ខេត្តប៉ៃលិន៖ នៅថ្ងៃទី១ ខែមិថុនា ឆ្នាំ២០២១ ក្រោយពីធ្វើតេស្តរហ័ស ទៅលើប្រជាពលរដ្ឋចំនួន ៤២នាក់ ដែលភាគច្រើន គឺជាអ្នកចូលលេងក្នុងកាស៊ីណូ នៅជាប់ច្រកទ្វារអន្តរជាតិព្រំ…
ខេត្តប៉ៃលិន៖ នៅថ្ងៃទី១ ខែមិថុនា ឆ្នាំ២០២១ ក្រោយពីធ្វើតេស្តរហ័ស ទៅលើប្រជាពលរដ្ឋចំនួន ៤២នាក់ ដែលភាគច្រើន គឺជាអ្នកចូលលេងក្នុងកាស៊ីណូ នៅជាប់ច្រកទ្វារអន្តរជាតិព្រំ ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ត្រូវបានក្រុមគ្រូពេទ្យបង្អែកខេត្តប៉ៃលិន រកឃើញវិជ្ជមានទាំងអស់។ ករណីនេះ ជាការព្រួយបារម្ភខ្លាំង ខណ:ពួកគាត់ទាំងអស់នោះ គឺរស់នៅតាមភូមិនានា ស្ទើរតែទូទាំងខេត្តប៉ៃលិន។
ប្រភពព័ត៌មានបានឱ្យដឹងថា ក្រោយពីរដ្ឋបាលខេត្តប៉ៃលិន បានសម្រេចបិទផ្អាកបណ្តោះអាសន្ននូវទីតាំងអាជីវកម្ម ក្រុមហ៊ុន ស៊ុបភើ រិច (Super Rich) និងក្រុមហ៊ុន ខ្លាខ្មៅ ថែមទាំងបិទផ្សារព្រំថ្មី (ហៅផ្សារតាប៉ាច) ដោយជាប់ពាក់ព័ន្ធនឹងករណីអ្នកជំងឺកូវីដ-១៩ រហូតមកដល់ថ្ងៃទី០១ ខែមិថុនា ឆ្នាំ២០២១ នេះ គេបានរកឃើញអ្នកកើតជំងឺកូវីដ-១៩ រហូតដល់ទៅ ៤២នាក់ ដែលពួកគេទាំងនោះ ភាគច្រើន គឺជាអ្នកធ្វើការ និងអ្នកលេងល្បែង ក្នុងក្រុមហ៊ុនកាស៊ីណូតែម្តង។
ក្នុងកំឡុងពេលផ្អាកបណ្តោះអាសន្ននូវទីតាំងទាំងនេះ រដ្ឋបាលស្រុកសាលាក្រៅ បានហ៊ុំព័ទ្ធជុំវិញក្រុមហ៊ុនទាំងមូល ផ្អាកការចេញចូលក្នុងបរិវេណក្រុមហ៊ុន ដោយធ្វើការស្រាវជ្រាវរកអ្នកពាក់ព័ន្ធផ្ទាល់ ឬប្រយោល និងអ្នកដែលគេចខ្លួន ដើម្បីយកមកធ្វើចត្តាឡីស័ក និងយកវត្ថុសំណាក។
ចំពោះទីតាំង និងអ្នកដែលមានការពាក់ព័ន្ធនឹងអ្នកជំងឺកូវីដ-១៩ ខាងលើ រដ្ឋបាលខេត្តប៉ៃលិន បានចេញវិធានការផ្អាកជាបណ្តោះអាសន្ន និងបានយកអគារក្រុមហ៊ុនកាស៊ីណូខាងលើ ធ្វើជាកន្លែងចត្តាឡីស័ក ១៤ថ្ងៃ។
ប្រភពបញ្ជាក់ថា អ្នកដែលឆ្លងជំងឺកូវីដ-១៩ មកពីតាមបណ្តាភូមិនានា ក្នុងខេត្តប៉ៃលិន និងអ្នករស់នៅក្រៅខេត្តផងដែរ ដែលអ្នកឆ្លងទាំងនោះ មកពីភូមិអូរតាពុកក្រោម ម្នាក់ ភូមិអូរតាប្រាងម្នក់ ភូមិសួនអំពៅលិច ៣នាក់ ភូមិតាង៉ែនក្រោម ម្នាក់នាក់ ភូមិវត្ត ២នាក់ ភូមិអូរស្ងួត ២នាក់ ភូមិប៉ាហ៊ីត្បូង ២នាក់ ភូមិផ្សារព្រំជើង ៨នាក់ ភូមិផ្សារព្រំ ១៦នាក់ ភូមិអូរឈើក្រំ ៣នាក់ ភូមិអូររអិល ម្នាក់ ភូមិអូរក្រូច ឃុំអូរដា ស្រុកកំរៀង ខេត្តបាត់ដំបង ម្នាក់ និងភូមិកួរស្រូវ សង្កាត់ពោធិ៍សែនជ័យ ខណ្ឌដង្កោ រាជធានីភ្នំពេញ ម្នាក់។
ដូច្នេះ រដ្ឋបាលខេត្តប៉ៃលិន ក៏បានអំពាវនាវដល់សាធារណជន និងបងប្អូនប្រជាពលរដ្ឋ ដែលមានការប្រាស្រ័យទាក់ទងដោយផ្ទាល់ ឬដោយប្រយោលជាមួយអ្នកជំងឺកូវីដ១៩ ខាងលើ សូមតាមដានសុខភាពជាប្រចាំ បើសង្ស័យត្រូវរួសរាន់ទៅជួបគ្រូពេទ្យនៅមន្ទីរពេទ្យបង្អែកខេត្ត ក្រុង ស្រុក ឬមណ្ឌលសុខភាព ដែលនៅជិតបំផុត។ សូមឱ្យចូលរួមអនុវត្តឱ្យបានខ្ជាប់ខ្ជួននូវវិធានការ ៣ការពារ ៣កុំ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឱ្យមានប្រសិទ្ធភាពខ្ពស់៕ ដោយ៖ នីយ៉ា
ចែករំលែកព័តមាននេះ