហើយ ស្វីសក៏បានផ្ដល់ជំនួយដល់ប្រទេសឡាវ ដែលជាមិត្តជិតខាងរបស់កម្ពុជានិងប្រទេសក្នុងតំបន់ផ្សេងទៀតនូវទឹកប្រាក់ប្រមាណ១៤៨លានលានដុល្លារអាមេរិកផងដែរ សម្រាប់អភិវឌ្ឍន៍លើវិស័យស្រដៀងនឹងកម្ពុជាដែរ ។
គួរបញ្ជាក់ថា នៅអំឡុងឆ្នាំ២០០២ ដល់ឆ្នាំ២០២០កន្លងទៅ ភាគីស្វីសក៏បានបើកផ្ដល់ហិរញ្ញប្បទានឥតសំណងដល់កម្ពុជាសរុបប្រមាណ១៤២លានដុល្លារផងដែរ ដើម្បីគាំត្រដល់កម្ពុជា ក្នុងការអនុវត្តគម្រោងអភិវឌ្ឍន៍នានា ៕
ចែករំលែកព័តមាននេះ